സ്നാപ്ഡ്രാഗൺ 865 SoC പ്രോസസറുള്ള സാംസങ് ഗാലക്സി എസ് 20 എഫ്ഇ 4 ജി അവതരിപ്പിച്ചു: വിലയും, സവിശേഷതകളും

സാംസങ് ഗാലക്‌സി എസ് 20 എഫ്ഇ 4 ജി (സ്‌നാപ്ഡ്രാഗൺ 865) സ്മാർട്ഫോണിൻറെ വില

സാംസങ് ഗാലക്‌സി എസ് 20 എഫ്ഇ 4 ജി (സ്‌നാപ്ഡ്രാഗൺ 865) യുടെ 8 ജിബി റാം + 128 ജിബി സ്റ്റോറേജ് വേരിയന്റിന് എംവൈആർ 2,299 (ഏകദേശം 41,300 രൂപ) മുതൽ വില ആരംഭിക്കുന്നു. സാംസങ്ങിൻറെ ഔദ്യോഗിക റീട്ടെയിൽ പങ്കാളിയായ ഷോപ്പി മലേഷ്യയിൽ നീല, ഓറഞ്ച്, വയലറ്റ് നിറങ്ങളിൽ ഫോൺ പട്ടികപ്പെടുത്തിയിട്ടുണ്ട്. ഇ-കൊമേഴ്‌സ് വെബ്സൈറ്റിലെ ലിസ്റ്റിംഗിനുപുറമെ, പുതിയ സാംസങ് ഗാലക്‌സി എസ് 20 എഫ്ഇ വേരിയൻറ് കമ്പനിയുടെ വെബ്സൈറ്റുകളിൽ ജർമ്മനി, മലേഷ്യ, വിയറ്റ്നാം എന്നിവിടങ്ങളിൽ പട്ടികപ്പെടുത്തിയിട്ടുണ്ട്. എന്നാൽ, ഏറ്റവും പുതിയ മോഡൽ ഇന്ത്യയുൾപ്പെടെ കൂടുതൽ വിപണികളിൽ എത്തുമോ എന്ന കാര്യം ഇതുവരെ വ്യക്തമല്ല. കഴിഞ്ഞ വർഷം ഒക്ടോബറിൽ സാംസങ് യഥാർത്ഥ ഗാലക്‌സി എസ് 20 എഫ്ഇ ഇന്ത്യയിൽ 49,999 രൂപയ്ക്ക് പുറത്തിറക്കി. മാർച്ചിൽ സാംസങ് ഗാലക്‌സി എസ് 20 എഫ്ഇ 5 ജി രാജ്യത്ത് 55,999 രൂപയ്ക്ക് ലഭ്യമാക്കി.

സാംസങ് ഗാലക്‌സി എസ് 20 എഫ്ഇ 4 ജി (സ്‌നാപ്ഡ്രാഗൺ 865) സ്മാർട്ഫോണിൻറെ സവിശേഷതകൾ

സാംസങ് ഗാലക്‌സി എസ് 20 എഫ്ഇ 4 ജി (സ്‌നാപ്ഡ്രാഗൺ 865) മറ്റൊരു ചിപ്‌സെറ്റ് ഒഴിവാക്കിയാൽ ബാക്കിയെല്ലാം പഴയ മോഡലിന് സമാനമാണ്. 8 ജിബി റാമുമായി ജോടിയാക്കിയ സ്നാപ്ഡ്രാഗൺ 865 SoC പ്രോസസറാണ് പുതിയ മോഡലിൽ നൽകിയിരിക്കുന്നത്. യഥാർത്ഥ സാംസങ് ഗാലക്‌സി എസ് 20 എഫ്ഇയെ ശക്തിപ്പെടുത്തുന്ന എക്‌സിനോസ് 990 ൽ നിന്ന് ചിപ്‌സെറ്റ് വ്യത്യസ്തമാണ്. എന്നാൽ, സാംസങ് ഗാലക്‌സി എസ് 20 എഫ്ഇ 5 ജി എഡിഷനിലും സ്‌നാപ്ഡ്രാഗൺ 865 SoC പ്രോസസറുണ്ട്.

സാംസങ് ഗാലക്‌സി എസ് 20 എഫ്ഇ 4 ജി (സ്‌നാപ്ഡ്രാഗൺ 865) ക്യാമറ സവിശേഷതകൾ

സാംസങ് ഗാലക്‌സി എസ് 20 എഫ്ഇ 4 ജിയിൽ 6.5 ഇഞ്ച് ഫുൾ എച്ച്ഡി + സൂപ്പർ അമോലെഡ് ഇൻഫിനിറ്റി-ഒ ഡിസ്‌പ്ലേയ്ക്ക് 120 ഹെർട്സ് റിഫ്രഷ് റേറ്റുണ്ട്. 12 മെഗാപിക്സൽ അൾട്രാ-വൈഡ് ഷൂട്ടർ, വൈഡ് ആംഗിൾ ലെൻസുള്ള 12 മെഗാപിക്സൽ സെൻസർ, 8 മെഗാപിക്സൽ ടെലിഫോട്ടോ ഷൂട്ടർ എന്നിവയുള്ള ട്രിപ്പിൾ റിയർ ക്യാമറ സംവിധാനവും നിങ്ങൾക്ക് ലഭിക്കും. സെൽഫികൾ പകർത്തുവാനും, വീഡിയോ ചാറ്റുകൾ ചെയ്യുവാനും എഫ് / 2.2 ലെൻസുള്ള 32 മെഗാപിക്സൽ സെൽഫി ക്യാമറ സെൻസർ ഇതിലുണ്ട്.

128 ജിബി ഓൺ‌ബോർഡ് സ്റ്റോറേജുമായാണ് ഈ പുതിയ മോഡൽ വിപണിയിൽ വരുന്നത്. എന്നാൽ, ഒറിജിനൽ വേരിയന്റിനായി ലഭ്യമായ കോൺഫിഗറേഷനുകൾ കണക്കിലെടുക്കുമ്പോൾ, സാംസങ് ഗാലക്‌സി എസ് 20 എഫ്ഇ 4 ജി (സ്‌നാപ്ഡ്രാഗൺ 865) ന് 256 ജിബി സ്റ്റോറേജ് ഓപ്ഷനും ലഭിക്കാൻ സാധ്യതയുണ്ട്. വയർലെസ് ചാർജിംഗ് സപ്പോർട്ടിന് പുറമേ 25W ഫാസ്റ്റ് ചാർജിംഗിനെ സപ്പോർട്ട് ചെയ്യുന്ന ഈ പുതിയ ഗാലക്‌സി എസ് 20 എഫ്ഇ 4 ജിയിൽ സാംസങ് 4,500 എംഎഎച്ച് ബാറ്ററി നൽകിയിട്ടുണ്ട്. പുതിയ മോഡലിന്‌ 159.8x74.5x8.4 മില്ലിമീറ്റർ അളവും, 190 ഗ്രാം ഭാരമുണ്ട്.