മോശമാക്കിയില്ല! 7560mAh ബാറ്ററിയും 100W ഫാസ്റ്റ് ചാർജിങ്ങുമായി റെഡ്മി ടർബോ 5 ലോഞ്ച് ചെയ്തു

ഷവോമി തങ്ങളുടെ റെഡ്മി ടർബോ 5 സീരീസിൽ റെഡ്മി ടർബോ 5 മാക്സ് മോഡലിനൊപ്പം റെഡ്മി ടർബോ 5 (REDMI Turbo 5) ​ചൈനയിൽ ലോഞ്ച് ചെയ്തിരിക്കുന്നു. ഉപയോക്താക്കളെ അ‌തിവേഗം ആകർഷിക്കാൻ വലിയ ബാറ്ററി ശേഷിയോടെയാണ് ഇപ്പോൾ ബ്രാൻഡുകൾ സ്മാർട്ട്ഫോണുകൾ അ‌വതരിപ്പിക്കാറുള്ളത്. ഈ സീരീസിലെ തന്നെ റെഡ്മി ടർബോ 5 മാക്സ് മോഡൽ 9000mAh ബാറ്ററി സഹിതം ആണ് അ‌വതരിപ്പിക്കപ്പെട്ടത്. മാക്സ് മോഡലിനെക്കാൾ അ‌ൽപ്പം വില കുറഞ്ഞ മോഡലാണ് ​റെഡ്മി ടർബോ 5. മാക്സ് മോഡലിന്റെ അ‌ത്ര ബാറ്ററി ശേഷിയില്ലെങ്കിലും ടർബോ 5ലെ ബാറ്ററി ശേഷിയും മോശമല്ല.

100W ഫാസ്റ്റ് ചാർജിങ് സഹിതം 7560mAh ബാറ്ററി ശേഷി റെഡ്മി ടർബോ 5-ൽ ഉണ്ട്. 27W വയർഡ് റിവേഴ്സ് ചാർജിംഗിനെ പിന്തുണയും 100W PPS ഫാസ്റ്റ് ചാർജിംഗ് പ്രോട്ടോക്കോളും ഈ ടർബോ 5 ന്റെ ഫീച്ചറുകളിൽപ്പെടുന്നു. ഡൈമെൻസിറ്റി 8500-അൾട്രാ പ്രോസസർ കരുത്തിലാണ് ഈ സ്മാർട്ട്ഫോൺ എത്തിയിരിക്കുന്നത്.

ഫ്ലാഗ്ഷിപ്പ് മോഡലുകളുടെ അതേ 3D ഐസ്-സീൽഡ് സർക്കുലേറ്റിംഗ് കോൾഡ് പമ്പ് കൂളിംഗ് സിസ്റ്റവും ഇതിൽ ഉൾപ്പെടുന്നു. "ഇന്റഗ്രേറ്റഡ് CPU/GPU/DDR ഫ്രീക്വൻസി ട്യൂണിംഗ്" എന്ന് അവകാശപ്പെടുന്ന ഏറ്റവും പുതിയ "റാംപേജ് എഞ്ചിൻ" ഇതിൽ ഉൾപ്പെടുന്നു. മെറ്റൽ ഫ്രെയിമും ഗ്ലാസ് ബാക്ക് പാനലും റെഡ്മി ടർബോ 5ന് ഉണ്ട്.

പ്രധാന ഫീച്ചറുകൾ

120Hz റിഫ്രഷ് റേറ്റുള്ള 6.59-ഇഞ്ച് (2756 x 1268 പിക്സലുകൾ) 1.5K OLED ഡിസ്പ്ലേ, 2560Hz വരെ തൽക്ഷണ സാമ്പിൾ റേറ്റ്, ഡോൾബി വിഷൻ, 3840Hz ഹൈ-ഫ്രീക്വൻസി PWM ഡിമ്മിംഗ് + DC ഡിമ്മിംഗ്, 3500 nits വരെ പീക്ക് ബ്രൈറ്റ്നസ്, കോർണിംഗ് ഗൊറില്ല ഗ്ലാസ് 7i പ്രൊട്ടക്ഷൻ എന്നിവ ഇതിലുണ്ട്.

3.4GHz വരെ ഒക്ടാ-കോർ ഡൈമെൻസിറ്റി 8500-അൾട്രാ 4nm ചിപ്സെറ്റ് ആണ് ഈ ടർബോ 5ന്റെ കരുത്ത്. ആം മാലി G720 MC8 GPU, 12GB / 16GB LPDDR5X അൾട്രാ റാം, 256GB / 512GB UFS 4.1 സ്റ്റോറേജ് എന്നിവയും ഇതിലുണ്ട്. ആൻഡ്രോയിഡ് 16 അ‌ടിസ്ഥാനമാക്കിയുള്ള ഷവോമി ​ഹൈപ്പർഒഎസ്3-ൽ ആണ് പ്രവർത്തനം.

1/1.95″ IMX882 സെൻസറുള്ള 50MP മെയിൻ ക്യാമറ (OIS, EIS), 8MP അൾട്രാ-വൈഡ് ക്യാമറ (f/2.2 അപ്പേർച്ചർ), 4K 60fps വരെ വീഡിയോ റെക്കോർഡിംഗ് എന്നിവ അ‌ടങ്ങുന്ന ഡ്യുവൽ റിയർ ക്യാമറ സജ്ജീകരണവും സെൽഫിക്കും മറ്റുമായി OV20B സെൻസറുള്ള 20MP ഫ്രണ്ട് ക്യാമറയും (f/2.2 അപ്പേർച്ചർ), 1080p 60fps വരെ വീഡിയോ റെക്കോർഡിംഗ് സഹിതം ഇതിലുണ്ട്.

ഇൻ-ഡിസ്പ്ലേ ഒപ്റ്റിക്കൽ ഫിംഗർപ്രിന്റ് സെൻസർ, ഇൻഫ്രാറെഡ് സെൻസർ, USB ടൈപ്പ്-സി ഓഡിയോ, സ്റ്റീരിയോ സ്പീക്കറുകൾ, IP66+IP68+IP69+IP69K റേറ്റിങ്, ഡ്യുവൽ സിം (നാനോ + നാനോ), 5G SA / NSA, ഡ്യുവൽ 4G VoLTE, യുഎസ്ബി ടൈപ്പ്-സി, എൻ‌എഫ്‌സി, 7560mAh ബാറ്ററി, 100W ഫാസ്റ്റ് ചാർജിങ് എന്നിവയാണ് മറ്റ് പ്രധാന ഫീച്ചറുകൾ. 157.53 x 75.19 x 8.18mm വലിപ്പവും 204 ഗ്രാം ഭാരവും ഈ ഫോണിനുണ്ട്.

വില

റെഡ്മി ടർബോ 5 5ജിയുടെ 12GB+256GB വേരിയന്റിന് 1999 യുവാൻ (26,430 രൂപ), 16GB+256GB വേരിയന്റിന് 2299 യുവാൻ (ഏകദേശം 30,395 രൂപ), 12GB+512GB വേരിയന്റിന് 2299 യുവാൻ (ഏകദേശം 30,395 രൂപ), 16GB+512GB വേരിയന്റിന് 2599 യുവാൻ (ഏകദേശം 34,365 രൂപ) എന്നിങ്ങനെയാണ് വില. ഷാഡോ ബ്ലാക്ക്, ലൈറ്റ് സീ ഗ്രീൻ, ഓസ്പിഷ്യസ് ക്ലൗഡ് വൈറ്റ് കളർ ഓപ്ഷനുകളിൽ ഈ ഫോൺ എത്തിയിരിക്കുന്നു.