സാംസങ് ഒളിപ്പിച്ച അ‌ദ്ഭുതങ്ങൾ! ഗാലക്സി അ‌ൺപാക്ക്ഡ് ഇവന്റ് തിയതി പ്രഖ്യാപിച്ചു; വരുന്ന ഫോണുകൾ ഇതാ

ലോകം ആകാം​ക്ഷയോടെ കാത്തിരുന്ന ഒരു സാംസങ് ഇവന്റിന് ഇപ്പോൾ നാൾ കുറിക്കപ്പെട്ടിരിക്കുന്നു. സാംസങ് ഗാലക്സി അ‌ൺപാക്ക്ഡ് ഇവന്റ് ജൂ​ലൈ 2025 (Samsung Galaxy Unpacked July 2025 Event) ന്റെ തിയതികൾ സാംസങ് ഔദ്യോഗകിമായി പ്രഖ്യാപിച്ചു. ജൂലൈ 9 ന് ന്യൂയോർക്കിലെ ബ്രൂക്ലിനിൽ ഈ ഇവന്റ് നടക്കും എന്ന് സാംസങ് അ‌റിയിച്ചു. ഇന്ത്യൻ സമയം വൈകുന്നേരം 7:30 മുതൽ സാംസങ്ങിന്റെ ഔദ്യോഗിക വെബ്‌സൈറ്റ്, ന്യൂസ് റൂം, യൂട്യൂബ് ചാനൽ എന്നിവ വഴി ഈ ഇവന്റ് കാണാൻ സാധിക്കും.

എന്താണ് ഗാലക്സി അ‌ൺപാക്ക്ഡ് ജൂ​ലൈ ഇവന്റിൽ സാംസങ് അ‌വതരിപ്പിക്കാൻ പോകുന്നത് എന്ന് ഔദ്യോഗികമായി വെളിപ്പെടുത്തിയിട്ടില്ല. എന്നാൽ പുതിയ AI ഫീച്ചറുകളും ഗാലക്‌സി ഇസഡ് ഫോൾഡ് 7, ഗാലക്‌സി ഇസഡ് ഫ്ലിപ്പ് 7 എന്നിവയും ഇതോടൊപ്പം ഫ്ലിപ്പ്7 FE, സാംസങ് ഗാലക്‌സി വാച്ച് 8, വാച്ച് 8 ക്ലാസിക്, വാച്ച് അൾട്രാ 2025 എന്നിവയും അ‌വതരിപ്പിക്കപ്പെട്ടേക്കാം.

ഈ സാംസങ് ഇവന്റിന്റെ മുഖ്യ ആകർഷണം ഗാലക്സി ഫോൾഡബിൾ ഫോണുകൾ തന്നെയാണ്. സാംസങ്ങ് ഈയടുത്ത് Exynos 2500 Deca-Core ചിപ്പ് അവതരിപ്പിച്ചിരുന്നു. ഈ ചിപ്സെറ്റിന്റെ കരുത്തിലാണ് പുതിയ ഗാലക്സി Z ഫ്ലിപ്പ്7 സ്മാർട്ട്‌ഫോൺ എത്തുക എന്നാണ് റിപ്പോർട്ടുകൾ പറയുന്നത്. ഗാലക്‌സി എസ് 25 ൽ നിന്ന് പ്രചോദനം ഉൾക്കൊണ്ട ഡിസൈൻ മാറ്റങ്ങളോടെയാണ് ഇസഡ് ഫോൾഡ് 7 വരുക എന്നും റിപ്പോർട്ടുണ്ട്.

സാംസങ് ഗാലക്സി Z ഫോൾഡ്7 ന് 6.5 ഇഞ്ച് ഔട്ടർ സ്‌ക്രീൻ ഉണ്ടാകുമെന്നാണ് ലീക്ക് റിപ്പോർട്ടുകൾ വന്നിട്ടുള്ളത്, ഇതിന്റെ ഫോൾഡബിൾ ഡിസ്‌പ്ലേ 8.2 ഇഞ്ച് ആയിരിക്കുമെന്ന് പ്രതീക്ഷിക്കുന്നു. അ‌തായത് ലഭ്യമായ ഏറ്റവും വലിയ ഫോൾഡബിൾ സ്ക്രീൻ സാംസജ് ഗാലക്സി Z ഫോൾഡ് അ‌വതരിപ്പിക്കാൻ സാധ്യത നിലനിൽക്കുന്നു.

സാംസങ് ഗാലക്സി അ‌ൺപാക്ക്ഡ് ഇവന്റിൽ പുറത്തിറക്കുന്ന ഈ സാംസങ് ഫോൾഡബിൾ സ്മാർട്ട്ഫോണുകളുടെ ഇന്ത്യൻ ലോഞ്ച് തിയതി നിലവിൽ വ്യക്തമല്ല. എങ്കിലും സാംസങ് ഇന്ത്യ സ്റ്റോർ, ആമസോൺ പോലുള്ള പ്ലാറ്റ്ഫോമുകളിൽ ഈ സ്മാർട്ട്ഫോണുകളുടെ പ്രീ-റിസർവേഷൻ ആരംഭിച്ചിട്ടുണ്ട്. ജൂലൈ 9 വരെയോ പ്രീ-ബുക്കിംഗ് ആരംഭിക്കുന്നത് വരെയോ പ്രീ-റിസർവേഷനുകൾ ഓപ്പണായിരിക്കുമെന്ന് സാംസങ് അറിയിച്ചു.

താൽപര്യമുള്ള ഉപയോക്താക്കൾക്ക് 1999 രൂപ നൽകി സ്മാർട്ട്ഫോൺ ബുക്ക് ചെയ്യാം. പ്രീ ബുക്കിങ് ഓഫറായി ഉപയോക്താക്കൾക്ക് 5999 രൂപയുടെ ആനുകൂല്യങ്ങൾ ലഭിക്കുമെന്ന് സാംസങ് അറിയിച്ചു. ഗാലക്സി Z ഫ്ലിപ്പ്7 ജെറ്റ് ബ്ലാക്ക്, ബ്ലൂ ഷാഡോ, കോറൽ റെഡ് കളർ ഓപ്ഷനുകളിലാകും ലഭ്യമാകുക എന്നാണ് സൂചന. ഗാലക്സി Z ഫ്ലിപ്പ് 7 FE ബ്ലാക്ക്, ​വൈറ്റ് കളർ ഓപ്ഷനുകളിൽ എത്തുമെന്ന് ലീക്ക് റിപ്പോർട്ടുകളുണ്ട്.

മുൻ മോഡലുകളെ അ‌പേക്ഷിച്ച് ഗാലക്‌സി ഇസഡ് ഫോൾഡ് 7, ഗാലക്‌സി ഇസഡ് ഫ്ലിപ്പ് 7 എന്നിവയുടെ വില ഈ വർഷം വർദ്ധിക്കുമെന്ന് പറയപ്പെടുന്നു. കഴിഞ്ഞ വർഷം, ഗാലക്‌സി ഇസഡ് ഫോൾഡ് 6 (12 ജിബി റാം + 256 ജിബി സ്റ്റോറേജ്) ന് 1,64,999 രൂപയായിരുന്നു വില, ഫ്ലിപ്പ് 6 ന് 1,09,999 രൂപയും.

എന്നാൽ പുതിയ അ‌പ്ഗ്രേഡുകളിലൂടെ സാംസങ് പുതിയ മോഡലുകളുടെ വിലയും ഉയർത്തും എന്നാണ് സൂചനകൾ ലഭിച്ചിരിക്കുന്നത്. പക്ഷേ സാംസങ് വില സംബന്ധിച്ച വിവരങ്ങൾ നിലവിൽ പുറത്തുവിട്ടിട്ടില്ല. ഇത് ജൂ​ലൈ 9ന് ഇവന്റിൽ പ്രഖ്യാപിക്കുകയാകും ചെയ്യുക. എന്നാൽ ഇന്ത്യയിൽ ഫോൾഡബിൾ സ്മാർട്ട്ഫോൺ വിപണിയിൽ ശക്തമായ മത്സരം നടക്കുന്നതിനാൽ വലിയ തോതിൽ വില ഉയർന്നേക്കില്ല.