ഒറിജിനലിനെ വെല്ലുന്ന വ്യാജൻ; പ്രധാനമന്ത്രിയുടെ സൗജന്യ ലാപ്ടോപ് പദ്ധതി എന്ന പേരിൽ വ്യാജ വെബ്​സൈറ്റ്

ഹയർസെക്കൻഡറി, ബിരുദ വിദ്യാർഥികൾക്ക് പ്രധാനമന്ത്രി സൗജന്യ ലാപ്ടോപ് സ്കീം 2023-2024 പദ്ധതി വഴി സൗജന്യ ലാപ്ടോപ്പ് നൽകുന്നു എന്ന് അ‌റിയിച്ചുകൊണ്ട് വ്യാജവെബ്​സൈറ്റ്. സർക്കാരിന്റെ ​ഔദ്യോഗിക വെബ്​സൈറ്റിനോട് സാദൃശ്യം തോന്നുന്ന തരത്തിൽ www.pmflsgovt.in എന്ന വെബ്​സൈറ്റാണ് പ്രവർത്തിച്ചു വന്നത്. അ‌ശ്രദ്ധമൂലം ഇത് വ്യാജ വെബ്​സൈറ്റ് ആണ് എന്ന് മനസിലാക്കാതെ ചില ദേശീയ മാധ്യമങ്ങൾ ഇത് സംബന്ധിച്ച് വാർത്ത നൽകി.

മലയാളത്തിലെ പല( ഗിസ്ബോട്ട് മലയാളം ഉൾപ്പെടെ ) മാധ്യമങ്ങളിലും ഇത് സംബന്ധിച്ച വാർത്ത വരികയുണ്ടായി. എന്നാൽ പിന്നീട് ഇത് വ്യാജ വെബ്​സൈറ്റ് ആണെന്ന് തിരിച്ചറിഞ്ഞതോടെ എല്ലാ ഓൺ​ലൈൻ വാർത്താ മാധ്യമങ്ങളും ഇത് സംബന്ധിച്ച വാർത്ത തങ്ങളുടെ വെബ്​സൈറ്റിൽ നിന്ന് പിൻവലിച്ചു. എന്നാൽ ഇതിനോടകം വിദ്യാർഥികൾക്ക് പ്രയോജനം ചെയ്യുന്ന പദ്ധതി എന്ന നിലയിൽ ഇതിനോടകം നിരവധി പേരിലേക്ക് ഈ വാർത്ത എത്തിയിരുന്നു.

അ‌തിനാൽത്തന്നെ മാധ്യമങ്ങളുടെ വെബ്​സൈറ്റിൽ നിന്ന് പിൻവലിച്ചെങ്കിലും പലവിധത്തിലും ഈ വാർത്തകൾ പ്രചരിക്കുന്നുണ്ട്. സർക്കാർ സംവിധാനങ്ങളുടെ ഒറിജിനൽ വെബ്​സൈറ്റിനെ തോൽപ്പിക്കുന്ന കെട്ടിലും മട്ടിലുമാണ് വ്യാജ വെബ്​സൈറ്റ് പ്രവർത്തിച്ചിരുന്നത്. കേന്ദ്ര വിദ്യാഭ്യാസ മന്ത്രാലയത്തിന്റെ കീഴിൽ പ്രധാനമന്ത്രിയുടെ സൗജന്യ ലാപ്ടോപ്പ് പദ്ധതിക്കായി തയാറാക്കിയ യഥാർഥ വെബ്​സൈറ്റ് എന്ന് തോന്നിപ്പിക്കാൻ കഴിഞ്ഞു എന്നതാണ് ഈ വ്യാജ വെബ്​​സൈറ്റിന്റെ വിജയം.

ലെനോവോ ഇന്റൽ സെലറോൺ ഡ്യുവൽ കോർ (8 GB/256 GB SSD/ Windows 11 ) ലാപ്‌ടോപ്പ് (15.6 ഇഞ്ച്, പ്ലാറ്റിനം ഗ്രേ, 1.7 കി.ഗ്രാം) ആണ് പദ്ധതിയിലൂടെ വിദ്യാർഥികൾക്ക് നൽകാനായി കേന്ദ്ര സർക്കാർ തെരഞ്ഞെടുത്തിരിക്കുന്നത് എന്നതടക്കമുള്ള വ്യാജ വിവരങ്ങളും ഒറ്റനോട്ടത്തിൽ ​ജനത്തിന് ഏറെ വിശ്വാസ്യത തോന്നും വിധത്തിൽ ഈ വ്യാജ വെബ്​​സൈറ്റിൽ നൽകിയിരുന്നു.

ഒന്നാം വർഷ ഹയർസെക്കൻഡറി വിദ്യാർഥികൾ, രണ്ടാം വർഷ ഹയർസെക്കൻഡറി വിദ്യാർഥികൾ, ബിഎ-1 സെമസ്റ്റർ , ബിഎ-2 സെമസ്റ്റർ , ബിഎ-3 സെമസ്റ്റർ , ബിഎ-4 സെമസ്റ്റർ , ബിഎ-5 സെമസ്റ്റർ , ബിഎ-6 സെമസ്റ്റർ ക്ലാസുകളിലെ വിദ്യാർത്ഥികൾക്കാണ് കേന്ദ്ര ഗവൺമെന്റിന്റെ ഈ സൗജന്യ ലാപ്ടോപ് പദ്ധതിയിലേക്ക് അ‌പേക്ഷിക്കാൻ അ‌ർഹതയുള്ളത് എന്നായിരുന്നു വ്യാജ വെബ്​സൈറ്റിൽ പറഞ്ഞിരുന്നത്.

പദ്ധതിക്കായി അ‌പേക്ഷിക്കാൻ 400 രൂപ അ‌പേക്ഷാ ഫീസായി നൽകണം എന്നത് ഉൾപ്പെടെയുള്ള നിർദേശങ്ങളും വ്യാജ വെബ്​സൈറ്റിൽ നൽകിയിരുന്നു. വിദ്യാർഥികൾ ലാപ്ടോപ് പദ്ധതിയിലേക്ക് അ‌പേക്ഷിക്കാൻ സ്റ്റുഡന്റ് ഐഡി കാർഡ് / അഡ്മിഷൻ രേഖ, ആധാർ കാർഡ്, പാസ്പോർട്ട് സൈസ് ഫോട്ടോ, ബാങ്ക് പാസ്ബുക്ക് എന്നിവ അ‌പ്ലോഡ് ചെയ്യണം എന്നത് അ‌ടക്കം നിരവധി മാർഗനിർദേശങ്ങളും ഈ വ്യാജ വെബ്​​സൈറ്റിൽ നൽകിയിരുന്നു.

രാജ്യത്തെ എല്ലാ സംസ്ഥാനങ്ങളിലുള്ള വിദ്യാർഥികൾക്കും ഈ സൗജന്യ ലാപ്ടോപ്പ് പദ്ധതിയിലേക്ക് അ‌പേക്ഷിക്കാമെന്നും 2023 മാർച്ച് 27 ആണ് പദ്ധതിയിലേക്ക് അ‌പേക്ഷിക്കാനുള്ള അ‌വസാന തീയതിയെന്നും ഈ വ്യാജ വെബ്​സൈറ്റിൽ പറഞ്ഞിരുന്നു.

വിവിധ ഘട്ടങ്ങളായാണ് രജിസ്ട്രേഷൻ നടപടികൾ പുരോഗമിക്കുക എന്നും രജിസ്‌ട്രേഷൻ നടപടികൾ ആരംഭിക്കുന്നതിനു മുമ്പ് വെബ്​സൈറ്റിൽ നിർദേശിച്ചിരിക്കുന്ന രേഖകൾ സ്‌കാൻ ചെയ്തു കോപ്പി കൈയ്യിൽ കരുതണം. അപേക്ഷയുടെ വിവിധഘട്ടങ്ങളിൽ ഇവ അപ്‌ലോഡ് ചെയ്യേണ്ടിവരുമെന്നും പദ്ധതിക്ക് അ‌പേക്ഷിക്കാനുള്ള നിർദേശങ്ങൾ എന്ന രീതിയിൽ വെബ്​സൈറ്റിൽ നൽകിയിരുന്നു.

ഇത് കണ്ട് തെറ്റിദ്ധരിക്കപ്പെട്ടാണ് ദേശീയ - പ്രാദേശിക മാധ്യമങ്ങളടക്കം ഈ പദ്ധതിയെപ്പറ്റി റിപ്പോർട്ട് ചെയ്യുകയും ജനങ്ങളിലേക്ക് ഈ തെറ്റായ വാർത്ത എത്തുകയും ചെയ്ത്. ഈ വെബ്​സൈറ്റിന്റെ ആധികാരികത പരിശോധിച്ച് ഉറപ്പാക്കുന്നതിൽ ഉണ്ടായ വീഴ്ച മാധ്യമങ്ങളെയും തെറ്റായ വിവരങ്ങൾ പ്രസിദ്ധീകരിക്കുന്നതിലേക്ക് കാര്യങ്ങൾ കൊണ്ടെത്തിക്കുകയായിരുന്നു.