സാംസങ് ഗാലക്‌സി എ 22 5 ജി സ്മാർട്ഫോൺ ഇന്ത്യയിൽ അവതരിപ്പിച്ചു: വിലയും, സവിശേഷതകളും

അടുത്തിടെ പ്രഖ്യാപിച്ച റെഡ്മി നോട്ട് 10 ടി 5 ജി, റിയൽമി 8 5 ജി തുടങ്ങിയ സ്മാർട്ട്‌ഫോണുകൾക്ക് കരുത്തേകുന്ന മീഡിയടെക് ഡൈമെൻസിറ്റി 700 ചിപ്‌സെറ്റ് ഉപയോഗിച്ചാണ് ഈ ഹാൻഡ്‌സെറ്റ് പുറത്തിറക്കിയത്. ഈ സ്മാർട്ട്‌ഫോണിൻറെ മുൻവശത്തായി 6.6 ഇഞ്ച് എഫ്എച്ച്ഡി + ഡിസ്‌പ്ലേ നൽകിയിരിക്കുന്നു. വി ആകൃതിയിലുള്ള നോച്ചും ഇതോടപ്പമുണ്ട്. വൺയുഐ കസ്റ്റം സ്കിൻ ഉപയോഗിച്ച് ആൻഡ്രോയ്‌ഡ് 11 ഓപ്പറേറ്റിംഗ് സിസ്റ്റത്തിൽ പ്രവർത്തിപ്പിക്കുന്ന ഈ സ്മാർട്ഫോൺ 15W ഫാസ്റ്റ് ചാർജിംഗിനെ സപ്പോർട്ട് ചെയ്യുന്ന 5,000 എംഎഎച്ച് ബാറ്ററിയുമായി വരുന്നു.

ഇതിൽ വരുന്ന ട്രിപ്പിൾ റിയർ ക്യാമറ സംവിധാനത്തിൽ 48 എംപി മെയിൻ ലെൻസ്, 5 എംപി അൾട്രാ വൈഡ് ലെൻസ്, 2 എംപി ഡെപ്ത് സെൻസർ എന്നിവ ഉൾപ്പെടുന്നു. സെൽഫികൾ പകർത്തുവാൻ ഗാലക്‌സി എ 22 5 ജിയിൽ 8 എംപി മുൻ ക്യാമറയുണ്ട്. കണക്റ്റിവിറ്റിക്കായി 5 ജി, 4 ജി എൽടിഇ, ഡ്യുവൽ-ബാൻഡ് വൈ-ഫൈ, ബ്ലൂടൂത്ത് 5.0, ജിപിഎസ്, യുഎസ്ബി ടൈപ്പ്-സി എന്നിവ ഉൾപ്പെടുത്തിയിരിക്കുന്നു. സുരക്ഷയ്‌ക്കായി പിൻവശത്ത് ഫിംഗർപ്രിന്റ് സെൻസറും, കൂടുതൽ സ്റ്റോറേജ് എക്സ്പാൻഡ് ചെയ്യുവാൻ മൈക്രോ എസ്ഡി കാർഡ് സപ്പോർട്ടും നൽകിയിട്ടുണ്ട്.

സാംസങ് ഗാലക്‌സി എ 22 5 ജിയ്ക്ക് ഇന്ത്യയിൽ നൽകിയേക്കാവുന്ന വില

സാംസങ് ഗാലക്‌സി എ 22 5 ജിയുടെ ബേസിക് 6 ജിബി റാമും 128 ജിബി സ്റ്റോറേജ് മോഡലിന് 19,999 രൂപയും, ഹൈ-എൻഡ് 8 ജിബി റാം + 128 ജിബി റോം സ്റ്റോറേജ് മോഡലിന് 21,999 രൂപയുമാണ് ഇന്ത്യയിൽ വരുന്ന വില. ചോർന്ന വില നോക്കിയാൽ ഗാലക്‌സി എ 22 5 ജി സാംസങിൽ നിന്നുള്ള ഏറ്റവും വിലകുറഞ്ഞ 5 ജി ഹാൻഡ്‌സെറ്റായി മാറുമെന്ന് പറയാൻ കഴിയും. നിലവിലെ കണക്കനുസരിച്ച്, 21,999 രൂപ വില വരുന്ന ഗാലക്സി എം 42 5 ജി ഏറ്റവും താങ്ങാനാവുന്ന 5 ജി പ്രവർത്തനക്ഷമമാക്കിയ സ്മാർട്ട്ഫോണാണ്. 5 ജി കണക്റ്റിവിറ്റി, 48 എംപി ക്യാമറ സംവിധാനം, 11 ബാൻഡ് സപ്പോർട്ടുകൾ തുടങ്ങിയ സവിശേഷതകൾ ഈ വിലയിൽ വരുന്ന ഏറ്റവും കൂടുതൽ വിറ്റഴിക്കപ്പെടുന്ന സ്മാർട്ഫോണായി മാറുന്നു.