പാവങ്ങളെ അ‌ത്ര പെട്ടെന്നൊന്നും റെഡ്മി ​കൈവിടില്ല, പുതിയ റെഡ്മി നോട്ട് 13R ​ലോഞ്ച് ചെയ്തു

വിപണിയിൽ ബജറ്റ് സ്മാർട്ട്ഫോണുകളുടെ വംശം അ‌വസാനിക്കുന്നില്ല, പ്രമുഖ ബ്രാൻഡുകളെല്ലാം ഓരോ മാസവും പുതിയ പുതിയ ബജറ്റ് സ്മാർട്ട്ഫോണുകൾ അ‌വതരിപ്പിച്ചുകൊണ്ടിരിക്കുന്നു. പ്രമുഖ ​ചൈനീസ് സ്മാർട്ട്ഫോൺ ബ്രാൻഡായ ഷവോമിയും ആ പാത പിന്തുടർന്നതോടെ നോട്ട് 12Rൻ്റെ പിൻഗാമിയായി പുതിയ റെഡ്മി നോട്ട് 13R ​ചൈനീസ് വിപണിയിൽ ലോഞ്ച് ചെയ്തു.

മികച്ച ഫീച്ചറുകൾ അ‌ടങ്ങുന്ന ഒരു ഇടത്തരം സ്മാർട്ട്ഫോൺ എന്ന് വേണമെങ്കിൽ റെഡ്മി നോട്ട് 13R (Redmi Note 13R) നെ വിശേഷിപ്പിക്കാം. എന്നാൽ നിലവിൽ ​ചൈനയിലാണ് ഈ ഫോൺ ലോഞ്ച് ചെയ്തിരിക്കുന്നത്. ഇതിന്റെ ഇന്ത്യൻ ലോഞ്ച് സംബന്ധിച്ച് ഈ ഘട്ടത്തിൽ കമ്പനി കാര്യമായ വിവരങ്ങളൊന്നും വെളിപ്പെടുത്തിയിട്ടില്ല.

ബജറ്റ് വിലയിലാണ് എത്തുന്നത് എങ്കിലും വളരെ ആകർഷകമായ ഡി​സൈനിലാണ് ഈ ഫോൺ ഒരുക്കിയിരിക്കുന്നത് എന്ന് ഷവോമി വിശദീകരിക്കുന്നു. ത്രീഡി വിഷ്വൽ ഇഫക്ടും സിൽക്കി ഗ്ലാസ് ഫീലും ഈ സ്മാർട്ട്ഫോണിനുണ്ട്. ബജറ്റ് വിലയിൽ എത്തുന്നതിനാലാകാം കാര്യമായ പ്രമോഷനുകളൊന്നും ഇല്ലാതെ വളരെ നിശബ്ദമായാണ് ഷവോമി ഈ റെഡ്മി നോട്ട് 13R അ‌വതരിപ്പിച്ചിരിക്കുന്നത്.

റെഡ്മി നോട്ട് 13R ​(Redmi Note 13R) ന്റെ പ്രധാന ഫീച്ചറുകൾ: 6.79 ഇഞ്ച് FHD+ (2460 x 1080 പിക്സലുകൾ) FHD+ LCD സ്ക്രീൻ ആണ് ഇതിലുള്ളത്. 30/48/50/60/90/120Hz എന്നിങ്ങനെ അഡാപ്റ്റീവ് റിഫ്രഷ് റേറ്റ്, 550 nits പീക്ക് ​ബ്രൈറ്റ്നസ് എന്നിവയും ഇതിലുണ്ട്.

അഡ്രിനോ 613 ജിപിയു ഉള്ള ഒക്ട കോർ സ്‌നാപ്ഡ്രാഗൺ 4 ജെൻ 2 അഡ്വാൻസ്ഡ് എഡിഷൻ 4എൻഎം മൊബൈൽ പ്ലാറ്റ്‌ഫോം ആണ് ഈ റെഡ്മി സ്മാർട്ട്ഫോണിന്റെ കരുത്ത്. പ്രോസസറിന് പിന്തുണയുമായി, 6GB / 8GB / 12GB LPDDR4X റാം, 128GB / 256GB / 512GB UFS 2.2 ഇൻ്റേണൽ സ്റ്റോറേജ് ഓപ്ഷനുകളുമുണ്ട്.

മൈക്രോ എസ്ഡി ഉപയോഗിച്ച് റെഡ്മി നോട്ട് 13R ലെ സ്റ്റോറേജ് 1TB വരെ വികസിപ്പിക്കാനാകും. ആൻഡ്രോയിഡ് 14 അ‌ടിസ്ഥാനമാക്കിയുള്ള ഷവോമി ​ഹൈപ്പർ ഒഎസിലാണ് ഈ ഫോണിന്റെ പ്രവർത്തനം. ഡ്യുവൽ സിം, സൈഡ് മൗണ്ടഡ് ഫിംഗർപ്രിൻ്റ് സെൻസർ, ഇൻഫ്രാറെഡ് സെൻസർ, 3.5എംഎം ഓഡിയോ ജാക്ക്, ഫയറിംഗ് ലൗഡ് സ്പീക്കർ ഫീച്ചറുകളും ഈ ബജറ്റ് ഫോണിലുണ്ട്.

ഡ്യുവൽ റിയർ ക്യാമറ സജ്ജീകരണമാണ് റെഡ്മി നോട്ട് 13Rൽ ഉള്ളത്. അ‌തിൽ f/1.8 അപ്പേർച്ചർ, 1/2.76″ സെൻസർ എന്നിവയുള്ള 50MP മെയിൻ ക്യാമറ, f/2.4 അപ്പേർച്ചറുള്ള 2MP മാക്രോ സെൻസർ, LED ഫ്ലാഷ് എന്നിവ ഉൾപ്പെടുന്നു. ഫ്രണ്ടിൽ 8എംപി സെൽഫി ക്യാമറയും ഉണ്ട്.

5G SA / NSA, ഡ്യുവൽ 4G VoLTE, ​വൈ​ഫൈ 6 802.11 ac (2.4GHz + 5GHz), ബ്ലൂടൂത്ത് 5.1, GPS + GLONASS, USB ടൈപ്പ്-സി എന്നിവയാണ് ഇതിലെ പ്രധാന കണക്ടിവിറ്റി ഫീച്ചറുകൾ. 18W ഫാസ്റ്റ് ചാർജിംഗുള്ള 5030mAh ബാറ്ററിയും റെഡ്മി നോട്ട് 13Rൽ ഉണ്ട്.

ഐസ് ക്രിസ്റ്റൽ ബ്ലൂ, സിൽവർ, മിഡ്‌നൈറ്റ് ബ്ലാക്ക് എന്നീ നിറങ്ങളിൽ ഈ ഫോൺ ലഭ്യമാകും. റെഡ്മി നോട്ട് 13Rന്റെ 6GB+128GB വേരിയന്റിന് ഔദ്യോഗിക വെബ്‌സൈറ്റിൽ 1399 യുവാൻ (ഏകദേശം 16,435 രൂപ) ആണ് വില. 12GB+512GB വേരിയന്റിന് 2199 യുവാൻ (ഏകദേശം 25,355രൂപ) ആണ് വില. എന്നാൽ വിൽപ്പനയ്ക്ക് എത്തുമ്പോൾ ഇവയുടെ വിലകുറയുമെന്നാണ് പറയപ്പെടുന്നത്.