വിവോ V9 എങ്ങനെയുണ്ടെന്ന് നോക്കാം; ഗിസ്‌ബോട്ട് റിവ്യൂ

ഭാരം കുറഞ്ഞ മികവാർന്ന ഡിസൈൻ

ഐഫോൺ എക്സിന്റെതിനു സമാനമായ ഫുൾ സ്ക്രീൻ നോച്ച് ആൻഡ്രോയിഡ് ഫോണിൽ അതും ഏതൊരാൾക്കും താങ്ങാൻ പറ്റുന്ന വിലയിൽ ലഭ്യമായിരിക്കുന്നു എന്നതാണ് ഈ ഫോണിന്റെ പ്രധാന സവിശേഷതകളിൽ ഒന്ന്. മധ്യനിരയിലുള്ള സ്മാർട്ഫോൺ വിപണിയിൽ വിവോ മുന്നേറ്റം നടത്തും എന്നുറപ്പാണ്. ബോഡിയോട് 90 ശതമാനം ചേർന്നിരിക്കുന്ന ഡിസ്പ്ലേ തീർത്തും മനോഹരം തന്നെയാണ്.

വൃത്തത്തിലുള്ള എഡ്ജ് ടു എഡ്ജ് ഡിസ്പ്ലേ ഫോണിനെ കൂടുതൽ സുന്ദരമാക്കുന്നു. ചിത്രങ്ങളും വിഡിയോകളും എല്ലാം തന്നെ വളരെ ഭംഗിയായി എടുത്തു കാണിക്കുന്നു. ഈ നിരയിൽ ഞങ്ങൾ ടെസ്റ്റ് ചെയ്തതിൽ വെച്ച് ഏറ്റവും ഭാരം കുറഞ്ഞ മോഡലും ഇത് തന്നെ.

രണ്ടു ലെൻസുകളോട് കൂടിയ പിൻക്യാമറ

ഇടതു ഭാഗത്ത് മുകളിലായി രണ്ടു ലെൻസുകളോട് കൂടിയാണ് വിവോ V9 ന്റെ പിൻക്യാമറ സ്ഥിതി ചെയ്യുന്നത്. ക്യാമറക്ക് താഴെയായി എൽ.ഇ.ഡി. ഫ്‌ളാഷ് ലൈറ്റ് സ്ഥിതി ചെയ്യുന്നു. ഫിംഗർ പ്രിന്റ് സ്‌കാനർ പിറകുവശത്താണ് സ്ഥിതി ചെയ്യുന്നത്. വളരെ റെസ്പോൺസീവ് ആയ ഫിംഗർ പ്രിന്റ് സ്‌കാനർ ആണെങ്കിലും സ്കാനറിന്റെ സ്ഥലം അല്പം മുകളിലായ പോലെ ചിലർക്കെല്ലാം ചിലപ്പോൾ തോന്നിയേക്കാം.

ബട്ടണുകൾ

പവർ ബട്ടൺ, വോളിയം ബട്ടണുകൾ എന്നിവ ഫോണിന്റെ വലതു ഭാഗത്തും സിം ഇടാനുള്ള ട്രേ ഇടതു ഭാഗത്തുമായി സ്ഥിതി ചെയ്യുന്നു. 3.5 എം എം ഓഡിയോ ജാക്ക്, മൈക്രോഫോൺ, യുഎസ്ബി 2.0 ചാർജിങ്ങ് പോർട്ട്, സ്പീക്കേഴ്സ് എന്നിവ ഫോണിന്റെ താഴെയായാണ് സെറ്റ് ചെയ്തിരിക്കുന്നത്. എന്നാൽ സി ടൈപ്പ് പോർട്ട് ഇല്ല എന്നത് ഫോണിനെ സംബന്ധിച്ചുള്ള ഒരു ന്യൂനതയാണ്.

1080x2280 റെസൊല്യൂഷനോട് കൂടിയ 6.3" ഫുൾ എച്ച് ഡി ഡിസ്പ്ലേ

403 പിപിഐ സാന്ദ്രതയോട് കൂടിയ 6.3 ഇഞ്ചിന്റെ ഫുൾ എച്ച് ഡി പ്ലസ് ഡിസ്പ്ലേ തന്നെയാണ് ഫോണിന്റെ എടുത്തുപറയേണ്ട പ്രധാന പ്ലസ് പോയിന്റുകളിൽ ഒന്ന്. 1080x2280 റെസൊല്യൂഷനോട് കൂടി ഐപിഎസ് എൽസിഡിയിലാണ് ഡിസ്പ്ലേ നിർമിച്ചിരിക്കുന്നത്. ഇതേ വില നിലവാരത്തിലുള്ള മറ്റു ഫോണുകളുമായി താരതമ്യം ചെയ്യുമ്പോൾ തീർത്തും അതിശയകരമായ റിസൾട്ടണ് ഈ ഫോൺ ഞങ്ങൾക്ക് തന്നത്.

19:9 സ്ക്രീൻ അനുപാതത്തിലുള്ള വലിയ സ്‌ക്രീനിൽ ചിത്രങ്ങളും വിഡിയോകളും എല്ലാം തന്നെ നല്ലപോലെ എടുത്തുകാണിച്ചു. പക്ഷെ നിലവിൽ ഈ അനുപാതത്തിലുള്ള ഡിസ്‌പ്ലേയ്ക്കൾക്കുള്ള ആപ്പുകളുടെ പിന്തുണ കുറവായതിനാൽ താഴെയും മുകളിലും ആ ഭാഗങ്ങൾ കറുത്ത വരകളായി മാത്രം ഒഴിഞ്ഞു നിന്നു. പക്ഷെ നാളെ ആപ്പുകൾ എല്ലാം തന്നെ ഈ സൈസിനോട് ചേരുന്ന രീതിയിലുള്ള ആപ്പ് പിന്തുണ കൂടെ നൽകുമ്പോൾ ഈ പ്രശ്നം തീരാവുന്നതേയുള്ളൂ.

24 മെഗാപിക്സൽ വൈഡ് ആംഗിൾ സെൽഫി ക്യാമറ

24 മെഗാപിക്സൽ വൈഡ് ആംഗിൾ മുൻക്യാമറയാണ് ഫോണിന്റെ എടുത്തുപറയേണ്ട മറ്റൊരു പ്രത്യേകത. ആർട്ടിഫിഷ്യൽ ഇന്റലിജൻസിന്റെ സഹായത്തോടെ ദൃശ്യങ്ങളെ സ്വയം മനനസ്സിലാക്കി ചിത്രങ്ങളെടുക്കാൻ ഈ ക്യാമറ സഹായിക്കും. എടുത്ത ചിത്രങ്ങളെല്ലാം തന്നെ മനോഹരമായിരുന്നു. എല്ലാം തന്നെ തെളിച്ചമുള്ളവയും വ്യക്തതയുള്ളവയും ആയിരുന്നു.

പിറകിലെ ക്യാമറയിലെ 16 എംപിയുടെയും 5 എംപിയുടെയും രണ്ടു ലെൻസുകളും ചേർന്ന് ഒരുവിധം എല്ലാത്തരത്തിലുള്ള ചിത്രങ്ങളും എടുക്കാൻ സഹായിക്കുന്നുണ്ട്. Face Beauty video call, HDR, AR stickers, Portrait mode തുടങ്ങി എല്ലാ ഫീച്ചറുകളും ഈ ക്യാമറയിൽ ലഭ്യമാണ്. 4k യിൽ 30 എഫ് പി എസ്സിൽ എടുത്ത വീഡിയോ നിലവാരം പുലർത്തുന്നതായിരുന്നു.

Qualcomm Snapdragon പ്രോസസർ, 4ജിബി റാം, ആൻഡ്രോയിഡ് ഓറിയോ

ഓറിയോ 8.1 അധിഷ്ഠിത ആൻഡ്രോയിഡ് ഓപ്പറേറ്റിങ് സിസ്റ്റമാണ് ഫോണിനുള്ളത്. 4ജിബി റാമും 2.2GHz octa-core CPU യുമുള്ള ഫോണിന്റെ പ്രൊസസർ Qualcomm Snapdragon 626 ആണ്. ഫോണിന്റെ 3250 mAh ബാറ്ററി ഒരുദിവസം പൂർണ്ണമായും നിങ്ങൾക്ക് ഉപയോഗിക്കാൻ സാധിക്കും.