റെഡ്മി 10 സ്മാർട്ട്ഫോൺ മാർച്ച് 17ന് ഇന്ത്യയിൽ ലോഞ്ച് ചെയ്യും, അറിയേണ്ടതെല്ലാം

50 മെഗാ പിക്സൽ പ്രൈമറി സെൻസറോട് കൂടിയ ഡ്യുവൽ റിയർ ക്യാമറ സജ്ജീകരണം, വാട്ടർ ഡ്രോപ്പ് സ്റ്റൈൽ നോച്ച് ഡിസ്‌പ്ലെ, മുൻ തലമുറയേക്കാൾ രണ്ട് മടങ്ങ് വേഗതയുള്ള ക്വാൽകോം സ്‌നാപ്ഡ്രാഗൺ ചിപ്പ്സെറ്റ് എന്നിവയാണ് ടീസറുകൾ വെളിപ്പെടുത്തിയ റെഡ്മി 10 സ്മാർട്ട്ഫോണിന്റെ ഫീച്ചറുകൾ. ഔദ്യോഗിക വെബ്സെറ്റിലെ ലോഞ്ച് മെക്രോ സൈറ്റിലും ട്വിറ്റർ ഹാൻഡിലും വഴിയാണ് റെഡ്മി ഈ വിവരങ്ങൾ സ്ഥിരീകരിച്ചത്. വരും ദിവസങ്ങളിലും റെഡ്മി 10 സ്മാർട്ട്ഫോണിന്റെ കൂടുതൽ ഫീച്ചറുകൾ റെഡ്മി പുറത്ത് വിടാൻ തന്നെയാണ് സാധ്യത. കൂടുതൽ വിവരങ്ങൾ അറിയാൻ തുട‍‍‍ർന്ന് വായിക്കുക.

കഴിഞ്ഞ മാസം ആഗോള തലത്തിൽ റെഡ്മി 10 2022 മോഡൽ സ്മാർട്ട്ഫോൺ ലോഞ്ച് ആയിരുന്നു. റെഡ്മി 10ന്റെ ആദ്യ മോഡലിന്റെ പരിഷ്കരിച്ച മോഡലായിരുന്നു ഇത്. ഈ മോഡലിനെക്കാളും ഒട്ടേറെ മാറ്റങ്ങളും ആയിട്ടായിരിക്കും റെഡ്മി 10 സ്മാർട്ട്ഫോൺ ഇന്ത്യൻ വിപണിയിൽ എത്തുക. ഡിസ്പ്ലെ, റിയർ ക്യാമറ സെറ്റപ്പ്, ഡിസൈൻ എന്നിങ്ങനെ നിരവധി മാറ്റങ്ങളുമായിട്ടാണ് റെഡ്മി 10 സ്മാർട്ട്ഫോൺ ഇന്ത്യൻ വിപണിയിൽ എത്തുന്നത്. ഔദ്യോഗിക ടീസറുകളും വെബ്സൈറ്റുകളും എല്ലാം ഇത് ഉറപ്പ് നൽകുന്നുമുണ്ട്.

റെഡ്മി 10 വില പ്രതീക്ഷകൾ

2020 ഓഗസ്റ്റിൽ രാജ്യത്ത് അരങ്ങേറ്റം കുറിച്ച റെഡ്മി 9 സ്മാർട്ട്ഫോണിന്റെ അതേ ലൈനിൽ തന്നെയായിരിക്കും ഇന്ത്യയിലെ റെഡ്മി 10 സ്മാർട്ട്ഫോണിന്റെ വിലയും പ്രതീക്ഷിക്കുന്നത്. 8,999 രൂപ വിലയിലാണ് റെഡ്മി 9 സ്മാർട്ട്ഫോൺ ഇന്ത്യയിൽ വിറ്റഴിക്കാൻ തുടങ്ങിയത്. സെപ്റ്റംബറിൽ ലോഞ്ച് ചെയ്ത റെഡ്മി 10 പ്രൈമിനേക്കാൾ കുറഞ്ഞ വിലയിലായിരിക്കും റെഡ്മി 10 സ്മാർട്ട്ഫോൺ ഇന്ത്യയിൽ എത്തുക. 12,499 രൂപയ്ക്കാണ് റെഡ്മി 10 പ്രൈം വിപണിയിൽ എത്തിയത്.

റെഡ്മി 10 സ്പെസിഫിക്കേഷനുകൾ

ഇന്ത്യയിൽ ലോഞ്ച് ആകുന്ന റെഡ്മി 10 സ്മാർട്ട്ഫോണിൽ വാട്ടർഡ്രോപ്പ് സ്റ്റൈൽ ഡിസ്പ്ലേ നോച്ച് നൽകിയിരിക്കുന്നു. ലോഞ്ച് ടീസറുകൾ, മൈക്രോ സൈറ്റ് എന്നിവയിൽ എല്ലാം ഇത് പ്രകടവും ആണ്. ആഗോള തലത്തിൽ പുറത്തിറങ്ങിയ റെഡ്മി 10, റെഡ്മി 10 2022 മോഡലുകളിൽ നിന്നും തീർത്തും വ്യത്യസ്തമാണ് ഇത്. ഈ രണ്ട് ഡിവൈസുകൾക്കും ഹോൾ പഞ്ച് ഡിസ്പ്ലെ ആണ് കമ്പനി നൽകിയിരുന്നത്.

അതേ പോലെ തന്നെ പ്രോസസറിന്റെ കാര്യത്തിലും റെഡ്മി 10 സ്മാർട്ട്ഫോണിന്റെ ഇന്ത്യ - ആഗോള മോഡലുകൾ തമ്മിൽ വ്യത്യാസം ഉണ്ട്. ആഗോള തലത്തിൽ പുറത്തിറങ്ങിയ റെഡ്മി 10, റെഡ്മി 10 2022 മോഡലുകളിൽ മീഡിയടെക് ഹീലിയോ ജി88 ചിപ്പ്സെറ്റ് ആണ് നൽകിയിരിക്കുന്നത്. അതേ സമയം ഇന്ത്യയിൽ പുറത്തിറങ്ങുന്ന റെഡ്മി 10 സ്മാർട്ട്ഫോണിൽ 6 നാനോമീറ്റർ സ്‌നാപ്ഡ്രാഗൺ എസ്ഒസി ഉള്ളതായും ടീസറുകൾ സൂചിപ്പിക്കുന്നു.

ഇന്ത്യയിൽ പുറത്തിറങ്ങുന്ന റെഡ്മി 10 സ്മാർട്ട്ഫോണിൽ 50 മെഗാപിക്സൽ പ്രൈമറി സെൻസറോട് കൂടിയ ഡ്യുവൽ റിയർ ക്യാമറ സജ്ജീകരണവും ഉണ്ടെന്ന് ടീസറുകൾ വ്യക്തമാക്കിയിട്ടുണ്ട്. ആഗോള വിപണിയിൽ റെഡ്മി 10, റെഡ്മി 10 2022 എന്നിവ ക്വാഡ് റിയർ ക്യാമറ സജ്ജീകരണത്തോടെയാണ് വന്നത്. അതേ സമയം റെഡ്മി 10 സ്മാർട്ട്ഫോണിന്റെ എല്ലാ മോഡലുകളിലും 50 മെഗാപിക്സൽ പ്രൈമറി ക്യാമറകളാണ് നൽകിയിരിക്കുന്നത്.

മൈക്രോസൈറ്റ്

കൂടാതെ, റെഡ്മി 10 സ്മാർട്ട്ഫോണിന്റെ ഇന്ത്യൻ വേരിയന്റിന്റെ ഫിനിഷും ആഗോള വിപണിയിൽ അവതരിപ്പിച്ചതിൽ നിന്ന് വ്യത്യസ്തമാണ്. ടെക്‌സ്‌ചർ ചെയ്‌ത രൂപകൽപ്പനയോടെയുള്ള സ്‌മഡ്ജ് ഫ്രീ ഫിനിഷാണ് ഇന്ത്യയിൽ എത്തുന്ന റെഡ്മി 10 സ്മാർട്ട്ഫോണിന് ഉള്ളതെന്നും മൈക്രോസൈറ്റ് വ്യക്തമാക്കുന്നു. ഇന്ത്യയിൽ പുറത്തിറങ്ങുന്ന റെഡ്മി 10 സ്മാർട്ട്ഫോണിന്റെ ഏതാനും ചില സവിശേഷതകൾ കൂടി മൈക്രോസൈറ്റിൽ ടീസ് ചെയ്തിട്ടുണ്ട്. "അൾട്രാ ഫാസ്റ്റ്" സ്റ്റോറേജ്, "വലിയ" ബാറ്ററി, "ഫാസ്റ്റ് ചാർജിങ്" സപ്പോർട്ട് എന്നിവയാണ് അത്. ഫോണിന് "ഗ്രാൻഡ്" ഡിസ്‌പ്ലേ ഉണ്ടെന്നും മൈക്രോസൈറ്റിലൂടെ ടീസ് ചെയ്യപ്പെടുന്നു.

റെഡ്മി 10 സ്മാർട്ട്ഫോണിന്റെ റിയർ പാനലിൽ ഫിംഗർപ്രിന്റ് സെൻസർ ഉള്ളതായും മനസിലാക്കാൻ കഴിയുന്നു. ആഗോള തലത്തിൽ പുറത്തിറങ്ങിയ റെഡ്മി 10, റെഡ്മി 10 2022 എന്നിവ സൈഡ് മൗണ്ടഡ് ഫിംഗർപ്രിന്റ് സെൻസർ ഓഫർ ചെയ്യുന്നത്. താങ്ങാൻ ആകുന്ന ബജറ്റിൽ ഏറെ ഫീച്ചറുകളുമായി എത്തുന്ന സ്മാർട്ട്ഫോണുകളിൽ ഒന്നായിരിക്കും റെഡ്മി 10 സ്മാർട്ട്ഫോൺ എന്നാണ് റിപ്പോർട്ടുകൾ പറയുന്നത്. റെഡ്മി 10 സ്മാർട്ട്ഫോണിന്റെ കൂടുതൽ വിശദാംശങ്ങൾ വരും ദിവസങ്ങളിൽ ടീസ് ചെയ്യപ്പെടും. റെഡ്മി ഇന്ത്യ വെബ്സൈറ്റിൽ നിന്നുള്ള മൈക്രോസൈറ്റ്, കമ്പനിയുടെ ഔദ്യോഗിക ടീസർ പേജ് എന്നിവിടങ്ങളിൽ എല്ലാം ലോഞ്ച് ഇവന്റ് കാണാൻ കഴിയും.