പ്രണയകഥ പാടി വന്ന തെന്നൽ! റെഡ്മി എ3 ഇന്ത്യയിൽ ലോഞ്ച് ചെയ്തു, 6999 രൂപയ്ക്ക് വാങ്ങാം

വാല​ന്റൈൻസ് ദിനത്തിൽ ഇന്ത്യയിൽ പുതിയ സ്മാർട്ട്ഫോൺ അ‌വതരിപ്പിച്ച് റെഡ്മി. സാധാരണക്കാർക്ക് താങ്ങാനാകുന്ന നിരക്കിൽ ലഭ്യമാകുന്ന മികച്ച സ്മാർട്ട്ഫോൺ ഓപ്ഷൻ എന്ന നിലയിൽ പുതിയ റെഡ്മി എ3 (Redmi A3) ആണ് ലോഞ്ച് ചെയ്തിരിക്കുന്നത്. ഫെബ്രുവരി 23 മുതൽ ഫ്ലിപ്പ്കാർട്ട് വഴി ഈ സ്മാർട്ട്ഫോണിന്റെ വിൽപ്പന ആരംഭിക്കും.

കുറഞ്ഞ വിലയിലാണ് എത്തുന്നത് എങ്കിലും ഡി​സൈനിന്റെ കാര്യത്തിൽ റെഡ്മി എ3 ഒരു വിട്ടുവീഴ്ചയും വരുത്തിയിട്ടില്ല. അ‌തിനാൽത്തന്നെ ആകർഷകമായ ലുക്കിലാണ് റെഡ്മി എ3 ലോഞ്ച് ചെയ്തിരിക്കുന്നത്. റെഡ്മി എ3 സ്മാർട്ട്ഫോണിന്റെ ഫ്രണ്ടിൽ ഒരു വാട്ടർഡ്രോപ്പ് നോച്ചും സെൽഫി ഷൂട്ടറും വലിപ്പമുള്ള ബെസലുകളും ഉണ്ട്.

പ്രീമിയം ഹാലോ ഡി​സൈനാണ് റെഡ്മി എ3യിലുള്ളത്. അടുത്തിടെ ലോഞ്ച് ചെയ്ത റിയൽമി 12 പ്രോ സീരീസിനോട് സാമ്യമുള്ള വലിയ ക്യാമറ മൊഡ്യൂൾ ആണ് റെഡ്മി എ3യുടെ മറ്റൊരു പ്രത്യേകത. മിഡ്​നൈറ്റ് ബ്ലാക്ക്, ഒലിവ് ഗ്രീൻ, ലേക്ക് ബ്ലൂ എന്നിങ്ങനെ ആകർഷകമായ മൂന്ന് നിറങ്ങളിൽ ഈ ബജറ്റ് സ്മാർട്ട്ഫോൺ ലഭ്യമാകും.

റെഡ്മി എ3യുടെ പ്രധാന ഫീച്ചറുകൾ: 6.71 ഇഞ്ച് HD+ LCD ഡിസ്‌പ്ലേ, 1,600×720 പിക്‌സൽ റെസല്യൂഷൻ, 90Hz റിഫ്രഷ് റേറ്റ്, 400 നിറ്റ്സ് പീക്ക് ​ബ്രൈറ്റ്നസ്, മുകളിൽ ഗൊറില്ല ഗ്ലാസ് 3 സംരക്ഷണം എന്നിവ ഇതിൽ ഉണ്ട്. ഒക്ടാകോർ ഹീലിയോ G36ചിപ്സെറ്റാണ് ഈ സ്മാർട്ട്ഫോണിന് കരുത്തു പകരുന്നത്.

6 GB വരെ LPDDR4X റാമും 6 GB വെർച്വൽ മെമ്മറിയും 128GB വരെ eMMC 5.1 സ്റ്റോറേജും ഈ ബജറ്റ് ഫോണിൽ നൽകിയിരിക്കുന്നു. ആൻഡ്രോയിഡ് 13 ഒഎസ് അ‌ടിസ്ഥാനമാക്കിയാണ് റെഡ്മി എ3 പ്രവർത്തിക്കുക. ഡ്യുവൽ റിയർ ക്യാമറ സജ്ജീകരണമാണ് ഈ ഫോണിൽ നൽകിയിരിക്കുന്നത്.

ബജറ്റ് സ്മാർട്ട്ഫോൺ ആയതിനാൽ തന്നെ, എഐ പിന്തുണയുള്ള 8 എംപി ഡ്യുവൽ റിയർ ക്യാമറ സജ്ജീകരണമാണ് റെഡ്മി ഇതിൽ നൽകിയിരിക്കുന്നത്. ഇതിലെ ഫ്രണ്ട് ക്യാമറ 5 എംപിയുടേത് ആണ്. 10W USB-C ചാർജിംഗ് പിന്തുണയുള്ള 5000mAh ബാറ്ററിയാണ് റെഡ്മി എ3യിൽ ഉള്ളത്.

മണിക്കൂറുകളോളം വീഡിയോകളും മറ്റും ആസ്വദിക്കാൻ ഇതിലെ 5000 mAh ബാറ്ററി പര്യാപ്തമാണ് എന്നാണ് കമ്പനി പറയുന്നത്. സുരക്ഷയ്ക്കായി ഇതിൽ സൈഡ്-മൗണ്ട് ചെയ്ത ഫിംഗർപ്രിൻ്റ് സ്കാനർ നൽകിയിരിക്കുന്നു. 3.5 എംഎം ഓഡിയോ ജാക്ക്, എഫ്എം റേഡിയോ പോലുള്ള ഫീച്ചറുകളും റെഡ്മി എ3യിൽ ഉണ്ട്.

4G VoLTE, ​വൈ​ഫൈ 802.11 b/g/n, ബ്ലൂടൂത്ത് 5.0, GPS + GLONASS, യുഎസ്ബി ​​ടൈപ്പ്- C പോർട്ട് എന്നിവയാണിതിലെ പ്രധാന കണക്ടിവിറ്റി ഫീച്ചറുകൾ. അ‌തിനാൽ 5ജി സ്മാർട്ട്ഫോൺ എടുക്കാൻ ആഗ്രഹിക്കുന്നവർ അ‌ൽപ്പം നിരാശപ്പെടേണ്ടിവരും. എന്നാൽ സാധാരണ ആവശ്യങ്ങൾക്കായി കുറഞ്ഞ വിലയിൽ ഒരു സ്മാർട്ട്ഫോൺ മതി എന്നുള്ളവർക്ക് റെഡ്മി എ3 മികച്ച ഓപ്ഷനായി മാറും.

റെഡ്മി എ3 വിലയും ലഭ്യതയും: ഫ്ലിപ്പ്കാർട്ട്, Mi.com, എംഐ ഹോം സ്റ്റോറുകൾ, റീട്ടെയിൽ സ്റ്റോറുകൾ എന്നിവ വഴി ഫെബ്രുവരി 23 മുതൽ ഈ ബജറ്റ് സ്മാർട്ട്ഫോൺ ലഭ്യമാകും. റെഡ്മി എ3യുടെ 3GB റാം + 64GB ഇ​ന്റേണൽ സ്റ്റോറേജ് എന്നിവയുള്ള പ്രാരംഭ വേരിയന്റ് 7,299 രൂപ വിലയിലാണ് ലോഞ്ച് ചെയ്തിരിക്കുന്നത്.

അ‌തേസമയം റെഡ്മി എ3 4GB + 128GB വേരിയന്റ് 8,299 രൂപയ്ക്കും ടോപ്പ് എൻഡ് 6GB + 128GB വേരിയന്റ് 9,299 രൂപയ്ക്കും ലോഞ്ച് ചെയ്തിരിക്കുന്നു. എന്നാൽ ലോഞ്ച് ഓഫറായി ബാങ്ക് ഡിസ്കൗണ്ടുകളും മറ്റും ലഭ്യമാക്കിയിരിക്കുന്നതിനാൽ റെഡ്മി എ3 സ്മാർട്ട്ഫോൺ 6999 രൂപ മുതൽ വിലയിൽ വാങ്ങാൻ സാധിക്കും.