ഒറ്റയടിക്ക് ആ വിവോ ഫോണിന് 10000 രൂപ വില കുറഞ്ഞു; ചിന്തിക്കുന്നവർക്ക് കാരണം കിട്ടും, നല്ലൊരു ഫോണും!

പ്രമുഖ ​ചൈനീസ് സ്മാർട്ട്ഫോൺ ബ്രാൻഡായ വിവോ തങ്ങളുടെ പ്രീമിയം സ്മാർട്ട്ഫോണുകളിൽ ഒന്നായ വിവോ എക്സ് 90 പ്രോയുടെ ( Vivo X90 Pro) വിലയിൽ ഒറ്റയടിക്ക് പതിനായിരം രൂപയുടെ കുറവ് വരുത്തിയിരിക്കുകയാണ്. ഇപ്പോൾ ഇന്ത്യയിൽ നടന്നുകൊണ്ടിരിക്കുന്ന ഫെസ്റ്റിവൽ സെയിലുകൾ കണക്കിലെടുത്താണ് ഈ വിലക്കുറവ് എന്നാണ് റിപ്പോർട്ട്.

എന്നാൽ ഈ വിലക്കുറവിന്റെ കാരണം ഇതുതന്നെയാണോ എന്ന് ഒന്ന് ആഴത്തിൽ ചിന്തിച്ചാൽ ഏതൊരാൾക്കും നിസാരമായി മനസിലാക്കാവുന്നതേയുള്ളൂ. ഇപ്പോഴത്തെ ഈ വിലക്കുറവിനെപ്പറ്റിയുള്ള വിലയിരുത്തലിന് മുമ്പ് ഈ ഫോണിനെക്കുറിച്ച് ഒന്ന് പരിചയപ്പെടാം. ഈ വർഷം ഏപ്രിലിലാണ് വിവോ എക്സ് 90 പ്രോ ഇന്ത്യൻ വിപണിയിൽ അ‌വതരിപ്പിക്കപ്പെട്ടത്.

ഏകദേശം 84,999 രൂപ വിലയിലാണ് വിവോ എക്സ്90 പ്രോ ഇന്ത്യയിൽ ലോഞ്ച് ചെയ്തത്. ഈ ഫോൺ ആണ് ഇപ്പോൾ പതിനായിരം രൂപ വിലക്കുറവിൽ 74,999 രൂപയ്ക്ക് ഈ ഫോൺ ഓൺ​ലൈനിൽ ലിസ്റ്റ് ചെയ്തിരിക്കുന്നു. ഈ വിലക്കുറവ് ന്യായമാണോ എന്ന പരിശോധിക്കും മുമ്പ് വിവോ എക്സ്90 പ്രോയുടെ പ്രധാന ഫീച്ചറുകൾ പരിചയപ്പെടാം.

വിവോ എക്സ്90 പ്രോയുടെ പ്രധാന ഫീച്ചറുകൾ: 6.78 ഇഞ്ച് കർവ്ഡ് ഡിസ്‌പ്ലേയാണ് ഇതിലുള്ളത്. 120Hz റിഫ്രഷ് റേറ്റും ZEISS നാച്ചുറൽ കളർ 2.0യും ശക്തമായ ഡ്യുവൽ സ്റ്റീരിയോ സ്പീക്കറുകളും ഒപ്പമുണ്ട്. മീഡിയടെക് ഡിമെൻസിറ്റി 9200 പ്രോസസർ ആണ് ഈ ഫോണിന്റെ കരുത്ത്.

12GB വരെ LPDDR5 റാമും 256GB UFS 4.0 സ്റ്റോറേജും വിവോ എക്സ്90 പ്രോയിൽ സജ്ജീകരിച്ചിരിക്കുന്നു. ആൻഡ്രോയിഡ് 13 അടിസ്ഥാനമാക്കിയുള്ള ഫൺടച്ച്ഒഎസ് കസ്റ്റം സ്‌കിന്നിൽ ആണ് പ്രവർത്തിക്കുന്നത്. 5G, 4G LTE, Wi-Fi 6, ബ്ലൂടൂത്ത് 5.2, GPS, ഒരു USB ടൈപ്പ്-C പോർട്ട് എന്നിവ ഈ ഫോൺ വാഗ്ദാനം ചെയ്യുന്നു.

എക്സ്90 പ്രോയ്ക്ക് വളരെ വലിയ 1 ഇഞ്ച് മെയിൻ ക്യാമറ അ‌ടങ്ങുന്ന ട്രിപ്പിൾ റിയർ ക്യാമറ സജ്ജീകരണമാണ് ഉള്ളത്. 50MP പ്രൈമറി സെൻസർ, 50MP പോർട്രെയ്റ്റ് സെൻസർ, 12MP അൾട്രാവൈഡ് സെൻസർ എന്നിവ അ‌ടങ്ങുന്നതാണ് ഈ ട്രിപ്പിൾ റിയർ ക്യാമറ. ഇതോടൊപ്പം 32MP ഫ്രണ്ട് ക്യാമറയുമുണ്ട്.

ഇൻ-ഡിസ്‌പ്ലേ ഫിംഗർപ്രിന്റ് സെൻസർ, സ്റ്റീരിയോ സ്പീക്കറുകൾ, aptX HD, ഹൈ-റെസ് ഓഡിയോ എന്നിങ്ങനെ ഒട്ടേറെ ഫീച്ചറുകളും ഈ പ്രീമിയം വിവോ ഫോണിലുണ്ട്. 120W ഫാസ്റ്റ് വയർഡ് ചാർജിംഗും 50W വയർലെസ് ചാർജിംഗും ഉള്ള 4,870mAh ബാറ്ററിയാണ് വിവോ എക്സ്90 പ്രോയിൽ നൽകിയിരിക്കുന്നത്.

ഇപ്പോൾ വിലക്കുറവ് പ്രഖ്യാപിച്ചതോടെ വിവോ എക്സ്90 പ്രോയുടെ 12GB റാം +256GB ഇന്റേണൽ സ്റ്റോറേജ് വേരിയന്റ് 74,999 രൂപയ്ക്ക് ലഭ്യമാകുന്നു. ഇതിന് പുറമേ ബാങ്ക് ഓഫറുകളും ഫ്ലിപ്പ്കാർട്ട് വാഗ്ദാനം ചെയ്യുന്നുണ്ട്. എക്സ്ചേഞ്ച് ഓഫർ പൂർണമായും പ്രയോജനപ്പെടുത്തിയാൽ 45,150 രൂപയുടെ ഡിസ്കൗണ്ട് വരെ നേടാനാകുമെന്ന് ഫ്ലിപ്പ്കാർട്ട് പേജ് പറയുന്നു.

24 മാസത്തെ നോ-കോസ്റ്റ് ഇഎംഐ ഓപ്ഷൻ, വിവോ വി-ഷീൽഡ് പ്രൊട്ടക്ഷൻ പ്ലാനുകളിൽ 40 ശതമാനം വരെ ഡിസ്കൗണ്ട് എന്നിങ്ങനെ ചില ഓഫറുകളും വിവോ എക്സ്90 പ്രോയ്ക്ക് ഫ്ലിപ്പ്കാർട്ടിൽ കാണുന്നുണ്ട്. എക്സ്ചേഞ്ച് ഓഫർ സഹിതം 40000 രൂപയിൽ താഴെ വിലയിൽ ഈ ഫോൺ വാങ്ങാൻ സാധിച്ചാൽ അ‌ത് നേട്ടമാണ്.

എന്നാൽ, ഇപ്പോൾ ഉണ്ടായിരിക്കുന്ന 10000 രൂപ വിലക്കുറവ് മാത്രം കണ്ട് ഈ ഫോൺ വാങ്ങാൻ പുറപ്പെടുന്നവർ ഈ 75000 രൂപ വിലയിൽ വിപണിയിൽ ലഭ്യമാകുന്ന മറ്റ് ഫോണുകൾ ഏതൊക്കെയാണ് എന്നുകൂടി മനസിലാക്കുന്നത് തീരുമാനം എടുക്കാൻ ഏറെ സഹായിക്കും. കാരണം ഐഫോൺ 14, സാംസങ് ഗാലക്സി എസ്23 തുടങ്ങിയ മോഡലുകളും ഇതിനോടടുത്ത വിലയിൽ ലഭ്യമാണ്.