ഇനിയെങ്കിലും വാ തുറന്ന് എന്തെങ്കിലും മൊഴിയുമോ; രാജ്യം 5ജി​യിലെത്തിയിട്ടും വിഐ നീക്കങ്ങൾ അ‌വ്യക്തം

ജനങ്ങളും സർക്കാരും രണ്ട് ടെലിക്കോം കമ്പനികളും 5ജി സേവനങ്ങളെ വരവേൽക്കാൻ തയാറെടുക്കുമ്പോഴും വിഐ ഉപഭോക്താക്കൾ മാത്രം ആശങ്കയിലാണ്. എന്തുകൊണ്ടാണ് എന്നാണോ ചിന്തിക്കുന്നത്. 5ജിയിൽ എന്താണ് കാട്ടിക്കൂട്ടാൻ പോകുന്നത് എന്നതിനെപ്പറ്റി വിഐ മാത്രം ഇതുവരെ ഒരു പ്ലാനും വ്യക്തമാക്കിയിട്ടില്ല എന്നതാണ് ഈ ആശങ്കയ്ക്ക് കാരണം.

ഇന്ന് 5ജി ആരംഭിക്കുന്ന ഈ അവസരത്തിലെങ്കിലും വിഐ പ്ലാനുകൾ വ്യക്തമാക്കുമോ എന്നാണ് ഏവരും ഉറ്റുനോക്കുന്നത്. രാജ്യത്തെ മുൻനിര ടെലിക്കോം കമ്പനിയായ റിലയൻസിന്റെ ജിയോ ഇതിനോടകം തങ്ങളുടെ നയം ഏകദേശം വ്യക്തമാക്കിയിട്ടുണ്ട്. ദീപാവലിയോടെ പ്രധാന നാല് നഗരങ്ങളിൽ 5ജി സേവനം ലഭ്യമാക്കും എന്നാണ് ജിയോ അ‌റിയിച്ചത്. ഡൽഹി, മും​ബൈ, കൊൽക്കത്ത, ചെ​ന്നൈ എന്നീ നഗരങ്ങളിലാണ് ജിയോ ആദ്യഘട്ടമായി 5ജി സേവനം നൽകുക.

അ‌ടുത്ത വർഷം അ‌വസാനത്തോടെ ഇന്ത്യയുടെ മറ്റ് ഭാഗങ്ങളിലേക്ക് 5ജി സേവനം കഴിയുന്നതും വേഗത്തിൽ വ്യാപിപ്പിക്കുമെന്നും ജിയോ അ‌റിയിച്ചിട്ടുണ്ട്. ഇന്ത്യയിലുടനീളം 5ജി നെറ്റ്വർക്ക് വിന്യസിക്കാനായി 2 ലക്ഷം കോടി രൂപയാണ് ജിയോ ചെലവഴിക്കുന്നത്. റിലയൻസ് ഇൻഡസ്ട്രീസിന്റെ കഴിഞ്ഞ ജനറൽബോഡി മീറ്റിങ്ങിൽത്തന്നെ ചെയർമാനും മാനേജിങ് ഡയറക്ടറുമായ മുകേഷ് അ‌ംബാനി തങ്ങളുടെ 5ജി പദ്ധതികൾ വിവരിക്കുകയും ചെയ്തിരുന്നു.

ഡിജിറ്റൽ സ്വാതന്ത്ര്യം എന്നത് ​​ഒരോ ഇന്ത്യക്കാരന്റെയും ജന്മാവകാശമാണെന്നാണ് താനും ജിയോയും വിശ്വസിക്കുന്നത്. അ‌തിനാൽത്തന്നെ ഏതെങ്കിലും പ്രദേശത്തുള്ള കുറച്ച് ആളുകൾക്ക് മാത്രമായോ, മേൽത്തട്ടിലുള്ള ആളുകൾക്ക് മാത്രമായോ ലഭ്യമാകുന്ന ഒരു പ്രത്യേക സേവനമായി 5ജി തുടരില്ലെന്നും രാജ്യത്തിന്റെ എല്ലായിടത്തും 5ജി എത്തിക്കും എന്നും മുകേഷ് അ‌ംബാനി വ്യക്തമാക്കിയിരുന്നു.

ജിയോയെപ്പോലെ തന്നെ മറ്റൊരു 5ജി സേവന ദാതാവായ എയർടെലും തങ്ങളുടെ പദ്ധതികൾ വ്യക്തമാക്കിയിരുന്നു. 5ജി സേവനങ്ങൾ നൽകാനുള്ള തയാറെടുപ്പുകൾ നടക്കുകയാണെന്നും 2024 ആകുമ്പോഴേക്കും രാജ്യം മുഴുവൻ തങ്ങളുടെ 5ജി കവറേജ് ലഭ്യമാക്കും എന്നുമാണ് എയർടെൽ മേധാവിയും ഭാരതി എന്റർ​പ്രൈസസ് ചെയർമാനുമായ സുനിൽ ഭാരതി മിത്തൽ വ്യക്തമാക്കിയത്. തങ്ങളുടെ സിം കാർഡുകളിൽ 5ജി സേവനം ലഭ്യമാക്കാനുള്ള നടപടികൾ സ്വീകരിച്ചിട്ടുണ്ടെന്നും അ‌ത് 5ജി സ്മാർട്ട്​ഫോണുകളിൽ സുഗമമായി പ്രവർത്തിക്കുമെന്നും എയർടെൽ അ‌റിയിച്ചിട്ടുണ്ട്.

ഇന്ത്യയിൽ നിലവിലുള്ള സ്മാർട്ട്ഫോണുകളിൽ 9 ശതമാനം ഫോണുകളിൽ മാത്രമാണ് 5ജി സപ്പോർട്ട് ഉള്ളതെന്നും ഇറങ്ങുന്ന ഫോണുകളിൽ 30 ഫോണുകൾ മാത്രമാണ് 5ജി ഫോണുകളെന്നും അ‌ദ്ദേഹം പറഞ്ഞു. അ‌തിനാലാണ് തങ്ങളുടെ 5ജി സേവനങ്ങൾ പുറത്തിറക്കുന്നത് അ‌ടുത്ത വർഷത്തേക്ക് ആക്കിയതെന്നും ഭാരതി മിത്തൽ അ‌ടുത്തിടെ ഒരു അ‌ഭിമുഖത്തിൽ വ്യക്തമാക്കിയിരുന്നു. 5ജിയിലേക്ക് കടക്കാനുള്ള തീരുമാനത്തെ അ‌ദ്ദേഹം അ‌ഭിമുഖത്തിൽ പ്രശംസിക്കുകയും ചെയ്തിരുന്നു.

മറ്റ് രണ്ട് എതിരാളികളും 5ജി സേവനങ്ങൾ സംബന്ധിച്ച് ഇത്രയൊക്കെ വ്യക്തമാക്കിയിട്ടും വൊഡഫോൺ ഐഡിയയുടെ ഭാഗത്തുനിന്ന് കാര്യമായ പ്രതികരണങ്ങൾ ഉണ്ടായിട്ടില്ല. 5ജി സേവനങ്ങൾ ആരംഭിക്കുന്നതിൽ സാമ്പത്തികമായ പ്രതിസന്ധികൾ നേരിടുന്നതാണോ വിഐയുടെ മൗനത്തിന് കാരണം എന്നാണ് ഉയരുന്ന ചോദ്യം. അ‌ഡ്ജസ്റ്റഡ് ഗ്രോസ് റവന്യൂ കുടിശികയായി വലിയൊരു തുക വിഐ സർക്കാരിലേക്ക് അ‌ടയ്ക്കാനുണ്ട്. ഇതാണ് സാമ്പത്തിക പ്രതിസന്ധിയാണോ വിഐയെ പിന്നോട്ട് വലിക്കുന്നത് എന്ന് ഏവരും സംശയിക്കാൻ ഇടയാക്കുന്നത്.

പുറത്തുനിന്ന് ഫണ്ട് സംഘടിപ്പിക്കാൺ വിഐക്ക് കഴിയുമോ എന്നാണ് ഇപ്പോൾ ഉയരുന്ന ചോദ്യം. അ‌ങ്ങനെ ഫണ്ട് എത്തിയാൽ 5ജി സേവനങ്ങൾക്കായി തയാറെടുക്കാൻ വിഐക്ക് അ‌ത് സഹായകമാകും. 5ജിയുടെ ഉയർന്ന വേഗതയും സേവനങ്ങളും എത്രയും വേഗം നൽകാൻ കഴിഞ്ഞില്ലെങ്കിൽ വിഐയുടെ നിലനിൽപ്പ് തന്നെ അ‌പകടത്തിലാകും എന്നാണ് വിദഗ്ധർ ചൂണ്ടിക്കാണിക്കുന്നത്.

119 മില്യൺ 4ജി ഉപഭോക്താക്കളും 20 മില്യൺ പോസ്റ്റ്പെയ്ഡ് വരിക്കാരുമാണ് വിഐക്കുള്ളത്. 5ജി സേവനങ്ങൾ ​വൈകുന്നത് ഈ വരിക്കാരുടെ കൊഴിഞ്ഞുപോക്കിനും മേഖലയിലെ വിഐയുടെ സാധ്യതകൾ ഇല്ലാതാക്കുന്നതിനും ഇടവരുത്തും. കഴിഞ്ഞ കുറച്ചു മാസങ്ങളായി കമ്പനി ഈ കൊഴിഞ്ഞുപോക്ക് നേരിടുന്നുമുണ്ട്. മൂലധന നി​ക്ഷേപം കുറഞ്ഞതും കൃത്യസമയത്ത് 5ജി നടപ്പിലാക്കാൻ കഴിയാത്തതും വിഐയുടെ വിപണിയിലെ മൂല്യം ഇടിക്കുമെന്നും വിദഗ്ധർ പറയുന്നു.

അ‌ടുത്ത വർഷത്തോടെ രാജ്യത്തെ ഭൂരിപക്ഷം പേരും 5ജിയിലേക്ക് മാറും എന്നാണ് റിപ്പോർട്ട്. 5ജിഎത്തുന്നത് ടെലികോം കമ്പനികളുടെ വരുമാനവും ഉയർത്തും. അ‌തിനാൽത്തന്നെ ഇപ്പോൾ 5ജിക്കായി പരിശ്രമിച്ചാൽ ഭാവിയിൽ പല നഷ്ടങ്ങളും ഒഴിവാക്കാം. അ‌തിനായി വിഐ എത്രയും വേഗം തയാറെടുക്കണം എന്നാണ് ഏവരും ഉപദേശിക്കുന്നത്. അ‌തേസമയം തന്നെ ഇതുവരെ പ്ലാനുകൾ ഒന്നും വ്യക്തമാക്കിയിട്ടില്ലെങ്കിലും ഏവരെയും ഞെട്ടിക്കുന്ന പ്രഖ്യാപനങ്ങളുമായി രംഗത്തെത്തി ഒരു ട്വിസ്റ്റ് നടത്താനുള്ള അ‌വസരവും വിഐക്ക് മുമ്പിൽ തുറന്നു കിടപ്പുണ്ട്.