ഇന്ത്യയിൽ ഒരു ചായയുടെ വിലയെക്കാൾ കുറഞ്ഞ ചെലവിൽ 1GB ഡാറ്റ കിട്ടും: നരേന്ദ്ര മോദി

ഇന്ത്യയിൽ സാധാരണക്കാരായ ടെലിക്കോം ഉപയോക്താക്കളുടെ കുടുംബ ബജറ്റ് ഉയർത്തിക്കൊണ്ട് ടെലിക്കോം കമ്പനികൾ റീച്ചാർജ് പ്ലാൻ നിരക്കുകൾ ഉയർത്തിയത് ഏറെ പ്രതിഷേധങ്ങൾക്ക് ഇടയാക്കിയിരുന്നു. അ‌ന്ന് കേന്ദ്ര സർക്കാരിനെതിരേയും വിമർശനങ്ങൾ ഉയർന്നു. പക്ഷേ മറ്റ് രാജ്യങ്ങളിലെ നിരക്ക് വച്ച് നോക്കിയാൽ ഇന്ത്യയിലെ ടെലിക്കോം നിരക്കുകൾ വളരെ കുറഞ്ഞതാണ് എന്ന വിചിത്ര വാദമുയർത്തിയാണ് ചിലർ നിരക്ക് വർധനവിന് എതിരായ പ്രതിഷേധങ്ങളെ പ്രതിരോധിച്ചത്. ഇപ്പോൾ പുതിയ നിരക്കുകളുമായി ഉപയോക്താക്കൾ പഴകി വരുന്നതിനിടെ ഇന്ത്യയിലെ ഡാറ്റ നിരക്കുകൾ കുറവാണ് എന്നത് നേട്ടമായി ഉയർത്തിക്കാട്ടി പ്രധാനമന്ത്രി നരേന്ദ്ര മോദി ​തന്നെ രംഗത്തെത്തിയിരിക്കുന്നു.

ഇന്ത്യയിൽ ഒരു ജിബി വയർലെസ് ഡാറ്റയുടെ വില ഇപ്പോൾ ഒരു കപ്പ് ചായയുടെ വിലയേക്കാൾ കുറവാണെന്ന് നരേന്ദ്ര മോദി ചൂണ്ടിക്കാട്ടി. ഏഷ്യയിലെ ഏറ്റവും വലിയ ടെലികോം, മീഡിയ, ടെക്നോളജി ഇവന്റായ ഇന്ത്യ മൊബൈൽ കോൺഗ്രസ് (ഐഎംസി) 2025 ന്റെ 9-ാമത് എഡിഷൻ ന്യൂഡൽഹിയിൽ ഉദ്ഘാടനം ചെയ്തു പ്രസംഗിക്കവേയാണ് പ്രധാനമന്ത്രി ഇക്കാര്യം പറഞ്ഞത്.

ഓരോ യൂസറുടെയും ഡാറ്റ ഉപഭോഗത്തിന്റെ കാര്യത്തിൽ ഇന്ത്യ മുൻനിര രാജ്യങ്ങൾക്കൊപ്പമാണ് എന്ന് അ‌ദ്ദേഹം എടുത്തുപറഞ്ഞു. ഡിജിറ്റൽ കണക്റ്റിവിറ്റി ഇനി ആഡംബരമല്ല, മറിച്ച് ദൈനംദിന ജീവിതത്തിന്റെ അവിഭാജ്യ ഘടകമാണെന്ന് ഇത് സൂചിപ്പിക്കുന്നു. രാജ്യത്തിന്റെ സാധ്യതകൾക്കൊപ്പം ഉറച്ചുനിൽക്കുന്ന ഒരു സർക്കാർ സാധ്യമാക്കിയ ഈ വളർച്ചയ്ക്ക് നൂതനാശയക്കാരും സ്റ്റാർട്ടപ്പുകളും കാരണമായിട്ടുണ്ടെന്ന് പ്രധാനമന്ത്രി അഭിപ്രായപ്പെട്ടു.

ഇന്ത്യയുടെ സാങ്കേതിക വളർച്ചയെ അദ്ദേഹം പ്രശംസിക്കുകയും ക്വാണ്ടം കമ്മ്യൂണിക്കേഷൻ, 6 ജി, ഒപ്റ്റിക്കൽ കമ്മ്യൂണിക്കേഷൻ, സെമികണ്ടക്ടറുകൾ, സാമ്പത്തിക തട്ടിപ്പ് പ്രതിരോധം തുടങ്ങിയ മേഖലകളിലെ സ്റ്റാർട്ടപ്പുകളുടെ പ്രധാന കണ്ടുപിടുത്തങ്ങൾ എടുത്തുകാണിക്കുകയും ചെയ്തു. 5G, 6G, അഡ്വാൻസ്ഡ് ഒപ്റ്റിക്കൽ കമ്മ്യൂണിക്കേഷൻസ്, ടെറാ-ഹെർട്‌സ് തുടങ്ങിയ സാങ്കേതികവിദ്യകൾക്കായി സർക്കാർ ടെസ്റ്റ് ബെഡുകൾക്ക് ധനസഹായം നൽകുന്നുണ്ടെന്ന് അദ്ദേഹം പറഞ്ഞു.

ടെലികോം ടെക്‌നോളജി ഡെവലപ്‌മെന്റ് ഫണ്ട്, ഡിജിറ്റൽ കമ്മ്യൂണിക്കേഷൻസ് ഇന്നൊവേഷൻസ് സ്‌ക്വയർ തുടങ്ങിയ സംരംഭങ്ങളിലൂടെ സ്റ്റാർട്ടപ്പുകൾക്ക് ധനസഹായം ലഭിക്കുന്നുണ്ട്. സ്റ്റാർട്ടപ്പുകളും മുൻനിര ഗവേഷണ സ്ഥാപനങ്ങളും തമ്മിലുള്ള സഹകരണം സുഗമമാക്കുന്നുണ്ടെന്നും സർക്കാർ പിന്തുണയോടെ ഇന്ത്യൻ വ്യവസായം, സ്റ്റാർട്ടപ്പുകൾ, അക്കാദമികൾ എന്നിവ വിവിധ മേഖലകളിൽ സഹകരിക്കുന്നുണ്ടെന്നും അദ്ദേഹം ഊന്നിപ്പറഞ്ഞു.

മുൻകാല ഭരണകൂടങ്ങളുടെ കാലത്ത് പുതിയ സാങ്കേതികവിദ്യകൾ സ്വീകരിക്കുന്നതിൽ പതിറ്റാണ്ടുകളുടെ കാലതാമസം ഉണ്ടായിരുന്നതായി അ‌ദ്ദേഹം ചൂണ്ടിക്കാട്ടി, "ഇന്ത്യ മൊബൈൽ കോൺഗ്രസും ടെലികോം മേഖലയിലെ ഇന്ത്യയുടെ വിജയവും ആത്മനിർഭർ ഭാരത് ദർശനത്തിന്റെ ശക്തിയും പ്രതിഫലിപ്പിക്കുന്നു," എന്ന് അ‌ദ്ദേഹം പറഞ്ഞു. ഒരുകാലത്ത് 2G യുമായി ബുദ്ധിമുട്ടിയിരുന്ന രാജ്യത്ത് ഇപ്പോൾ മിക്കവാറും എല്ലാ ജില്ലകളിലും 5G കവറേജ് ഉണ്ടെന്ന് പ്രധാനമന്ത്രി എടുത്തുപറഞ്ഞു.

2014 മുതൽ ഇലക്ട്രോണിക്സ് ഉൽപ്പാദനം ആറ് മടങ്ങ് വർദ്ധിച്ചു, മൊബൈൽ ഫോൺ നിർമ്മാണം ഇരുപത്തിയെട്ട് മടങ്ങ് വളർന്നു, അതേസമയം കയറ്റുമതി നൂറ്റി ഇരുപത്തിയേഴ് മടങ്ങ് വർദ്ധിച്ചു. കഴിഞ്ഞ ദശകത്തിൽ, മൊബൈൽ ഫോൺ നിർമ്മാണ മേഖല ദശലക്ഷക്കണക്കിന് നേരിട്ടുള്ള തൊഴിലവസരങ്ങൾ സൃഷ്ടിച്ചുവെന്നും നരേന്ദ്ര മോദി പറഞ്ഞു.

ഇന്ത്യ അ‌ടുത്തിടെ ഔദ്യോഗികമായി ലോഞ്ച് ചെയ്ത 4G സ്റ്റാക്കിനെപ്പറ്റിയും പ്രധാനമന്ത്രി പരാമർശിച്ചു. ''ഇത് ഒരു പ്രധാന തദ്ദേശീയ നേട്ടമായി അടയാളപ്പെടുത്തി, ഇതോടെ ഇന്ത്യ ഇപ്പോൾ ആഗോളതലത്തിൽ ഈ ശേഷിയുള്ള അഞ്ച് രാജ്യങ്ങളുടെ പട്ടികയിൽ ചേർന്നു''. തദ്ദേശീയ 4G, 5G സ്റ്റാക്കിലൂടെ ഇന്ത്യ തടസ്സമില്ലാത്ത കണക്റ്റിവിറ്റി ഉറപ്പാക്കുക മാത്രമല്ല, പൗരന്മാർക്ക് അതിവേഗ ഇന്റർനെറ്റും വിശ്വസനീയമായ സേവനങ്ങളും നൽകുമെന്ന് അദ്ദേഹം പറഞ്ഞു.