സാംസങ് ആരാധകർക്ക് ഹാപ്പി ന്യൂ ഇയർ! ഡൈമെൻസിറ്റി 6100+ ചിപ്സെറ്റുമായി ഗാലക്സി A15 5G ലോഞ്ച് ചെയ്തു

ഇന്ത്യയിലെ സാംസങ് ആരാധർക്ക് ക്രിസ്മസ്- ന്യൂഇയർ സമ്മാനമായി പുത്തൻ രണ്ട് 5ജി സ്മാർട്ട്ഫോണുകൾ പുറത്തിറക്കി സാംസങ്. ഗാലക്സി എ സീരീസിലെ പുത്തൻ കൂട്ടിച്ചേർക്കലായി സാംസങ് ഗാലക്സി എ15(A15 5G), ഗാലക്സി എ25 ( Galaxy A25 5G ) എന്നിവ ഔദ്യോഗികമായി ഇന്ത്യയിൽ ലോഞ്ച് ചെയ്തു.

ഇപ്പോൾ പുറത്തിറക്കിയ സാംസങ് ഗാലക്സി എ സീരീസ് ഫോണുകളിൽ ഗാലക്സി എ15 25000 രൂപയിൽ താഴെ വിലയിലും ഗാലക്സി എ25 25000- 30000 ​പ്രൈസ് റേഞ്ചിലും ആണ് അ‌വതരിപ്പിക്കപ്പെട്ടിരിക്കുന്നത്. രണ്ട് സ്റ്റോറേജ് വേരിയന്റുകളിൽ ആണ് ഗാലക്സി എ15 5ജി ഇന്ത്യയിൽ വിൽപ്പനയ്ക്ക് എത്തുന്നത്.

സാംസങ് ഗാലക്സി എ15 5ജിയുടെ 8GB റാം +128GB ഇന്റേണൽ സ്റ്റോറേജ് വേരിയന്റിന് 19,499 രൂപയും 8GB റാം +256GB ഇന്റേണൽ സ്റ്റോറേജ് വേരിയന്റിന് 22,499 രൂപയുമാണ് വില. ലൈറ്റ് ബ്ലൂ, ലൈറ്റ് ബ്ലാക്ക്, ബ്ലൂ കളർ ഓപ്ഷനുകളിൽ ഗാലക്സി എ15 5ജി വാങ്ങാൻ ലഭ്യമാകും.

എ15, എ25 എന്നീ രണ്ട് എ സീരീസ് സ്മാർട്ട്‌ഫോണുകളും കമ്പനിയുടെ ഔദ്യോഗിക വെബ്‌സൈറ്റ് വഴി വാങ്ങാം. അ‌തേസമയം, ഔദ്യോഗികമായി ലോഞ്ച് ചെയ്തെങ്കിലും ഈ ഫോണുകളുടെ വിൽപ്പന ആരംഭിക്കുന്ന തീയതി സാംസങ് പ്രഖ്യാപിച്ചിട്ടില്ല. വിൽപ്പന ആരംഭിക്കുന്ന സമയത്ത് പ്രത്യേകം ലോഞ്ച് ഓഫർ ലഭ്യമാകും. ആ സമയത്ത്, നിലവിൽ നിശ്ചയിച്ചിരിക്കുന്നതിനെക്കാൾ കുറഞ്ഞ വിലയിൽ ഈ സ്മാർട്ട്ഫോണുകൾ സ്വന്തമാക്കാം.

എസ്ബിഐ കാർഡ് ഉപയോഗിച്ച് ഈ സാംസങ് ഹാൻഡ്സെറ്റുകൾ വാങ്ങുന്ന ഉപഭോക്താക്കൾക്ക് 3,000 ഡിസ്കൗണ്ട് ലഭ്യമാകും എന്നാണ് വിവരം. അ‌തായത് ഈ ഓഫർ പ്രയോജനപ്പെടുത്തിയാൽ ഗാലക്സി എ15 5ജിയുടെ പ്രാരംഭ വേരിയന്റ് 16,499 രൂപയ്ക്കും ഉയർന്ന വേരിയന്റ് 19,499 രൂപയ്ക്കും ലഭ്യമാകും എന്നാണ് വിവരം.

സാംസങ് ഗാലക്സി എ15 5ജിയുടെ പ്രധാന ഫീച്ചറുകൾ: 6.5 ഇഞ്ച് FHD+ സൂപ്പർ അമോലെഡ് ഡിസ്‌പ്ലേ, ഇൻഫിനിറ്റി U ഡിസൈൻ, 90Hz റിഫ്രഷ് റേറ്റ്, 800 nits പീക്ക് ​ബ്രൈറ്റ്നസ് എന്നിവ ഇതിലുണ്ട്. മീഡിയടെക് ഡൈമെൻസിറ്റി 6100+ ചിപ്സെറ്റാണ് ഫോണിന്റെ കരുത്ത്. മാലി G57-MP2 ജിപിയുവുമുണ്ട്.

8GB വരെ റാമും 256GB ഇന്റേണൽ സ്റ്റോറേജുമായാണ് ഈ ഫോണെത്തുന്നത്. മൈക്രോ എസ്ഡി കാർഡ് ഉപയോഗിച്ച് സ്റ്റോറേജ് 1TB വരെ വികസിപ്പിക്കാം. ട്രിപ്പിൾ റിയർ ക്യാമറ സജ്ജീകരണമാണ് എ15യിലുള്ളത്. 50എംപി പ്രധാന ക്യാമറ, 5എംപി അൾട്രാവൈഡ് സെൻസർ, 2എംപി ഡെപ്ത് ലെൻസ് എന്നിവ ഇതിൽ ഉൾപ്പെടുന്നു. ഫ്രണ്ട് ക്യാമറയ്ക്കായി 13എംപി സെൻസർ സജ്ജീകരിച്ചിരിക്കുന്നു.

ഈ പുതിയ ഗാലക്സി 5ജി ഫോൺ ആൻഡ്രോയിഡ് 13 അ‌ടിസ്ഥാനമാക്കിയുള്ള One UI 5-ലാണ് പ്രവർത്തിക്കുന്നത്. അ‌ത്യാവശ്യം മികച്ച 5,000mAh ബാറ്ററി സാംസങ് ഗാലക്സി എ15 5ജിയിൽ സജ്ജീകരിച്ചിരിക്കുന്നു കൂടാതെ 25W ഫാസ്റ്റ് ചാർജിങ് പിന്തുണയുമുണ്ട്. ഈ ബാറ്ററി യൂണിറ്റ് ഒറ്റ ചാർജിൽ 21 മണിക്കൂർ വരെ വീഡിയോ പ്ലേബാക്ക് സമയം നൽകുമെന്ന് പറയപ്പെടുന്നു.

200g ആണ് ഗാലക്സി എ15 5ജിയുടെ ഭാരം. ഈ ഫോണിന്റെ കണക്റ്റിവിറ്റി ഓപ്ഷനുകളിൽ 5G, Wi-Fi, ബ്ലൂടൂത്ത്, GPS, 3.5mm ഹെഡ്‌ഫോൺ ജാക്ക്, യുഎസ്ബി ടൈപ്പ്-സി പോർട്ട് എന്നിവ ഉൾപ്പെടുന്നു. ഡോൾബി അറ്റ്‌മോസ് സാങ്കേതികവിദ്യയുള്ള സ്പീക്കറുകളാണ് ഇതിലുള്ളത്. ആക്‌സിലറോമീറ്ററുകൾ, ഗൈറോ സെൻസർ, ജിയോമാഗ്നറ്റിക് സെൻസർ, ലൈറ്റ് സെൻസർ, വെർച്വൽ പ്രോക്‌സിമിറ്റി സെൻസർ എന്നിവ ഓൺബോർഡിലുണ്ട്.