ബജറ്റ് 5G ഫോൺ വില കൂട്ടുന്നത് എന്ത് കഷ്ടമാണ്! സാംസങ് വില കൂട്ടി, വില കുറച്ച് ആമസോണും ഫ്ലിപ്പ്കാർട്ടും

ബജറ്റ് വിലയിൽ 5ജി സ്മാർട്ട്ഫോണുകൾ ലഭ്യമാകുന്നത് സാധാരണക്കാരെയും 5ജി ലോകത്തേക്ക് ​കൈപിടിച്ച് കയറ്റാൻ സഹായിക്കുന്നുണ്ട്. എന്നാൽ ബജറ്റ് വിലയിൽ ഇറങ്ങിയ 5ജി ഫോണുകൾക്കും ഇപ്പോൾ വില കൂടാൻ തുടങ്ങിയിരിക്കുന്നു. സ്മാർട്ട്ഫോൺ വിപണിയിൽ ആകെ ബാധിച്ചിരിക്കുന്ന വില വർധന ബജറ്റ് ഫോണുകൾക്കും ഭീഷണിയാണ്. സാംസങ് ഈ വർഷം ഫെബ്രുവരിയിൽ 10000 രൂപയിൽ താഴെ വിലയിൽ ബജറ്റ് 5ജി ഫോൺ തേടുന്നവർക്കായി അ‌വതരിപ്പിച്ച മോഡലാണ് ഗാലക്സി എഫ്06 5ജി (Samsung Galaxy F06 5G). അ‌ന്ന് സാധാരണക്കാരെ സംബന്ധിച്ചിടത്തോളം ഒരു വലിയ നേട്ടമായിരുന്നു ഈ വിലയിൽ ഈ ഫോൺ എത്തിയത്.

വില പിടിച്ചുനിർത്തുന്നതിന്റെ ഭാഗമായി റാം, സ്റ്റോറേജ് ഫീച്ചറുകളിൽ പിടിമുറുക്കിയാണ് സാംസങ് ഈ ഗാലക്സി 5ജി ഫോൺ അ‌വതരിപ്പിച്ചത്. എങ്കിലും 10000 രൂപയിൽ താഴെ വിലയിൽ ഒരു സാംസങ് 5ജി ഫോൺ കിട്ടും എന്നത് നിരവധി ആരാധകരെ സന്തോഷിപ്പിച്ചു. എന്നാലിപ്പോൾ ലോഞ്ച് വിലയെക്കാൾ ഉയർന്ന വിലയിലാണ് സാംസങ് ഈ ഫോൺ ലിസ്റ്റ് ചെയ്തിരിക്കുന്നത്.

ഇന്ത്യയിൽ ലോഞ്ച് ചെയ്ത്, വിൽപ്പനയ്ക്ക് എത്തുമ്പോൾ സാംസങ് ഗാലക്‌സി F06 5Gയുടെ 4GB+ 128GB മോഡലിന് 9,499 രൂപയും 6GB+ 128GB മോഡലിന് 10,999 രൂപയുമായിരുന്നു വില. ഇതിൽ 500 രൂപ ബാങ്ക് ക്യാഷ്ബാക്ക് ഇൻട്രൊഡക്റ്ററി ഓഫറും ഉൾപ്പെട്ടിരുന്നു. ഈ ഓഫർ കുറച്ചാൽ പോലും അ‌ടിസ്ഥാന മോഡലിന്റെ വില 9999 രൂപയാണ് വരേണ്ടത്.

എന്നാലിപ്പോൾ സാംസങ്ങിന്റെ ഔ​ദ്യോഗിക വെബ്​സൈറ്റിൽ യഥാക്രമം 11499 രൂപ, 12999 രൂപ വിലകളിലാണ് ഈ ഫോൺ ലിസ്റ്റ് ചെയ്തിരിക്കുന്നത്. അ‌തായത് ലോഞ്ച് ചെയ്ത് ഇത്രയും മാസങ്ങൾ പിന്നിട്ട സ്ഥിതിക്ക് വില കുറയേണ്ടതിന് പകരം ഇവിടെ ലോഞ്ച് സമയത്ത് ലഭ്യമായതിനെക്കാൾ വില ഉയരുകയാണ് ചെയ്തിരിക്കുന്നത്.

പക്ഷേ സാംസങ് ആരാധകർ നിരാശരാകേണ്ട കാര്യമില്ല. കാരണം ആമസോണിൽ 8499 രൂപ വിലയിലാണ് ഈ സാംസങ് 5ജി ഫോൺ ലിസ്റ്റ് ചെയ്തിരിക്കുന്നത്. കൂടാതെ ചില ക്യാഷ്ബാക്ക് ഓഫറുകളും ലഭ്യമാക്കിയിട്ടുണ്ട്. ആമസോണിൽ മാത്രമല്ല, ഫ്ലിപ്പ്കാർട്ടിലും ഇതേ വിലയിൽ തന്നെയാണ് ഈ മോഡൽ ലിസ്റ്റ് ചെയ്തിരിക്കുന്നത്. കൂടാതെ ഫ്ലിപ്പ്കാർട്ടിന്റേതായ ബാങ്ക് ഡിസ്കൗണ്ടുകളും ലഭ്യമാക്കിയിരിക്കുന്നു.

അ‌തിനാൽ ഈ സാംസങ് 5ജി ഫോൺ വാങ്ങാൻ ആരെങ്കിലും പ്ലാൻ ചെയ്യുന്നുണ്ടെങ്കിൽ ഔദ്യോഗിക വെബ്​സൈറ്റിലെക്കാൾ ലാഭം ആമസോൺ അ‌ല്ലെങ്കിൽ ഫ്ലിപ്പ്കാർട്ട് ആണ്. ബഹാമ ബ്ലൂ, ലിറ്റ് വയലറ്റ് എന്നീ കളർ ഓപ്ഷനുകളിലാണ് ഈ ഫോൺ ലഭ്യമായിട്ടുള്ളത്. 167.4x 77.4 x 8mm വലിപ്പവും 191 ഗ്രാം ഭാരവും ഇതിനുണ്ട്.

പ്രധാന ഫീച്ചറുകൾ

6.7 ഇഞ്ച് (720 x 1600 പിക്സൽസ്) HD+ LCD സ്ക്രീൻ, 60Hz റിഫ്രഷ് റേറ്റ്, 800 nits വരെ പീക്ക് ബ്രൈറ്റ്നസ്, ഒക്ട കോർ മീഡിയടെക് ഡൈമെൻസിറ്റി 6300 6nm പ്രോസസർ, ആം മാലി-G57 MC2 GPU, 4GB / 6GB LPDDR4X റാം, 6ജിബി വരെ വെർച്വൽ റാം, 128GB സ്റ്റോറേജ്.

f/1.8 അപ്പേർച്ചറുള്ള 50MP മെയിൻ ക്യാമറ, f/2.4 അപ്പേർച്ചറുള്ള 2MP ഡെപ്ത് സെൻസർ, LED ഫ്ലാഷ്, f/2.0 അപ്പേർച്ചറുള്ള 8MP ഫ്രണ്ട് ഫേസിംഗ് ക്യാമറ, ഹൈബ്രിഡ് ഡ്യുവൽ സിം (നാനോ+ നാനോ /മൈക്രോ എസ്ഡി), 5G SA/NSA (12 5G ബാൻഡുകൾ), സൈഡ്-മൗണ്ടഡ് ഫിംഗർപ്രിന്റ് സ്കാനർ, 25W ഫാസ്റ്റ് ചാർജിങ്, 5000mAh ബാറ്ററി, വൺ UI 7 (4 OS അപ്‌ഗ്രേഡുകളും 4 വർഷത്തെ സുരക്ഷാ അപ്‌ഡേറ്റുകളും ലഭിക്കും) എന്നിവയാണ് പ്രധാന ഫീച്ചറുകൾ.