10,000mAh ബാറ്ററി കരുത്തിൽ റെഡ്മി K100; 165Hz ഡിസ്‌പ്ലേയുമായി ഗെയിമിംഗ് ലോകം പിടിച്ചടക്കാൻ വരുന്നു!

റെഡ്മി തങ്ങളുടെ ഏറ്റവും പുതിയ 'കെ100' (K100) സ്മാർട്ട്‌ഫോണിന്റെ പ്രധാന സവിശേഷതകൾ പുറത്തുവിട്ടു. വമ്പൻ 10,000mAh ബാറ്ററിയും 165Hz റിഫ്രഷ് റേറ്റുള്ള 6.83 ഇഞ്ച് അമോലെഡ് ഡിസ്‌പ്ലേയുമാണ് ഈ ഫോണിന്റെ പ്രധാന ആകർഷണം. ഒക്ടോബർ 28-നാണ് ചൈനയിലെ ലോഞ്ച്. ഇതൊരു ഗെയിമിംഗ് കേന്ദ്രീകൃത ഫ്ലാഗ്ഷിപ്പ് ഫോണായിരിക്കും എന്നാണ് സൂചനകൾ. ഇന്ത്യയിൽ ഈ മോഡൽ പോക്കോ ബ്രാൻഡിൽ എത്തുുമോ എന്നും ഇതിന്റെ വില എത്രയാകുമെന്നുമാണ് ടെക് പ്രേമികൾ ഉറ്റുനോക്കുന്നത്.

ലോഞ്ച് തീയതിയുടെ കാര്യത്തിൽ ഒരു പ്രധാന മാറ്റമുണ്ട്. നേരത്തെ ഒക്ടോബർ 27 എന്നായിരുന്നു ചില മാധ്യമങ്ങൾ റിപ്പോർട്ട് ചെയ്തിരുന്നതെങ്കിലും, ഒക്ടോബർ 28-നാണ് ലോഞ്ചെന്ന് റെഡ്മിയുടെ ഏറ്റവും പുതിയ വെയ്ബോ പോസ്റ്റിൽ വ്യക്തമാക്കുന്നു. സ്നാപ്ഡ്രാഗൺ 8 എലൈറ്റ് ചിപ്‌സെറ്റും ഡി2 ഡിസ്‌പ്ലേ പ്രൊസസറുമാണ് ഫോണിലുള്ളത്. നാൽപ്പതിലേറെ ഗെയിമുകളിൽ 165Hz സപ്പോർട്ട് ലഭിക്കും. ഹൈപ്പർഓഎസ് 4-ലാണ് ഫോൺ പ്രവർത്തിക്കുന്നത്. ഫോണിനൊപ്പം ക്ലിപ്പ് നിയോ ഇയർബഡ്സുകളും റെഡ്മി അവതരിപ്പിക്കും.

റെഡ്മി K100: 10,000mAh ബാറ്ററിയും 165Hz ഡിസ്‌പ്ലേയും; അറിയേണ്ട കാര്യങ്ങൾ

ബാറ്ററി, ഡിസ്‌പ്ലേ, ചിപ്‌സെറ്റ് വിവരങ്ങൾ മാത്രമാണ് കമ്പനി തൽക്കാലം ഔദ്യോഗികമായി സ്ഥിരീകരിച്ചിട്ടുള്ളത്. എന്നാൽ ഗീക്ക്ബെഞ്ച് ലിസ്റ്റിംഗ് അനുസരിച്ച് 16GB റാമോടെയെത്തുന്ന ഫോൺ, സിംഗിൾ കോറിൽ 2,705-ഉം മൾട്ടി കോറിൽ 9,885-ഉം സ്കോറുകൾ നേടിയിട്ടുണ്ട്. ചൈനയിലെ 3C സർട്ടിഫിക്കേഷൻ പ്രകാരം 100W ഫാസ്റ്റ് ചാർജിംഗും ഇതിൽ പ്രതീക്ഷിക്കാം. എന്നാൽ ഫോണിന്റെ കനം, ഭാരം, ഓഡിയോ ഫീച്ചറുകൾ എന്നിവ ടിസറുകളിൽ വ്യക്തമാക്കിയിട്ടില്ല. ആൻഡ്രോയിഡ് പതിപ്പിനെക്കുറിച്ച് വ്യക്തതയില്ലെങ്കിലും ഹൈപ്പർഓഎസ് 4 ആയിരിക്കും സോഫ്റ്റ്‌വെയർ.

ഇന്ത്യയിലേക്ക് പോക്കോ ആയി എത്തുമ്പോൾ: കണക്കുകൂട്ടലുകളും എതിരാളികളും വിലയും

ഇന്ത്യൻ ഉപഭോക്താക്കൾക്ക് ഈ വാർത്ത പ്രാധാന്യമുള്ളതാണ്. റെഡ്മിയുടെ K-സീരീസ് ഫോണുകൾ പലപ്പോഴും പോക്കോ ബ്രാൻഡിലാണ് ഇന്ത്യയിൽ എത്താറുള്ളത്. ചൈനീസ് മോഡലിന് സമാനമായ ബിഐഎസ് (BIS) ലിസ്റ്റിംഗുകളും കോഡ് നാമങ്ങളുമാണ് ഇനി ശ്രദ്ധിക്കേണ്ടത്. ചൈനീസ് സർട്ടിഫിക്കേഷനുകളിൽ M786BC എന്ന മോഡൽ കോഡാണ് കാണുന്നത്. എന്നാൽ ഇന്ത്യയിലെ BIS വെബ്‌സൈറ്റിൽ ഇത് ഇതുവരെ പ്രത്യക്ഷപ്പെടാത്തതിനാൽ, ഇന്ത്യയിലെ ലോഞ്ച് തീയതി സ്ഥിരീകരിച്ചിട്ടില്ല.

പോക്കോയുടെ തന്ത്രത്തെ ആശ്രയിച്ചായിരിക്കും ഇന്ത്യയിലെ ഇതിന്റെ വില. മികച്ച ബാറ്ററിയും ഡിസ്‌പ്ലേയും നൽകി F-സീരീസിലാണ് ഇതെയെത്തുന്നതെങ്കിൽ ₹40,000 മുതൽ ₹55,000 വരെയുള്ള നിരക്കിൽ ഫോൺ പ്രതീക്ഷിക്കാം. ഐകൂ 16 (iQOO 16), പുറത്തിറങ്ങാൻ സാധ്യതയുള്ള വൺപ്ലസ് 16ആർ (OnePlus 16R), റിയൽമി ജിടി സീരീസ് എന്നിവയായിരിക്കും ഇതിന്റെ പ്രധാന എതിരാളികൾ. പ്രീമിയം മിഡ്-റേഞ്ച് വിഭാഗത്തിൽ ഹൈ-റിഫ്രഷ് റേറ്റ് ഡിസ്‌പ്ലേയും മികച്ച പെർഫോമൻസുമായി കടുത്ത മത്സരമാണ് ഈ ബ്രാൻഡുകൾ നടത്തുന്നത്.