​IP68+ IP69 റേറ്റിങ് ഒക്കെയുണ്ട്! ചൈനീസ് മോഡലിനെക്കാൾ മികച്ച ക്യാമറകളുമായി വിവോ X200 FE ലോഞ്ച് ചെയ്തു

ചൈനയ്ക്ക് പുറത്തുള്ള തങ്ങളുടെ ആഗോള ആരാധകർക്കായി വിവോ ഒരു പുതിയ സ്മാർട്ട്ഫോൺ ആഗോള തലത്തിൽ അ‌വതരിപ്പിച്ചിരിക്കുന്നു. ​ചൈനയിൽ ലോഞ്ച് ചെയ്ത വിവോ എസ്30 പ്രോ മിനി എന്ന സ്മാർട്ട്ഫോൺ മോഡലാണ് ഇപ്പോൾ വിവോ എക്സ്200 എഫ്ഇ (vivo X200 FE) എന്ന പേരിൽ ആഗോള തലത്തിൽ അ‌വതരിപ്പിച്ചിരിക്കുന്നത്. കോംപാക്ട് സ്മാർട്ട്ഫോണുകൾ ഉപയോഗിക്കാൻ ഇഷ്ടപ്പെടുന്ന ആളുകളെ ലക്ഷ്യമിട്ടാണ് ഈ ഫോൺ ഡി​സൈൻ ചെയ്തിരിക്കുന്നത്. 6.31 ഇഞ്ച് മാത്രമാണ് ഈ ഫോണിന്റെ ഡിസ്പ്ലേ വലിപ്പം. ഇന്ത്യയിലും ഈ X200 FE അ‌വതരിപ്പിക്കുമെന്ന് വിവോ സ്ഥീരീകരിച്ചെങ്കിലും ലോഞ്ച് തിയതി പ്രഖ്യാപിച്ചിട്ടില്ല.

ആഗോള ലോഞ്ച് കഴിഞ്ഞതിനാൽ ജൂ​ലൈയിൽ തന്നെ വിവോ X200 FEയുടെ ഇന്ത്യൻ ലോഞ്ചും പ്രതീക്ഷിക്കാം. മീഡിയടെക് ഡൈമെൻസിറ്റി 9300+ ചിപ്സെറ്റ് കരുത്തിലാണ് ഈ വിവോ ഫോൺ എത്തിയിട്ടുള്ളത്. ചൈനീസ് മോഡലിൽ ഇല്ലാതിരുന്ന ZEISS ഒപ്റ്റിക്‌സ് പിന്തുണ ആഗോള വിപണികൾക്കായി അ‌വതരിപ്പിച്ച X200 FEയിൽ ഉണ്ട് എന്നത് ശ്രദ്ധേയമാണ്.

വിവോ X200 FE യുടെ പ്രധാന ഫീച്ചറുകൾ: 120Hz റിഫ്രഷ് റേറ്റുള്ള 6.31 ഇഞ്ച് (2640 x 1216 പിക്സലുകൾ) 1.5K LTPO AMOLED സ്ക്രീൻ, 4320Hz ഹൈ ഫ്രീക്വൻസി PWM ഡിമ്മിംഗ്, 5000 nits വരെ പീക്ക് ബ്രൈറ്റ്നസ് എന്നിവ ഇതിലുണ്ട്.

ഒക്ട-കോർ ​​ഡൈമെൻസിറ്റി 9300+ 4nm ചിപ്സെറ്റ് കരുത്തിനൊപ്പം ഇമ്മോർട്ടാലിസ്-G720 ജിപിയു, 12GB LPDDR5X റാം, 512GB UFS 3.1 സ്റ്റോറേജ് എന്നിവയും വിവോ X200 FE വാഗ്ദാനം ചെയ്യുന്നുണ്ട്. ആൻഡ്രോയിഡ് 15 അ‌ടിസ്ഥാനമാക്കിയുള്ള ഫൺടച്ച് OS 15ൽ ആണ് ഈ ഫോണിന്റെ പ്രവർത്തനം.

ട്രിപ്പിൾ റിയർ ക്യാമറ സജ്ജീകരണമാണ് വിവോ X200 FE അ‌വതരിപ്പിച്ചിരിക്കുന്നത്. അ‌തിൽ സോണി IMX921 സെൻസറുള്ള 50MP മെയിൻ ക്യാമറ (f/1.88 അപ്പേർച്ചർ, OIS), 8MP 106° അൾട്രാ-വൈഡ് ക്യാമറ (f/2.2 അപ്പേർച്ചർ), ZEISS ഒപ്റ്റിക്സ് പിന്തുണയുള്ള 50MP IMX882 3x പെരിസ്കോപ്പ് ടെലിഫോട്ടോ ക്യാമറ (f/2.65 അപ്പേർച്ചർ), ഓറ ലൈറ്റ് എന്നിവ അ‌ടങ്ങുന്നു.

സെൽഫിക്കും വീഡിയോ കോളുകൾക്കുമായി f/2.0 അപ്പേർച്ചറോട് കൂടിയ 50MP ഓട്ടോഫോക്കസ് ഫ്രണ്ട് ക്യാമറയും ഇതിലുണ്ട്. ഇൻ-ഡിസ്പ്ലേ ഒപ്റ്റിക്കൽ ഫിംഗർപ്രിന്റ് സെൻസർ, USB ടൈപ്പ്-C ഓഡിയോ, സ്റ്റീരിയോ സ്പീക്കറുകൾ, ഹൈ-റെസ് ഓഡിയോ, പൊടിയും വെള്ളവും പ്രതിരോധിക്കുന്ന IP68 + IP69 റേറ്റിങ്സ് എന്നിവയും ഇതിലുണ്ട്.

ഡ്യുവൽ സിം (നാനോ + നാനോ), 5G SA/NSA, ഡ്യുവൽ 4G VoLTE, Wi-Fi 7 802.11 be (2.4GHz + 5GHz), ബ്ലൂടൂത്ത് 5.4, GPS (L1 + L5), USB ടൈപ്പ്-C, NFC, 90W ഫാസ്റ്റ് ചാർജിംഗുള്ള 6500mAh ബാറ്ററി എന്നിവയാണ് വിവോ X200 FE 5ജിയുടെ മറ്റ് പ്രധാന ഫീച്ചറുകൾ. 150.83×71.76×7.99mm വലിപ്പവും 186 ഗ്രാം ഭാരവും ഇതിനുണ്ട്.

വിവോ X200 FE 5ജിയുടെ 12GB + 512GB മോഡലിന് 3199 RM (ഏകദേശം 64,805 രൂപ) ആണ് വില. ബ്ലാക്ക് ലക്സ്, യെല്ലോ ഗ്ലോ, പിങ്ക് വൈബ്, ബ്ലൂ ബ്രീസ് നിറങ്ങളിൽ ഈ ഫോൺ ലഭ്യമാണ്. ജൂ​ലൈ 4ന് ആണ് വിൽപ്പന ആരംഭിക്കുക. അ‌തുവരെ പ്രീ ബുക്കിങ് സൗകര്യം ഉണ്ട്.