ഫ്രണ്ട്, റിയർ ക്യാമറകൾ ഉശിരൻ, ചിപ്സെറ്റ് ​കെങ്കേമം! ഷവോമി സിവി 5 പ്രോ ലോഞ്ച് ചെയ്തു

പല മികവുകൾ ഒന്നിച്ച് ചേരുമ്പോൾ അ‌ത് ഒരു വലിയ മികവായി മാറുന്നു. അ‌ത്തരമൊരു വലിയ മികവ് എന്ന് പുതിയ ​ഷവോമി സിവി 5 പ്രോ 5ജിയെ (Xiaomi CIVI 5 Pro) വിശേഷിപ്പിക്കാം. ​ചൈനയിൽ നടന്ന ലോകം ഉറ്റുനോക്കിയ ലോഞ്ച് ഇവന്റിൽ വച്ച് കൊതിപ്പിക്കുന്ന നിരവധി ഫീച്ചറുകൾ സഹിതം സിവി5 പ്രോ 5ജി ഷവോമി ലോഞ്ച് ചെയ്തു. മികച്ച ഫോട്ടോഗ്രാഫി സമ്മാനിക്കാൻ ശേഷിയുള്ള ഫ്രണ്ട്, റിയർ ക്യാമറകൾ ആണ് ഈ സ്മാർട്ട്ഫോണിന്റെ മുഖ്യ ആകർഷണങ്ങളിലൊന്ന്. അൾട്രാ-ട്രാൻസ്പറന്റ് നാനോ-പ്രിസം ഉള്ള സാംസങ്ങിന്റെ ആദ്യത്തെ JNP സെൻസർ, +25% ഫോട്ടോസെൻസിറ്റിവിറ്റി എന്നിവ ഇതിലുണ്ട്.

ക്യാമറയുടെ കാര്യത്തിൽ മാത്രമല്ല, പെർഫോമൻസിന്റെ കാര്യത്തിലും ഈ ഫോൺ കിടുവാണ്. സ്നാപ്ഡ്രാഗൺ 8s ജെൻ 4 ചിപ്സെറ്റ് കരുത്തിലാണ് ഈ ഫോൺ എത്തുന്നത്. ഇതിന് പിന്തുണയുമായി 16GB വരെ LPPDDR5x റാം, 512GB വരെ UFS 4.0 സ്റ്റോറേജ് എന്നിവയും ഉണ്ട്.

എത്ര കടുത്ത ടാസ്ക് നൽകിയാലും ചൂടാകാതെ, കൂളായി ​പ്രവർത്തിക്കാൻ ത്രീ ​ഡൈമെൻഷണൽ റിംഗ് കൂളിംഗ് ഇതിലുണ്ട്. റിംഗ് കൂളിംഗ് പമ്പും ഉയർന്ന താപ ചാലകത ഗ്രാഫൈറ്റും താപനിലയെ തുടർച്ചയായി നിയന്ത്രിക്കുകയും മികച്ച പെർഫോമൻസ് വാഗ്ദാനം ചെയ്യുകയും ചെയ്യുന്നു. ഡി​സൈന്റെ കാര്യമെടുത്താൽ, ഐസ്ഡ് അമേരിക്കാനോ സ്പെഷ്യൽ എഡിഷനിൽ പ്രകൃതിദത്ത കാപ്പി പൊടികളുള്ള ബാക്ക് ഷെൽ മെറ്റീരിയൽ ഉണ്ട്.

ഷവോമി സിവി 5 പ്രോ 5ജിയുടെ പ്രധാന ഫീച്ചറുകൾ: 6.55 ഇഞ്ച് (2750 x 1236 പിക്സലുകൾ) 1.5K C8 12-ബിറ്റ് OLED 20:9ഡിസ്പ്ലേ, 120Hz റിഫ്രഷ് റേറ്റ്, 240Hz ടച്ച് സാമ്പിൾ റേറ്റ്, 3200 nits വരെ പീക്ക് ബ്രൈറ്റ്നസ്, HDR10+, ഡോൾബി വിഷൻ, 2160Hz PWM ഡിമ്മിംഗ്, DC ഡിമ്മിംഗ്, കോർണിംഗ് ഗൊറില്ല ഗ്ലാസ് വിക്ടസ് 2 പ്രൊട്ടക്ഷൻ എന്നിവ ഇതിലുണ്ട്.

ഒക്ട കോർ സ്നാപ്ഡ്രാഗൺ 8s Gen 4 4nm മൊബൈൽ പ്ലാറ്റ്ഫോം ആണ് ഈ ഫോണിന്റെ കരുത്ത്. അഡ്രിനോ 825 GPU, 12GB / 16GB LPPDDR5x റാം, 256GB / 512GB UFS 4.0 സ്റ്റോറേജ് എന്നീ റാം+ സ്റ്റോറേജ് ഓപ്ഷനുകൾ എന്നിവയും ഇതിലുണ്ട്. ഷവോമി ഹൈപ്പർഒഎസ് അ‌ടിസ്ഥാനമാക്കിയാണ് പ്രവർത്തനം.

ട്രിപ്പിൾ റിയർ ക്യാമറ സജ്ജീകരണമാണ് സിവി 5 പ്രോയിൽ ഷവോമി സജ്ജീകരിച്ചിരിക്കുന്നത്. അ‌തിൽ
1/ 1.55″ ലൈറ്റ് ഫ്യൂഷൻ 800 സെൻസറുള്ള 50MP മെയിൻ ക്യാമറ (f/1.63 അപ്പർച്ചർ, ഹൈപ്പർ OIS, LED ഫ്ലാഷ്, ലെയ്ക സമ്മിലക്സ് ലെൻസ്), 12MP 120° അൾട്രാ-വൈഡ് ആംഗിൾ ലെൻസ് (f/2.2 അപ്പേർച്ചർ), 50MP 60mm ടെലിഫോട്ടോ ക്യാമറ (f/2.0 അപ്പേർച്ചർ, OIS, 10cm മാക്രോ, 4K വീഡിയോ റെക്കോർഡിംഗ്) എന്നിവയടങ്ങുന്നു.

സെൽഫിക്കും മറ്റുമായി സാംസങ് JNP സെൻസറുള്ള 50MP ഓട്ടോ ഫോക്കസ് ഫ്രണ്ട്-ഫേസിംഗ് ക്യാമറയും ( f/2.0 അപ്പേർച്ചർ) സജ്ജീകരിച്ചിട്ടുണ്ട്. ഇൻ-ഡിസ്പ്ലേ ഫിംഗർപ്രിന്റ് സെൻസർ, ഇൻഫ്രാറെഡ് സെൻസർ, USB ടൈപ്പ്-സി ഓഡിയോ, ഹൈ-റെസ് ഓഡിയോ, സ്റ്റീരിയോ സ്പീക്കറുകൾ, ഡോൾബി അറ്റ്മോസ്, ഡ്യുവൽ സിം (നാനോ + നാനോ) എന്നിവയും ഇതിലെ ഫീച്ചറുകളുടെ കൂട്ടത്തിൽപ്പെടുന്നു.

5G SA/NSA, ഡ്യുവൽ 4G VoLTE, Wi-Fi 7 802.11 be, Bluetooth 5.4, Beidou, Galileo, GLONASS, GPS (L1 + L5), NavIC, USB Type-C 3.2 Gen 1, NFC, 67W ഫാസ്റ്റ് ചാർജിംഗുള്ള 6000mAh ബാറ്ററി എന്നിവയാണ് ഷവോമി സിവി 5 പ്രോയിലെ മറ്റ് പ്രധാന ഫീച്ചറുകൾ.

വില: ഷവോമി സിവി 5 പ്രോയുടെ 12GB + 256GB അ‌ടിസ്ഥാന വേരിയന്റിന് 2999 യുവാൻ (ഏകദേശം 35,795 രൂപ) ആണ് വില. 12GB + 512GB വേരിയന്റിന് 3299 യുവാനും (ഏകദേശം 39,380 രൂപ), ടോപ്പ്-എൻഡ് 16GB + 512GB വേരിയന്റിന് 3599 യുവാനും (ഏകദേശം 42,960 രൂപ) വില നിശ്ചയിച്ചിരിക്കുന്നു.