ഈടും IP64 റേറ്റിങ്ങും ആണ് മെയിൻ! ടെക്നോ സ്പാർക്ക് ഗോ 3 ഇന്ത്യയിൽ ജനുവരി 16ന് ലോഞ്ച് ചെയ്യും

ടെക്നോ ഇന്ത്യയിൽ തങ്ങളുടെ സ്പാർക്ക് സീരീസിലെ അ‌ടുത്ത സ്മാർട്ട്ഫോണിന്റെ ലോഞ്ച് തിയതി പ്രഖ്യാപിച്ചിരിക്കുന്നു. കഴിഞ്ഞ വർഷത്തെ സ്പാർക്ക് ഗോ 2 -ന്റെ പിൻഗാമിയായി പുതിയ ടെക്നോ സ്പാർക്ക് ഗോ 3 (TECNO Spark Go 3) ആണ് ലോഞ്ചിന് ഒരുങ്ങിയിരിക്കുന്നത്. ജനുവരി 16ന് ഈ സ്മാർട്ട്ഫോൺ ഇന്ത്യയിൽ ലോഞ്ച് ചെയ്യുമെന്ന് ടെക്നോ ഔദ്യോഗികമായി സ്ഥിരീകരിച്ചു. ഇന്ത്യയിലെ സാഹചര്യങ്ങൾക്ക് അ‌നുസൃതമായി ഡി​സൈൻ ചെയ്ത് അ‌വതരിപ്പിക്കുന്ന ഒരു സ്മാർട്ട്ഫോൺ ആണ് ഇത് എന്നാണ് ലോഞ്ച് തിയതി പുറത്തുവിട്ടുകൊണ്ട് ടെക്നോ അ‌റിയിച്ചിരിക്കുന്നത്.

"ദേശ് ജൈസ ദുംദാർ" എന്ന കാമ്പെയ്‌ൻ തീമിന് കീഴിൽ ആണ് ടെക്നോ ഈ സ്മാർട്ട്ഫോൺ ഇന്ത്യയിൽ ലോഞ്ച് ചെയ്യുന്നത്. മികച്ച പ്രതിരോധശേഷിയും വിശ്വാസ്യതയും ഈ സ്പാർക്ക് ഗോ 3 മോഡലിന് ഉണ്ട് എന്ന് ടെക്നോ ഊന്നിപ്പറയുന്നുണ്ട്. ഇത് "റിയൽ ഇന്ത്യ" യ്ക്കായി നിർമ്മിച്ചത്- എന്നാണ് ടെക്നോ പറയുന്നത്.

ലോഞ്ച് ഡേറ്റ് പുറത്തുവിട്ടുകൊണ്ട് ടെക്നോ വരാൻ പോകുന്ന ഫോണിനെക്കുറിച്ച് വളരെ കുറച്ച് കാര്യങ്ങൾ മാത്രമേ വെളിപ്പെടുത്തിയിട്ടുള്ളൂ. അ‌തിൽ ഏറ്റവും പ്രധാനം ഇതിന്റെ ഈടിന്റെ കാര്യമാണ്. ഇന്ത്യയിലെ ദുഷ്കരമായ പല സാഹചര്യങ്ങളെയും നേരിടാൻ തക്ക കരുത്തോടെയാണ് ഈ സ്മാർട്ട്ഫോൺ നിർമിക്കപ്പെട്ടിരിക്കുന്നത് എന്ന് ടെക്നോ പറയുന്നുണ്ട്.

ഇന്ത്യയിലെ ആളുകളുടെ ദൈനംദിന ജീവിതത്തിന് ഒപ്പം കൂട്ടാൻ പറ്റിയ വിശ്വസനീയമായ ഒരു സ്മാർട്ട്ഫോൺ തേടുന്ന ഉപയോക്താക്കളെയാണ് ടെക്നോ സ്പാർക്ക് ഗോ 3യുടെ മാർക്കറ്റിംഗ് തന്ത്രം ലക്ഷ്യമിടുന്നത്. പെർഫോമൻസിൽ മികവ് പുലർത്തുമ്പോൾ തന്നെ മികച്ച ഈട് ഈ ​ഫോൺ വാഗ്ദാനം ചെയ്യും, മാത്രമല്ല കൂടുതൽ നേര ഉപയോഗത്തെയും പിന്തുണയ്ക്കും.

"ആത്മവിശ്വാസത്തോടെ മുന്നോട്ട് പോകുന്നതിൽ വിശ്വസിക്കുന്നവർ"ക്കായി നിർമ്മിച്ചത് എന്നാണ് ടെക്നോ ഈ സ്മാർട്ട്ഫോണിനെ പരിചയപ്പെടുത്തുന്നത്. ഈട് സംബന്ധിച്ച ഉപയോക്താക്കളുടെ ആശങ്കകളെ ടെക്നോ പരിഗണിച്ചിരിക്കുന്നു. IP64 പൊടി, സ്പ്ലാഷ് പ്രതിരോധ റേറ്റിങ് ഈ ഫോണിന് ഉണ്ട് എന്ന് സ്ഥിരീകരിച്ചിട്ടുണ്ട്.

ഇന്ത്യയിലെ പ്രവചനാതീതമായ പാരിസ്ഥിതിക സാഹചര്യങ്ങളെയും ആകസ്മികമായുള്ള വീ​ഴ്ചകളെയും ഈ ​ടെക്നോ സ്പാർക്ക് ഗോ 3 അ‌തിജീവിക്കുമെന്ന് കമ്പനി പറയുന്നു. ഇതിന്റെ കൂടുതൽ ഫീച്ചറുകൾ ലോഞ്ചിന് മുന്നോടിയായി വരുംദിവസങ്ങളിൽ വ്യക്തമാക്കും. ലോഞ്ചിന് ശേഷം ആമസോൺ വഴി ഈ ടെക്നോ ഫോൺ ഇന്ത്യയിൽ വാങ്ങാൻ ലഭ്യമാകും.

കഴിഞ്ഞ വർഷം ഓഗസ്റ്റിലാണ് ടെക്നോ സ്പാർക്ക് ഗോ 3 മോഡലിന്റെ മുൻഗാമിയായ ടെക്നോ സ്പാർക്ക് ഗോ 5ജി ഇന്ത്യയിൽ ലോഞ്ച് ചെയ്യപ്പെട്ടത്. പതിനായിരം രൂപയിൽ താഴെ വിലയുള്ള ഒരു ബജറ്റ് 5ജി ഫോൺ എന്ന നിലയിലായിരുന്നു ഈ വരവ്. ഇന്ത്യയിൽ ലോഞ്ച് ചെയ്യുന്ന സമയത്ത് ടെക്നോ സ്പാർക്ക് ഗോ 5ജിയുടെ 4GB + 128GB മോഡലിന് 9,999 രൂപയായിരുന്നു വില.

പുതിയ ടെക്നോ സ്പാർക്ക് ഗോ 3 5ജി എന്ത് വിലയിലാകും ഇന്ത്യയിൽ ലോഞ്ച് ചെയ്യുക എന്ന് നിലവിൽ വ്യക്തമല്ല. എങ്കിലും 15000 രൂപയിൽ താഴെ വിലയിലുള്ള സെഗ്മെന്റിലാകും ഈ ഫോൺ അ‌വതരിപ്പിക്കപ്പെടുക എന്ന് പ്രതീക്ഷിക്കാം. നിലവിൽ ടെക്നോ സ്പാർക്ക് ഗോ 5ജി ലോഞ്ച് വിലയെക്കാൾ 1000 രൂപ കൂടിയ വിലയിലാണ് ലിസ്റ്റ് ചെയ്യപ്പെട്ടിരിക്കുന്നത്, അ‌ടുത്തിടെ ഉണ്ടായ ചിപ് വില വർധനവാണ് ഇതിന് കാരണമായി പറയപ്പെടുന്നത്.