വമ്പൻ ബാറ്ററി വേണോ അതോ സ്ലിം ഡിസൈനോ? റിയൽമി P4s 5G vs ഇൻഫിനിക്സ് നോട്ട് എഡ്ജ്: ഫ്ലിപ്പ്കാർട്ട് ഓഫറിൽ ഏത് വാങ്ങണം?

ഫ്ലിപ്പ്കാർട്ടിന്റെ അർലി ബേർഡ് ഓഫറുകൾ (Early Bird deals) ഇന്ന് (സെപ്റ്റംബർ 24) മുതൽ ഇന്ത്യയിൽ ലഭ്യമായിത്തുടങ്ങി. തെരഞ്ഞെടുത്ത ആക്സിസ്, ഐസിഐസിഐ ബാങ്ക് കാർഡുകൾ ഉപയോഗിച്ച് പേയ്‌മെന്റ് നടത്തുമ്പോൾ റിയൽമി P4s 5G, ഇൻഫിനിക്സ് നോട്ട് എഡ്ജ് ഫോണുകൾ മികച്ച ഓഫറിൽ സ്വന്തമാക്കാം. വമ്പൻ ബാറ്ററിയും 1.5K അമോലെഡ് സ്‌ക്രീനുമാണ് ഇരുഫോണുകളുടെയും പ്രധാന ആകർഷണം. എങ്കിലും ഡിസ്‌പ്ലേ സ്മൂത്ത്‌നസ്, ബാറ്ററി ബാക്കപ്പ്, സോഫ്റ്റ്‌വെയർ, കസ്റ്റമർ സപ്പോർട്ട് എന്നിവയിൽ രണ്ടും രണ്ട് തട്ടിലാണ്.

ബാങ്ക് ഓഫറുകൾക്ക് ശേഷമുള്ള ഫോണുകളുടെ യഥാർത്ഥ വില പരിശോധിക്കാം: റിയൽമി P4s 5G ₹31,999 രൂപയ്ക്കും ഇൻഫിനിക്സ് നോട്ട് എഡ്ജ് ₹23,999 രൂപയ്ക്കും സ്വന്തമാക്കാം. തെരഞ്ഞെടുത്ത ആക്സിസ്, ഐസിഐസിഐ കാർഡുകൾക്കും ഇഎംഐ ഇടപാടുകൾക്കും ലഭിക്കുന്ന 10 ശതമാനം ഇൻസ്റ്റന്റ് ഡിസ്കൗണ്ട് ഉൾപ്പെടുന്ന വിലയാണിത്. കാർഡുകൾക്കും ഇഎംഐ രീതികൾക്കും അനുസരിച്ച് ഡിസ്കൗണ്ട് തുകയിൽ വ്യത്യാസമുണ്ടാകാം എന്നതിനാൽ ഫ്ലിപ്പ്കാർട്ടിന്റെ പേയ്‌മെന്റ് പേജ് കണ്ട് ഉറപ്പുവരുത്തുക.

റിയൽമി P4s 5G vs ഇൻഫിനിക്സ് നോട്ട് എഡ്ജ്: ഡിസ്‌പ്ലേ, ബാറ്ററി, ചാർജിംഗ്

144Hz റിഫ്രഷ് റേറ്റുള്ള 6.78 ഇഞ്ച് 1.5K സാംസങ് M14 അമോലെഡ് പാനലാണ് റിയൽമി P4s 5G വാഗ്ദാനം ചെയ്യുന്നത്. കൂടെ ഭീമൻ 8,000mAh ബാറ്ററിയും 80W ഫാസ്റ്റ് ചാർജിംഗുമുണ്ട്. എന്നാൽ ഇൻഫിനിക്സ് നോട്ട് എഡ്ജിലേക്ക് വരുമ്പോൾ 120Hz റിഫ്രഷ് റേറ്റുള്ള 1.5K കേർവ്ഡ് അമോലെഡ് ഡിസ്‌പ്ലേയാണ് കാണാനാവുക. കേവലം 7.2mm കനവും 185–190 ഗ്രാം ഭാരവുമുള്ള സ്ലിം ഡിസൈനാണ് ഇതിന്റെ പ്രത്യേകത. 6,500mAh ബാറ്ററിയും 45W ചാർജിംഗ് സപ്പോർട്ടുമാണ് ഈ ഫോണിലുള്ളത്.

റിയൽമി P4s 5G vs ഇൻഫിനിക്സ് നോട്ട് എഡ്ജ്: ക്യാമറ, സോഫ്റ്റ്‌വെയർ, അപ്‌ഡേറ്റുകൾ

ക്യാമറ പ്രകടനത്തിൽ കൂടുതൽ വിശ്വസിക്കാവുന്നത് റിയൽമി P4s തന്നെയാണ്; ഉപയോഗപ്രദമായ നൈറ്റ് മോഡാണ് ഇതിലുള്ളത്. എന്നാൽ നോട്ട് എഡ്ജിലെ സിംഗിൾ 50MP ക്യാമറയിൽ കുറഞ്ഞ വെളിച്ചത്തിലുള്ള ഫോട്ടോ പ്രോസസ്സിംഗിന് ചെറിയ ലാഗ് നേരിട്ടേക്കാം. 3 ആൻഡ്രോയിഡ് വേർഷൻ അപ്‌ഡേറ്റുകളും 4 വർഷത്തെ സെക്യൂരിറ്റി അപ്‌ഡേറ്റുകളുമാണ് റിയൽമി നൽകുന്നത്. ഇൻഫിനിക്സ് നോട്ട് എഡ്ജിന് 3 ആൻഡ്രോയിഡ് വേർഷനുകളും 5 വർഷത്തെ സെക്യൂരിറ്റി പാച്ചുകളും ലഭിക്കും.

റിയൽമി P4s 5G vs ഇൻഫിനിക്സ് നോട്ട് എഡ്ജ്: ഏതാണ് തിരഞ്ഞെടുക്കേണ്ടത്?

ദീർഘനേരം നിലനിൽക്കുന്ന ബാറ്ററി ലൈഫും വേഗതയേറിയ ചാർജിംഗുമാണ് നിങ്ങളുടെ മുൻഗണനയെങ്കിൽ ധൈര്യമായി റിയൽമി P4s തിരഞ്ഞെടൂ. എന്നാൽ സ്ലിം ഡിസൈൻ, കുറഞ്ഞ വില, JBL ട്യൂൺ ചെയ്ത മികച്ച ശബ്ദ അനുഭവം എന്നിവയാണ് ആഗ്രഹിക്കുന്നതെങ്കിൽ ഇൻഫിനിക്സ് നോട്ട് എഡ്ജാണ് അനിയോജ്യം. റിയൽമിയുടെ പിക്കപ്പ് സേവനങ്ങൾ വാങ്ങൽ എളുപ്പമാക്കുമ്പോൾ, 1,100-ലധികം സർവീസ് സെന്ററുകളും ഒരു വർഷത്തെ വാറന്റിയുമാണ് ഇൻഫിനിക്സ് നൽകുന്നത്. ഇൻഫിനിക്സിന്റെ XOS-ൽ അനാവശ്യ ആപ്പുകൾ (Bloatware) ഉണ്ടായേക്കാം, എന്നാൽ റിയൽമി UI-ൽ പരസ്യങ്ങളും ശുപാർശകളും ഡിസേബിൾ ചെയ്യാൻ ഓപ്ഷനുണ്ട്.