സാംസങ് ഗാലക്‌സി എ 52, സാംസങ് ഗാലക്‌സി എ 72 മാർച്ച് 17 ന് ഇന്ത്യയിൽ അവതരിപ്പിച്ചേക്കും

സാംസങ് ഗാലക്‌സി എ 52, സാംസങ് ഗാലക്‌സി എ 72: ഇന്ത്യയിൽ പ്രതീക്ഷിക്കുന്ന വില

മൈസ്മാർട്ട് പ്രൈസിൻറെ റിപ്പോർട്ട് അനുസരിച്ച്, ഗാലക്‌സി എ 52ൻറെ 6 ജിബി + 128 ജിബി സ്റ്റോറേജ് വേരിയന്റിന് 26,499 രൂപയാണ് വില വരുന്നത്. 8 ജിബി + 128 ജിബി സ്റ്റോറേജ് മോഡലിന് 27,999 രൂപയുമാണ് വില. ഗാലക്‌സി എ 72ൻറെ 8 ജിബി + 128 ജിബി സ്റ്റോറേജ് മോഡലിന് 34,999 രൂപയും, 8 ജിബി + 256 ജിബി സ്റ്റോറേജ് മോഡലിന് 37,999 രൂപയുമാണ് വില വരുന്നത്. ഈ വില വിവരങ്ങൾ ലഭ്യമായ റിപ്പോർട്ടുകളിൽ നിന്നുമുള്ളവയാണ്. മാർച്ച് 17 ന് നടക്കുവാൻ പോകുന്ന കമ്പനിയുടെ ഗാലക്‌സി അൺപാക്കറ്റ് ഇവന്റിൽ ഈ രണ്ട് സ്മാർട്ട്ഫോണുകളും അവതരിപ്പിക്കുമെന്നാണ് പറയുന്നത്. ഈ ഹാൻഡ്സെറ്റുകളുടെ വില സാംസങ് ഇതുവരെ സ്ഥിതികരിച്ചിട്ടില്ല, മാത്രവുമല്ല ഇവന്റിൽ ലോഞ്ച് ചെയ്യുമോ എന്ന കാര്യവും ശ്രദ്ധിക്കേണ്ടതാണ്. ഇന്ത്യൻ വിപണിയിൽ ഗാലക്‌സി എ 52യുടെ 5 ജി മോഡൽ കമ്പനി ഒഴിവാക്കുമെന്നും റിപ്പോർട്ടിൽ പറയുന്നു.

സാംസങ് ഗാലക്‌സി എ 52 5 ജി: പ്രതീക്ഷിക്കുന്ന സവിശേഷതകൾ

സാംസങ് ഗാലക്‌സി എ 52 5 ജി അടുത്തിടെ യൂട്യൂബിലെ അൺബോക്‌സിംഗ് വീഡിയോയിൽ പ്രത്യക്ഷപ്പെട്ടിരുന്നു. ഇത് ഹാൻഡ്‌സെറ്റിൻറെ രൂപകൽപ്പനയും സവിശേഷതകളും കാണിക്കുന്നു. ഗാലക്‌സി എ 52 ന് 120 ഹെർട്സ് രേഫെഷ് റേറ്റും ഇൻ-ഡിസ്പ്ലേ ഫിംഗർപ്രിന്റ് സ്കാനറും വരുന്ന സൂപ്പർ അമോലെഡ് ഡിസ്പ്ലേയായിരിക്കും ലഭിക്കുന്നത്. സ്നാപ്ഡ്രാഗൺ 750 SoC പ്രോസസറാണ് ഈ ഹാൻഡ്‌സെറ്റിന് കരുത്ത് പകരുന്നത്. ആൻഡ്രോയിഡ് 11 ഓപ്പറേറ്റിംഗ് സിസ്റ്റത്തിലായിരിക്കും ഇത് പ്രവർത്തിക്കുന്നത്.

4,500 എംഎഎച്ച് ബാറ്ററിയാണ് ഈ ഫോണിനുള്ളതെന്ന് യൂട്യൂബർ പറഞ്ഞു. 64 മെഗാപിക്സൽ പ്രൈമറി സെൻസർ, 8 മെഗാപിക്സൽ സെക്കൻഡറി സെൻസർ, 5 മെഗാപിക്സൽ സെൻസർ, 2 മെഗാപിക്സൽ സെൻസർ എന്നിവ ഉൾപ്പെടുന്ന ക്വാഡ് റിയർ ക്യാമറ സെറ്റപ്പ് ഉണ്ടായിരിക്കാം. 32 മെഗാപിക്സൽ സെൽഫി ഷൂട്ടറുമായി വരുന്ന ഗാലക്‌സി എ 52 5 ജിക്ക് മുന്നിൽ സെൻട്രൽ ഹോൾ-പഞ്ച് കട്ട്‌ഔട്ട് ലഭിക്കും.

സാംസങ് ഗാലക്‌സി എ 72: പ്രതീക്ഷിക്കുന്ന സവിശേഷതകൾ

സാംസങ് ഗാലക്‌സി എ 72 ൽ വരുന്ന 6.7 ഇഞ്ച് ഫുൾ എച്ച്ഡി + സൂപ്പർ അമോലെഡ് ഇൻഫിനിറ്റി-ഒ ഡിസ്‌പ്ലേയിൽ 90 ഹെർട്സ് റിഫ്രഷ് റേറ്റ് ലഭിച്ചേക്കും. ക്വാൽകോം സ്‌നാപ്ഡ്രാഗൺ 720 ജി SoC പ്രോസസറാണ് ഈ സ്മാർട്ട്ഫോണിന് കരുത്ത് പകരുന്നത്. 64 മെഗാപിക്സൽ പ്രൈമറി സെൻസർ, 12 മെഗാപിക്സൽ അൾട്രാ-വൈഡ് ആംഗിൾ ഷൂട്ടർ, 5 മെഗാപിക്സൽ മാക്രോ ഷൂട്ടർ, ടെലിഫോട്ടോ ലെൻസുള്ള 8 മെഗാപിക്സൽ സെൻസർ എന്നിവ ഉൾപ്പെടുന്ന ക്വാഡ് റിയർ ക്യാമറ സെറ്റപ്പാണ് ഗാലക്‌സി എ 72ൽ വരുന്നതെന്ന് പറയുന്നു. മുൻവശത്ത്, 32 മെഗാപിക്സൽ സെൽഫി ക്യാമറ സെൻസർ വന്നേക്കും. ഗാലക്‌സി എ 72 ൽ 5,000 എംഎഎച്ച് ബാറ്ററിയും 22.5W ഫാസ്റ്റ് ചാർജിംഗും ഉണ്ട്.