കാച്ചിലിന്റെ കളറുമായി ഒരു കിടുക്കാച്ചി സ്മാർട്ട്ഫോൺ! റിയൽമി ജിടി നിയോ 6 ലോഞ്ച് തീയതി പ്രഖ്യാപിച്ചു

പ്രമുഖ ​ചൈനീസ് സ്മാർട്ട്ഫോൺ ബ്രാൻഡായ റിയൽമിയുടെ പ്രശസ്തമായ ജിടി നിയോ സീരീസിലേക്ക് ഒരു പുതിയ സ്മാർട്ട്ഫോൺ കൂടി അ‌വതരിക്കാൻ പോകുന്നു. റിയൽമി ജിടി നിയോ 5ന്റെ പിൻഗാമിയായി റിയൽമി ജിടി നിയോ 6 ഈ മാസം 9 ന് ​ചൈനയിൽ ലോഞ്ച് ചെയ്യുമെന്ന് കമ്പനി സ്ഥിരീകരിച്ചു.

​ചൈനയിലെ ഒരു റീട്ടെയിൽ വെബ്‌സൈറ്റിലെ ലിസ്റ്റിങ്ങിൽ റിയൽമി ജിടി നിയോ 6 ( Realme GT Neo 6 ) ഇടംപിടിച്ചിരുന്നു. ഇതിന് പിന്നാലെയാണ് ഇപ്പോൾ ​ചൈനീസ് സാമൂഹികമാധ്യമമായ വെയ്‌ബോയിലൂടെ റിയൽമി പുതിയ റിയൽമി ജിടി നിയോ 6ന്റെ ലോഞ്ച് പ്രഖ്യാപിച്ചത്.

മേയ് 9ന് റിയൽമി ജിടി നിയോ 6 ലോഞ്ച് ചെയ്യും എന്നതിന് പുറമേ, നല്ല കിടുക്കാച്ചി കാച്ചിലിനെ ഓർമ്മിപ്പിക്കുന്ന വിധത്തിൽ പർപ്പിൾ കളറിലുള്ള ജിടി നിയോ 6 വേരിയന്റിന്റെ ചിത്രവും കമ്പനി പുറത്തുവിട്ടു. ഇത് കൂടാതെ വരാൻ പോകുന്ന റിയൽമി ജിടി നിയോ 6 ന്റെ ചിപ്സെറ്റ് വിവരവും സ്ഥിരീകരിച്ചിട്ടുണ്ട്.

ക്വാൽക്കോം സ്നാപ്ഡ്രാഗൺ 8 ജെൻ 3 ചിപ്സെറ്റ് ആണ് റിയൽമി ജിടി നിയോ 6ന്റെ കരുത്തായി ഒപ്പമെത്തുക. ഈ ഫോണിനെ സംബന്ധിക്കുന്ന മറ്റ് വിവരങ്ങളൊന്നും ഔദ്യോഗികമായി സ്ഥിരീകരിച്ചിട്ടില്ല. ഡി​സൈനിന്റെ കാര്യമെടുത്താൽ, കഴിഞ്ഞ മാസം ചൈനയിൽ ഔദ്യോഗികമായി ലോഞ്ച് ചെയ്ത റിയൽമി ജിടി നിയോ 6 എസ്ഇയുടെ ഛായ ജിടി നിയോ 6ന് ഉണ്ട്.

ലോഞ്ചിന് ഇനി മണിക്കൂറുകളുടെ വ്യത്യാസം മാത്രമേ ഉള്ളൂ എന്നതിനാൽ ഈ സ്മാർട്ട്ഫോണിന്റെ ഫീച്ചറുകൾ അ‌ധികം ​വൈകാതെ കൃത്യമായി അ‌റിയാൻ സാധിക്കും. എങ്കിലും അ‌തിന് മുൻപേ ഈ ഫോണിൽ എന്താണ് ഉള്ളത് എന്ന് അ‌റിയാൻ ആകാംക്ഷയുള്ളവർക്ക് ലീക്ക് റിപ്പോർട്ടുകൾ വെളിപ്പെടുത്തിയിട്ടുള്ള വിവരങ്ങൾ പരിശോധിക്കാവുന്നതാണ്.

റിയൽമി ജിടി നിയോ 6ൽ പ്രതീക്ഷിക്കുന്ന പ്രധാന ഫീച്ചറുകൾ: ലീക്ക് റിപ്പോർട്ടുകൾ വെളിപ്പെടുത്തിയിട്ടുള്ള വിവരങ്ങൾ പ്രകാരം 6.78 ഇഞ്ച് 1.5K 120Hz AMOLED ഡിസ്‌പ്ലേയും 6,000 nits പീക്ക് ​ബ്രൈറ്റ്നസും ഈ ഫോണിൽ ഉണ്ട്. ഈ ഫോണിന്റെ പ്രവർത്തനങ്ങളുടെ കരുത്ത് ക്വാൽക്കോം സ്നാപ്ഡ്രാഗൺ 8 ജെൻ 3 ചിപ്സെറ്റ് തന്നെയാണ്.

ലാഗ് ഇല്ലാത്ത പെർഫോമൻസ് കാഴ്ചവയ്ക്കുന്നതിനായി 24 ജിബി റാമും 1 ടിബി ഇൻ്റേണൽ സ്റ്റോറേജും വരെ റിയൽമി ജിടി നിയോ 6 സ്മാർട്ട്ഫോണിൽ റിയൽമി നൽകും എന്ന് പ്രതീക്ഷിക്കുന്നു. ആൻഡ്രോയിഡ് 14 അ‌ടിസ്ഥാനമാക്കിയുള്ള റിയൽമി യുഐ 5-ൽ ആയിരിക്കും ഈ ഫോണിന്റെ പ്രവർത്തനം.

ക്യാമറകളുടെ കാര്യത്തിലേക്ക് വന്നാൽ, ഒപ്റ്റിക്കൽ ഇമേജ് സ്റ്റെബി​ലൈസേഷനോട് കൂടിയ 50MP മെയിൻ ക്യാമറയും 8MP അൾട്രാ വൈഡ് സെൻസറും റിയൽമി ജിടി നിയോ 6 5ജിയുടെ റിയർ ക്യാമറ യൂണിറ്റിൽ ഉണ്ടാകും എന്നാണ് റിപ്പോർട്ടുകൾ പറയുന്നത്. ഫ്രണ്ടിൽ വീഡിയോ കോളുകൾക്കും സെൽഫികൾക്കുമായി 32 എംപി സെൻസർ ഇടംപിടിച്ചേക്കാം.

പെർഫോമൻസിന്റെ കാര്യത്തിൽ മാത്രമല്ല, ചാർജിങ്ങിന്റെ കാര്യത്തിലും റിയൽമി ജിടി നിയോ 6 പുലിയായിരിക്കും. കാരണം 120W ഫാസ്റ്റ് ചാർജിംഗ് പിന്തുണയോടെ 5,500mAh ബാറ്ററിയാണ് ഈ ഫോണിൽ പായ്ക്ക് ചെയ്തിരിക്കുന്നത് എന്നാണ് ടിപ്സ്റ്റർമാർ വെളിപ്പെടുത്തിയിട്ടുള്ളത്. മൊത്തത്തിൽ ഒരു കിടിലൻ സ്മാർട്ട്ഫോൺ തന്നെയാണ് വരാൻ പോകുന്നത്. ​ചൈനയിലെ ലോഞ്ചിന് പിന്നാലെ ​വൈകാതെ ഇത് ഇന്ത്യയിലേക്കും എത്തുമെന്ന് പ്രതീക്ഷിക്കുന്നു.