സാംസങ്ങ് ഗാലക്‌സി ആല്‍ഫ ഓഗസ്റ്റ് 13-ന് ലോഞ്ച് ചെയ്‌തേക്കും

സാംസങ്ങ് പുതിയ ഉയര്‍ന്ന ശ്രേണിയില്‍ പെട്ട സ്മാര്‍ട്‌ഫോണായ ഗാലക്‌സി ആല്‍ഫ ഓഗസ്റ്റ് 13-ന് ലോഞ്ച് ചെയ്‌തേക്കും. നിലവില്‍ വിപിണിയില്‍ കമ്പനിക്ക് സ്വാധീനം കുറഞ്ഞുവരുന്ന സാഹചര്യത്തില്‍ കൂടിയാണ് പുതിയ ഫോണ്‍ സാംസങ്ങ് അവതരിപ്പിക്കുന്നത്. ആള്‍ എബൗട് സാംസങ്ങ് എന്ന സൈറ്റാണ് ഇക്കാര്യം അറിയിച്ചത്.

സാംസങ്ങ് ഉയര്‍ന്ന ശ്രേണിയില്‍ പെട്ട രണ്ട് സ്മാര്‍ട്‌ഫോണുകള്‍ ഈ വര്‍ഷം പുറത്തിറക്കുമെന്ന് അടുത്തിടെ കമ്പനിയുടെ സീനീിയര്‍ വൈസ് പ്രസിഡന്റ് കിം ഹ്യൂണ്‍-ജൂണ്‍ പറഞ്ഞിരുന്നു. അതില്‍ ഒന്ന് ഗാലക്‌സി നോട് 4ഉം മറ്റൊന്ന് ഗാലക്‌സി ആല്‍ഫയുമാണെന്നാണ് കരുതുന്നത്.

'ആള്‍ എബൗട് സാംസങ്ങ്' റിപ്പോര്‍ട് ചെയ്തിരിക്കുന്നതനുസരിച്ച് ഓഗസ്റ്റ് 13-നു തന്നെ ആല്‍ഫ ലോഞ്ച് ചെയ്യുമെന്നാണ് ആറിയുന്നത്. ഫോണിന്റെ ഏതാനും ചിത്രങ്ങളും സൈറ്റ് പോസ്റ്റ് ചെയ്തിട്ടുണ്ട്. ചിത്രങ്ങള്‍ പ്രകാരം പ്ലാസ്റ്റിക്കിനു പകരം അലുമിനിയം ഫ്രെയിമാണ് ഫോണിനുള്ളത്.

4.8 ഇഞ്ച് ഡിസ്‌പ്ലെ, 1280-720 പിക്‌സല്‍ റെസല്യൂഷന്‍, ഒക്റ്റകോര്‍ എക്‌സിനോസ് പ്രൊസസര്‍, 2 ജി.ബി. റാം, 32 ജി.ബി മെമ്മറി, 12 എം.പി പ്രൈമറി ക്യാമറ, 2 എം.പി ഫ്രണ്ട് ക്യാമറ, ആന്‍ഡ്രോയ്ഡ് 4.4 കിറ്റ്കാറ്റ് ഒ.എസ്, 4 ജി/LTE സപ്പോര്‍ട് തുടങ്ങിയവയാണ് സാങ്കേതികമായി ഫോണിനുണ്ടായിരിക്കുമെന്ന് കരുതുന്ന പ്രത്യേകതകള്‍.