Xiaomi 13 | കാത്തിരിപ്പിനൊടുവിൽ എഴുന്നെള്ളത്ത്; ഷവോമിയുടെ കൊമ്പന്മാർ ഡിസംബർ 1നെത്തും

എംഐയുഐ 14 ഒഎസുമായിട്ടാണ് ഷവോമി 13, ഷവോമി 13 പ്രോ മോഡലുകൾ എത്തുന്നത്. ഇക്കാര്യത്തിൽ ഷവോമി ഔദ്യോഗിക സ്ഥിരീകരണം നൽകിക്കഴിഞ്ഞു. ഷവോമി 13 സീരീസിനൊപ്പം രണ്ട് ഉത്പന്നങ്ങൾ കൂടി ഷവോമി അവതരിപ്പിക്കുന്നുണ്ട്. ഷവോമിയുടെ വാച്ച് എസ്2, ബഡ്സ് 4 TWS ഇയർബഡ്സ് എന്നിവയാണ് ചൈനയിൽ ഡിസംബർ ഒന്നിന് പുറത്തിറങ്ങുന്ന മറ്റ് ഗാഡ്ജറ്റുകൾ.

ഷവോമി 13 സീരീസിലെ ഡിവൈസുകളെക്കുറിച്ചുണ്ടായിരുന്ന ഏറ്റവും വലിയ റൂമറുകളിൽ ഒന്ന് ഡിവൈസുകളിൽ ലഭ്യമാകുന്ന ക്യാമറ സെൻസറുകളെക്കുറിച്ചാണ്. എല്ലാ അഭ്യൂഹങ്ങൾക്കും അവസാനം കുറിച്ച് 13 സീരീസിലെ സ്മാർട്ട്ഫോണുകൾ ലെയ്ക്ക സെൻസറുകളുമായി വരുമെന്ന് ഷവോമി സ്ഥിരീകരിച്ചിട്ടുണ്ട്. ഷവോമി പങ്കിട്ട ഔദ്യോഗിക പോസ്റ്ററിലാണ് ഈ വെളിപ്പെടുത്തൽ ഉണ്ടായിരുന്നത്.

ഷവോമി 13, ഷവോമി 13 പ്രോ സ്മാർട്ട്ഫോണുകൾ ക്വാൽകോം സ്നാപ്പ്ഡ്രാഗൺ 8 ജെൻ 2 ഒക്ട കോർ പ്രോസസർ പാക്ക് ചെയ്യുമെന്നാണ് റിപ്പോർട്ടുകൾ. ഇത് ശരിയാണെങ്കിൽ ഫ്ലാഗ്ഷിപ്പ് സെഗ്മെന്റിലെ എണ്ണം പറഞ്ഞ മോഡലുകൾ ആയിരിക്കും ഷവോമി 13, ഷവോമി 13 പ്രോ സ്മാർട്ട്ഫോണുകൾ എന്ന കാര്യത്തിൽ തർക്കം കാണില്ല.

ഷവോമി 13 പ്രോ സ്മാർട്ട്ഫോൺ അടുത്തിടെ ഗീക്ക്ബെഞ്ചിൽ ലിസ്റ്റ് ചെയ്ചതായി കണ്ടെത്തിയിരുന്നു. 2210132C എന്ന മോഡൽ നമ്പറുമായിട്ടാണ് ഗീക്ക്ബെഞ്ച് ലിസ്റ്റിങിൽ ഷവോമി 13 പ്രോ മോഡൽ വരുന്നത്. 2.2 ഗിഗാഹെർട്സ് സ്പീഡ് ഉള്ള മൂന്ന് എഫിഷ്യൻസി കോറുകൾ ഉള്ള ഒക്ട കോർ പ്രോസസറുമായാണ് ഡിവൈസ് ലിസ്റ്റ് ചെയ്തിരിക്കുന്നത്. ഒപ്പെ തന്നെ പ്രൈമറി കോർ 3.19 ഗിഗാഹെർട്സ് ക്ലോക്ക് സ്പീഡും ഓഫർ ചെയ്യുന്നു.

മോഡൽ നമ്പർ 2210132C ൽ ലിസ്റ്റ് ചെയ്തിരിക്കുന്ന ഡിവൈസ് സിംഗിൾ കോർ, മൾട്ടി കോർ ടെസ്റ്റുകളിൽ യഥാക്രമം 1504 ഉം 5342 ഉം പോയിന്റുകൾ സ്കോർ ചെയ്തെന്നാണ് ഗീക്ക്ബെഞ്ച് റിപ്പോർട്ട്. ഗീക്ക്ബെഞ്ച് റെക്കോർഡ്സ് അനുസരിച്ച് ലിസ്റ്റ് ചെയ്തിരിക്കുന്ന ഡിവൈസ് ആൻഡ്രോയിഡ് 13 ഓപ്പറേറ്റിങ് സിസ്റ്റത്തിലാണ് പ്രവർത്തിക്കുന്നത്.

ഷവോമി 13 പ്രോ സ്മാർട്ട്ഫോൺ 12 ജിബി റാം പാക്ക് ചെയ്യുമെന്നും സൂചനകൾ ഉണ്ട്. 2 കെ റെസല്യൂഷൻ ഉള്ള 6.7 ഇഞ്ച് സാംസങ് ഇ6 അമോലെഡ് ഡിസ്പ്ലെയാണ് ഷവോമി 13 പ്രോ സ്മാർട്ട്ഫോണിൽ പ്രതീക്ഷിക്കുന്നത്. ഡിവൈസിന്റെ സ്ക്രീൻ 120 ഹെർട്സ് റിഫ്രഷ് റേറ്റും ഓഫർ ചെയ്യും.

റൂമറുകൾ അനുസരിച്ച് രണ്ട് റാം വേരിയന്റുകളായിരിക്കും ഷവോമി 13 പ്രോ സ്മാർട്ട്ഫോൺ ഓഫർ ചെയ്യുക. 8 ജിബി, 12 ജിബി റാം ഓപ്ഷനുകൾ. 128 ജിബി, 256 ജിബി, 512 ജിബി ഇന്റേണൽ സ്റ്റോറേജ് ഓപ്ഷനുകളിലും ഷവോമി 13 പ്രോ സ്മാർട്ട്ഫോൺ ലഭ്യമാകും.

ട്രിപ്പിൾ റിയർ ക്യാമറ സജ്ജീകരണമാണ് ഷവോമി 13 സീരീസിലെ സ്മാർട്ട്ഫോണുകളിൽ പ്രതീക്ഷിക്കുന്നത്. 50 എംപി സോണി ഐഎംഎക്സ്989 സെൻസറായിരിക്കും പ്രൈമറി ക്യാമറയായി ഡിവൈസിൽ ഉണ്ടായിരിക്കുക. 50 എംപി അൾട്ര വൈഡ് ആംഗിൾ ലെൻസും 50 എംപി ടെലിഫോട്ടോ ലെൻസും ഈ റിയർ ക്യാമറ സജ്ജീകരണത്തിൽ പ്രതീക്ഷിക്കാവുന്നതാണ്.

സെൽഫികൾക്കും വീഡിയോ കോളുകൾക്കുമായി 32 എംപി ഫ്രണ്ട് ക്യാമറയും ഷവോമി 13 സീരീസിലെ ഡിവൈസുകൾ പാക്ക് ചെയ്യാൻ സാധ്യതയുണ്ട്. 4800 mAh ബാറ്ററി, 120W ഫാസ്റ്റ് ചാർജിങ് സപ്പോർട്ട് തുടങ്ങിയ ഫീച്ചറുകളും ഈ സീരീസിലെ ഡിവൈസുകളിൽ പ്രതീക്ഷിക്കുന്നുണ്ട്. എന്തായാലും എല്ലാ അഭ്യൂഹങ്ങളും ഡിസംബർ 1ന് അവസാനിക്കും.