ക്യാമറ മികവ് കൂട്ടി! സാംസങ് ഗാലക്സി എസ്26 സീരീസ് പ്രീ ബുക്കിങ് ആരംഭിക്കാൻ പോകുന്നു

സാംസങ് ആരാധകർ ഏറെ നാളായി കാത്തിരിക്കുന്ന പുതിയ ഗാലക്സി എസ്26 സീരീസ് (Samsung Galaxy S26 series) എത്താൻ പോകുന്നു. എസ്26 സീരീസിന്റെ ലോഞ്ച് തിയതി കമ്പനി ഇതുവരെ വെളിപ്പെടുത്തിയിട്ടില്ലെങ്കിലും ലോഞ്ച് തൊട്ടടുത്ത് എത്തിയിരിക്കുന്നു എന്നതിന്റെ പുത്തൻ വിവരങ്ങൾ എത്തിയിട്ടുണ്ട്. ഗാലക്സി എസ്26 സീരീസ് പ്രീ ബുക്കിങ് ഫെബ്രുവരി 11ന് തുടങ്ങും എന്ന് ലീക്ക് റിപ്പോർട്ടുകൾ പുറത്തുവന്നിരിക്കുന്നു. അ‌തിനർഥം പ്രീ ബുക്കിങ് ആരംഭിക്കുന്നതും ലോഞ്ച് തിയതിയും ഉടൻ തന്നെ ഔദ്യോഗികമായി പ്രഖ്യാപിക്കും എന്നാണ്. ഈ സീരീസിന്റെ മാർക്കറ്റിംഗ് മെറ്റീരിയൽ ഓൺലൈനിൽ പ്രത്യക്ഷപ്പെട്ടു, ഇത് ലോഞ്ച് ​ടൈമും പ്രീ ബുക്കിങ് ഓഫറുകളും സൂചിപ്പിക്കുന്നു.

സാംസങ് ഗാലക്സി എസ്26 സീരീസിൽ ഗാലക്‌സി എസ് 26, ഗാലക്‌സി എസ് 26 പ്ലസ്, ഗാലക്‌സി എസ് 26 അൾട്ര എന്നിങ്ങനെ മൂന്ന് മോഡലുകൾ ഉണ്ടാകും എന്നാണ് പ്രതീക്ഷിക്കപ്പെടുന്നത്. ഇതിൽ ആരാധകർ ഏറ്റവും കാത്തിരിക്കുന്നത് എസ്26 അ‌ൾട്ര മോഡലിന് വേണ്ടിയാണ്, എന്നാൽ ഈ സീരീസിലെ ഏറ്റവും വില കുറഞ്ഞ ഓപ്ഷൻ എന്ന നിലയിൽ എസ്26 മോഡലും പ്രത്യേക ശ്രദ്ധ പിടിച്ചുപറ്റുന്നു.

സാംസങ് ഗാലക്‌സി എസ് 26 സീരീസ് 2026 ഫെബ്രുവരി 11 മുതൽ മുൻകൂട്ടി ബുക്ക് ചെയ്യാൻ കഴിയും എന്ന് ഓൺ​ലൈനിൽ പ്രത്യക്ഷപ്പെട്ട ടീസറുകളിൽ പറയുന്നുണ്ട്. എസ് പെന്നിന് ഒപ്പം പർപ്പിൾ നിറത്തിലുള്ള സാംസങ് ഗാലക്‌സി എസ് 26 അൾട്രയും പ്രൊമോഷണൽ പോസ്റ്ററിൽ കാണാം.

ടീസറിലെ ചിത്രം വരാൻ പോകുന്ന അ‌ൾട്ര മോഡലിന്റെ ഡി​സൈനെക്കുറിച്ച് ചില സൂചനകൾ നൽകുന്നുണ്ട്. ക്വാഡ്-ക്യാമറ സജ്ജീകരണം സാംസങ് എസ്26 അ‌ൾട്രയിലും തുടരുന്നു. എന്നിരുന്നാലും, സാംസങ്ങിന്റെ പരിചിതമായ പ്രത്യേകം പ്രത്യേകം നീണ്ടുനിൽക്കുന്ന ലെൻസുകൾക്ക് പകരം, റിയർ പാനലിൽ നിന്ന് അല്പം ഉയർത്തിയിരിക്കുന്ന കൂടുതൽ ഒതുക്കമുള്ള ക്യാമറ ഐലൻഡ് ഡിസൈൻ ആണ് ഇത്തവണ സ്വീകരിച്ചിരിക്കുന്നത്.

മുൻ മോഡലിനെക്കാൾ സ്ലിം ആണ് പുതിയ എസ്26 അ‌ൾട്ര എന്നാണ് ചിത്രങ്ങളിൽ നിന്ന് മനസിലാക്കാനാകുന്നത്. ചാംഫെർഡ് എഡ്ജുകളുടെ പിന്തുണയോടെ, വലുപ്പത്തിലും ഭാരത്തിലും ക്രമാനുഗതമായി വളർന്ന മറ്റ് അൾട്രാ-പ്രീമിയം ഓഫറുകളെ അപേക്ഷിച്ച് ഗാലക്‌സി എസ് 26 അൾട്രാ കൈവയിൽ വയ്ക്കാൻ കൂടുതൽ സുഖകരമായിരിക്കും.

സാംസങ് ഗാലക്സി എസ്26 സീരീസിലെ മോഡലുകളെല്ലാം കൂടുതൽ ക്യാമറ മികവുകൾ വാഗ്ദാനം ചെയ്യുമെന്ന് ഓൺ​​ലൈനിലെ ടീസറുകൾ സൂചിപ്പിക്കുന്നുണ്ട്. ബെറ്റർ സൂ, ബെറ്റർ ലോ ​ലൈറ്റ് വീഡിയോഗ്രഫി, ബെറ്റർ ലോ ​ലൈറ്റ് ഫോട്ടോഗ്രഫി എന്നീ അ‌പ്ഗ്രേഡുകളോടെയാണ് പുതിയ ഗാലക്സി എസ്26 സീരീസ് ഫോണുകൾ എത്തുന്നത്.

സാംസങ് എസ്26 സീരീസിന്റെ പ്രീ ബുക്കിങ് തിയതി വെളിപ്പെടുത്തുന്നതിനൊപ്പം ചില ഓഫറുകളെക്കുറിച്ചും പുറത്തുവന്ന ടീസറിൽ പറയുന്നുണ്ട്. സാധാരണയായി സാംസങ് ഫോണുകൾക്ക് ഒപ്പം ചാർജർ കിട്ടാറില്ല. എന്നാൽ പ്രീ ബുക്കിങ് ഓഫറായി ഗാലക്‌സി എസ് 26 സീരീസ് മുൻകൂട്ടി ബുക്ക് ചെയ്യുന്ന ഉപയോക്താക്കൾക്ക്, സൗജന്യമായി 60W സാംസങ് ചാർജർ ലഭിച്ചേക്കുമെന്ന് ടീസർ സൂചിപ്പിക്കുന്നുണ്ട്.

45W ചാർജിങ് പിന്തുണയാണ് സാധാരണയായി എസ് സീരീസ് ഫോണുകൾക്കും സാംസങ് നൽകിവരുന്നത്. എന്നാൽ ഇത്തവണ എസ്26 അ‌ൾട്രയ്ക്ക് 60W ഫാസ്റ്റ് ചാർജിങ് ഫീച്ചർ ലഭ്യമാകുമെന്ന് മുൻ ലീക്ക് റിപ്പോർട്ടുകൾ സൂചിപ്പിച്ചിരുന്നു. പുതിയ പ്രീ ബുക്കിങ് ഓഫർ ഫാസ്റ്റ് ചാർജിങ് സംബന്ധിച്ച ലീക്ക് റിപ്പോർട്ടുകൾ ശരിവയ്ക്കുന്ന വിധത്തിലുള്ളതാണ്.

ഗാലക്സി എസ് 26 സീരീസിന്റെ പ്രീ-റിസർവ് ആനുകൂല്യങ്ങളിൽ 'വാർഷിക ഡെലിവറി', 'സ്പെഷ്യൽ ഓഫർ', 'അഡീഷണൽ 1 ഓഫർ', 'പ്രീമിയം സർവീസ്', മറ്റ് നിരവധി ഡിസ്കൗണ്ടുകൾ എന്നിവയും ഉൾപ്പെട്ടേക്കാം. ഔദ്യോഗികമായി വെളിപ്പെടുത്തിയിട്ടില്ലാത്തതിനാൽ ഇവയെപ്പറ്റി കൃത്യമായ വിവരങ്ങൾ നിലവിൽ ലഭ്യമല്ല. ഫെബ്രുവരി 25ന് എസ്26 സീരീസ് ലോഞ്ച് ചെയ്യാൻ സാധ്യതയുണ്ട് എന്നാണ് ലീക്ക് റിപ്പോർട്ടുകൾ പറയുന്നത്. എന്തായാലും കൂടുതൽ കൃത്യതയോടെ കാര്യങ്ങൾ അ‌റിയാൻ സാംസങ് ഔദ്യോഗികമായി ഇവ വെളിപ്പെടുത്തേണ്ടതുണ്ട്.