അമേരിക്കയില്‍ പോകാന്‍ ആഗ്രഹിക്കുന്നവര്‍ ഫെയ്‌സ്ബുക്കിലും ട്വിറ്ററിലും ഇക്കാര്യങ്ങള്‍ ചെയ്യരുത്

1. രാഷ്ട്രീയം വേണ്ട

അമേരിക്കന്‍ വിരുദ്ധ നയങ്ങളെ കുറിച്ചോ അമേരിക്കയെ എതിര്‍ക്കുന്ന രാഷ്ട്രീയക്കാരെ പറ്റിയോയുള്ള പോസ്റ്റുകള്‍ ഒഴിവാക്കുക. റീട്വീറ്റ് പോലും ചെയ്യരുത്.

2. അക്രമത്തെ പ്രോത്സാഹിപ്പിക്കരുത്

അക്രമത്തെയോ ഒരു പ്രത്യേക വിഭാഗത്തോടുള്ള വിവേചനത്തെയോ പ്രോത്സാഹിപ്പിക്കുന്ന പോസ്റ്റുകള്‍ അമേരിക്കന്‍ വിസ ലഭിക്കാനുള്ള നിങ്ങളുടെ സാധ്യത ഇല്ലാതാക്കും.

3. പാര്‍ട്ടി പടങ്ങള്‍ ദോഷം ചെയ്യും

മദ്യം, മയക്കുമരുന്നുകള്‍, പുകവലി മുതലായവ ഇഷ്ട സര്‍വ്വകലാശാലയിലേക്കുള്ള പ്രവേശനവും ആഗ്രഹിച്ച ജോലിയും നിങ്ങളില്‍ നിന്ന് തട്ടിപ്പറിക്കുമെന്ന് ഓര്‍ക്കുക.

4. സ്ഥിരതാമസത്തെ കുറിച്ച് മിണ്ടരുത്

പഠനത്തിന് ശേഷം അമേരിക്കയില്‍ സ്ഥിര താമസമാക്കാന്‍ ശ്രമിക്കുന്ന വിദ്യാര്‍ത്ഥികളെ അമേരിക്കന്‍ ഭരണകൂടം കര്‍ശനമായി നിരീക്ഷിക്കുന്നുണ്ട്. അതിനാല്‍ അത്തരം കാര്യങ്ങളില്‍ മൗനമാണ് നല്ലത്.

5. ക്രോധം, അശ്ലീലം എന്നിവ ദോഷകരം

സമൂഹമാധ്യമങ്ങളിലെ നിങ്ങളുടെ പോസ്റ്റുകള്‍ ഈ ഗണങ്ങളില്‍ പെടുന്നതാണെങ്കില്‍ അമേരിക്കന്‍ വിസ പ്രതീക്ഷിക്കുകയേ വേണ്ട.

6. പോസ്റ്റുകള്‍ ഡിലീറ്റ് ചെയ്യരുത്, അക്കൗണ്ട് പ്രൈവറ്റ് ആക്കരുത്

പോസ്റ്റുകള്‍ ഡിലീറ്റ് ചെയ്ത് രക്ഷപ്പെട്ടുകൂടേ എന്ന് ചിന്തിക്കുന്നവരുണ്ടാകും. നിങ്ങള്‍ക്ക് തെറ്റി. പോസ്റ്റുകള്‍ ഡിലീറ്റ് ചെയ്യുന്നതും അക്കൗണ്ടുകള്‍ പ്രൈവറ്റ് ആക്കിമാറ്റുന്നതും നിങ്ങളെ സംശയത്തിന്റെ നിഴലില്‍ നിര്‍ത്തും. പിന്നെ അമേരിക്കന്‍ വിസ ലഭിക്കുന്നത് അത്ര എളുപ്പമാകില്ല.