പാവങ്ങൾ കൊണ്ടുപോയി സന്തോഷിക്കട്ടെ; 6,999 രൂപയ്ക്ക് നാർസോ N61 അ‌വതരിപ്പിച്ച് റിയൽമി

വിപണിയിൽ ഇപ്പോൾ സ്മാർട്ട്ഫോണുകളുടെ വൻ കുത്തൊഴുക്കാണ്, ദിവസവും പുതിയ സ്മാർട്ട്ഫോണുകൾ ലോഞ്ച് ചെയ്യപ്പെടുന്നു. വമ്പൻ സ്രാവുകളും തിമിംഗലങ്ങളും മുതൽ പൊടിമീൻ വരെ ഉള്ളവ അ‌ക്കൂട്ടത്തിലുണ്ട്. ഇന്ന് ഒറ്റ ദിവസം മാത്രം (ജൂ​ലൈ 29) മൂന്ന് സ്മാർട്ട്ഫോണുകളാണ് ഇന്ത്യയിൽ ലോഞ്ച് ചെയ്യപ്പെട്ടിരിക്കുന്നത്. ഓപ്പോ കെ12x 5ജി, ഷവോമി 14 സിവി പാണ്ടലിമിറ്റഡ് എഡിഷൻ, റിയൽമി നാർസോ എൻ61 എന്നിവയാണ് അ‌വ. ഈ മൂന്ന് സ്മാർട്ട്ഫോണുകളിൽ ഏറ്റവും വിലക്കുറവ് റിയൽമി നാർസോ എൻ61 (Realme Narzo N61) ന് ആണ്. എൻട്രിലെവൽ സ്മാർട്ട്ഫോൺ എന്ന നിലയ്ക്കാണ് റിയൽമി ഈ ഫോൺ അ‌വതരിപ്പിച്ചിരിക്കുന്നത്.

അ‌തായത് കുറഞ്ഞ വിലയ്ക്കുള്ളിൽ സ്മാർട്ട്ഫോൺ എക്സ്പീരിയൻസ് വാഗ്ദാനം ചെയ്യുന്ന ഒരു സ്മാർട്ട്ഫോൺ തേടുന്നവർക്ക് പരിഗണിക്കാൻ പാകത്തിൽ ആണ് റിയൽമി നാർസോ സീരീസിൽ ഈ പുതിയ ഫോൺ അ‌വതരിപ്പിച്ചിരിക്കുന്നത്. ​6999 രൂപയാണ് റിയൽമി നാർസോ എൻ61 ന്റെ അ‌ടിസ്ഥാന മോഡലിന്റെ ഇന്ത്യയിലെ വില.

റിയൽമി നാർസോ എൻ61ന്റെ പ്രധാന ഫീച്ചറുകൾ: 6.74 ഇഞ്ച് ഡിസ്‌പ്ലേ, 90 Hz റിഫ്രഷ് റേറ്റ്, 560 nits-ൻ്റെ പീക്ക് ​ബ്രൈറ്റ്നസ് എന്നിവ ഇതിലുണ്ട്. യൂണിസോക് T612 ചിപ്‌സെറ്റ് ആണ് ഈ ബജറ്റ് സ്മാർട്ട്ഫോണിന് റിയൽമി നൽകിയിരിക്കുന്നത്. 6ജിബി വരെ റാമും 6ജിബി വെർച്വൽ റാമും ഈ ഫോണിലുണ്ട്.

128ജിബി വരെ ഇന്റേണൽ സ്റ്റോറേജും റിയൽമി നാർസോ എൻ61 വാഗ്ദാനം ചെയ്യുന്നു. രണ്ട് വേരിയന്റുകളിൽ ആണ് ഈ റിയൽമി സ്മാർട്ട്ഫോണുകൾ വിൽപ്പനയ്ക്ക് എത്തുന്നത്. 4GB + 64GB, 6GB + 128GB എന്നിവയാണ് ആ രണ്ട് വ്യത്യസ്ത റാം+ സ്റ്റോറേജ് വേരിയന്റുകൾ.

ഡ്യുവൽ റിയർ ക്യാമറ സജ്ജീകരണം ഈ ഫോണിൽ ഒരുക്കിയിരിക്കുന്നു. അ‌തിൽ റിയർ പാനലിലെ മെയിൻ ക്യാമറ 32 എംപിയുടേത് ആണ്. ഫ്രണ്ടിൽ 5 എംപി സെൽഫി ക്യാമറയും ഉണ്ട്. റിയൽമി നാർസോ എൻ 61ൽ നൽകിയിരിക്കുന്നത്. ആൻഡ്രോയിഡ് 14 അടിസ്ഥാനമാക്കിയുള്ള റിയൽമി യുഐയിലാണ് ഈ സ്മാർട്ട്ഫോൺ പ്രവർത്തിക്കുന്നത്.

10W ചാർജർ പിന്തുണയ്ക്കുന്ന 5,000mAh ബാറ്ററിയാണ് റിയൽമി നാർസോ എൻ61 സ്മാർട്ട്ഫോണിൽ നൽകിയിരിക്കുന്നത്. ഡ്യുവൽ 4G സ്റ്റാൻഡ്‌ബൈ, 2.4GHz / 5GHz Wi-Fi, ബ്ലൂടൂത്ത് 5.0, 3.5mm ഹെഡ്‌സെറ്റ് ജാക്ക് തുടങ്ങിയ കണക്ടിവിറ്റി ഫീച്ചറുകളും ഇതിലുണ്ട്. ഇത് ഒരു 4ജി സ്മാർട്ട്ഫോൺ ആണ്.

റിയൽമിയുടേത് അ‌ടക്കം പ്രമുഖ ബ്രാൻഡുകളുടെയെല്ലാം 5ജി സ്മാർട്ട്ഫോണുകൾ 10000 രൂപയിൽ താഴെ വിലയിൽ വിപണിയിൽ ലഭ്യമാണ് എന്നതും ഈ സന്ദർഭത്തിൽ ഓർക്കണം. എങ്കിലും ഫീച്ചറുകളെക്കാൾ ഉപരി വിലക്കുറവിന് പ്രാധാന്യം നൽകുന്നവർക്ക് റിയൽമി നാർസോ എൻ61 വാങ്ങുന്നത് പരിഗണിക്കാവുന്നതാണ്. 4ജി ഫോൺ ആണെങ്കിലും കുറഞ്ഞ വിലയ്ക്ക് മികച്ച ഫീച്ചറുകൾ ഇതിൽ ലഭ്യമാകുന്നുണ്ട്.

വോയേജ് ബ്ലൂ, മാർബിൾ ബ്ലാക്ക് നിറങ്ങളിലും രണ്ട് സ്റ്റോറേജ് വേരിയൻ്റുകളിലും റിയൽമി നാർസോ എൻ61 വാങ്ങാൻ ലഭ്യമാകും. ഇതിന്റെ 4GB + 64GB അ‌ടിസ്ഥാന മോഡലിന്റെ വില 6,999 രൂപയാണ്. 6GB + 128GB വേരിയന്റ് 7,999 രൂപ വിലയിൽ ലഭ്യമാണ്.

സംയോജിത മെറ്റാലിക് ഫ്രെയിം, റൈൻഫോഴ്‌സ്ഡ് ഗ്ലാസ്, IP54 റേറ്റിങ് എന്നീ ഫീച്ചറുകളും ഉള്ള റിയൽമി നാർസോ എസ്61 ആമസോൺ, റിയൽമിയുടെ ഔദ്യോഗിക വെബ്‌സൈറ്റ്, ഓഫ്‌ലൈൻ റീട്ടെയിൽ സ്റ്റോറുകൾ എന്നിവ വഴി ഓഗസ്റ്റ് 6 ന് ഉച്ചയ്ക്ക് 12 മുതൽ ഇന്ത്യയിൽ വാങ്ങാൻ ലഭ്യമാകും.