റിയൽമി സ്മാർട്ട് ടിവിയോടപ്പം റിയൽമി എക്‌സ് 7 മാക്‌സ് 5 ജിയും അവതരിപ്പിച്ചേക്കും: വിലയും, സവിശേഷതകളും

റിയൽമി എക്‌സ് 7 മാക്‌സ് 5 ജി ഉടൻ തന്നെ ഇന്ത്യയിൽ വിപണിയിലെത്തും

കമ്പനിയുടെ മൂന്നാം വർഷ വാർഷികത്തോടനുബന്ധിച്ച് ആയിരിക്കും ഈ ലോഞ്ച് ഇവന്റ് നടത്തുന്നത്. ഈ പുതിയ റിയൽമി സ്മാർട്ട്‌ഫോണിനുപുറമെ കമ്പനി ഒരു പുതിയ സ്മാർട്ട് ടിവിയും പുറത്തിറക്കും. അത് "ഹാൻഡ്‌സ് ഫ്രീ വോയ്‌സ് കൺട്രോൾ, ഡോൾബി വിഷൻ, ഓഡിയോ എക്സ്‌പീരിയൻസ് എന്നിവ ഉപയോഗിച്ച് നിങ്ങൾക്ക് ഏറ്റവും മികച്ച സിനിമാ എക്സ്‌പീരിയൻസ് നൽകുമെന്ന് പറയുന്നു. എന്നാൽ, ഈ സ്മാർട്ഫോണിനെ കുറിച്ചുള്ള കൂടുതൽ വിശദാംശങ്ങൾ ഇതുവരെ കമ്പനി വ്യക്തമാക്കിയിട്ടില്ല.

റിയൽമി എക്‌സ് 7 മാക്‌സ് 5 ജിയുടെ വിലയും, സവിശേഷതകളും

കമ്പനിയുടെ എക്‌സ് 7 സീരീസിൻറെ ഭാഗമാകുന്ന റിയൽമി എക്‌സ് 7 മാക്‌സ് 5 ജി അടുത്തിടെ ചൈനയിൽ അവതരിപ്പിച്ച റിയൽമി ജിടി നിയോയുടെ റീബ്രാൻഡഡ്‌ വേർഷനായിരിക്കുമെന്ന് പറയുന്നു. ഇത് ശരിയാണെങ്കിൽ ഈ സ്മാർട്ട്‌ഫോണിന് 120 ഹെർട്സ് റിഫ്രഷ് റേറ്റുള്ള 6.43 ഇഞ്ച് ഫുൾ എച്ച്ഡി + സാംസങ് സൂപ്പർ അമോലെഡ് ഡിസ്‌പ്ലേ ലഭിക്കും. നേരത്തെ സ്ഥിരീകരിച്ചതുപോലെ, ജിടി നിയോയ്ക്ക് കരുത്തേകുന്ന അതേ ചിപ്പ് മീഡിയടെക് ഡൈമെൻസിറ്റി 1200 SoC പ്രോസസറാണ് ഇതിലും നൽകിയിരിക്കുന്നത്. 12 ജിബി വരെ റാമും 256 ജിബി വരെ സ്റ്റോറേജുമായാണ് ഈ സ്മാർട്ട്ഫോൺ വരുന്നത്.

റിയൽമി എക്‌സ് 7 മാക്‌സ് 5 ജിക്ക് 64 മെഗാപിക്സൽ പ്രധാന ക്യാമറ, 8 മെഗാപിക്സൽ അൾട്രാ വൈഡ് ലെൻസ്, 2 മെഗാപിക്സൽ മാക്രോ ലെൻസ് എന്നിങ്ങനെ മൂന്ന് പിൻ ക്യാമറകൾ ലഭിക്കുമെന്ന് പ്രതീക്ഷിക്കാം. മാത്രവുമല്ല, 16 മെഗാപിക്സലിൻറെ മുൻ ക്യാമറയുണ്ട്. 50W ഫാസ്റ്റ് ചാർജിംഗ്, ആൻഡ്രോയിഡ് 11 അടിസ്ഥാനമാക്കിയുള്ള റിയൽമി യുഐ 2.0, വൈ-ഫൈ 6, ഡ്യുവൽ സ്റ്റീരിയോ സ്പീക്കറുകൾ, ഡോൾബി അറ്റ്‌മോസ് തുടങ്ങിയ ഫീച്ചറുകൾക്ക് പുറമെ, 4,500 എംഎച്ച് ബാറ്ററിയും ഹാൻഡ്‌സെറ്റിൽ ഉൾപ്പെടുത്തിയിട്ടുണ്ട്. റിയൽമി എക്‌സ് 7 മാക്‌സ് 5 ജി ഒരു മിഡ് റേഞ്ചറായിരിക്കുമെന്നും 30,000 രൂപയിൽ താഴെ വിലയുണ്ടാകുമെന്നും പറയുന്നു. അടുത്തിടെ ചൈനയിൽ പുറത്തിറക്കിയ റെഡ്മി കെ 40 ഗെയിം എൻഹാൻസ്ഡ് എഡിഷനുമായി ഇത് വിപണിയിൽ മത്സരിച്ചേക്കും.