'5G' ഇനി പോക്കറ്റിൽ കൊണ്ടുനടക്കാം! എയർടെൽ 5G പ്ലസ് ​മൈ ​വൈ​ഫൈ പോർട്ടബിൾ റൂട്ടർ വിൽപ്പനയ്ക്കെത്തി

എവിടെയും അ‌തിവേഗ ഡാറ്റ കണക്ഷൻ ലഭ്യമാകുന്നതിന് ഉപയോക്താക്കളെ സഹായിക്കുന്ന എയർടെൽ 5G പ്ലസ് മൈ-വൈഫൈ പോർട്ടബിൾ റൂട്ടർ ഫ്ലിപ്പ്കാർട്ടിൽ വിൽപ്പനയ്ക്ക് എത്തി. ഇന്ത്യയിലെ മുൻനിര 5G ടെലികോം ഓപ്പറേറ്റർമാരിൽ ഒന്നായ എയർടെൽ അ‌വതരിപ്പിച്ച, പോക്കറ്റിലും ബാക്ക്‌പാക്കിലും കൊണ്ടുപോകാവുന്ന ഒരു 5G ഡാറ്റാ കാർഡാണ് ഇത്.

എയർടെൽ 5G പ്ലസ് മൈ-വൈഫൈ പോർട്ടബിൾ റൂട്ടർ (Airtel 5G Plus My-wifi portable router ) ഒരു മാസം മുമ്പ് ലിസ്റ്റ് ചെയ്തിരുന്നെങ്കിലും വിൽപ്പനയ്ക്ക് ലഭ്യമായിരുന്നില്ല. ഇപ്പോൾ ഏറെ നിശബ്ദമായി ഈ ഡി​വൈസിന്റെ വിൽപ്പന ആരംഭിച്ചിരിക്കുന്നു എന്നാണ് വിവിധ റിപ്പോർട്ടുകൾ വന്നിരിക്കുന്നത്.

എയർടെൽ 5G പ്ലസ് മൈ-വൈഫൈ പോർട്ടബിൾ റൂട്ടർ വിൽപ്പന ഫ്ലിപ്പ്കാർട്ടിൽ ആരംഭിച്ചതായി ഫോൺഅ‌രീനയും ​മൈസ്മാർട്ട് ​പ്രൈസും അ‌ടക്കമുള്ള ടെക് വെബ്​സൈറ്റുകൾ റിപ്പോർട്ട് ചെയ്തു. മുൻപ് ലഭ്യമായിരുന്ന എയർടെൽ 4G ഹോട്ട്‌സ്‌പോട്ടിന് സമാനമായ ഒരു ഡി​വൈസാണ് പുതിയ എയർടെൽ 5G പ്ലസ് മൈ വൈഫൈ പോർട്ടബിൾ റൂട്ടർ/ഡാറ്റ കാർഡ്.

മുൻപുണ്ടായിരുന്ന 4ജി പോർട്ടബിൾ റൂട്ടറിൽ നിന്ന് വ്യത്യസ്തമായി, പ്രസക്തമായ വിവരങ്ങൾ കാണിക്കുന്നതിന് പുതിയ ഡി​വൈസിന്റെ ഫ്രണ്ടിലായി ഒരു ചെറിയ ഡിസ്പ്ലേ ഉണ്ട്. ഇതിൽ 5G സിഗ്നൽ സ്ട്രെങ്ത്, തീയതി, സമയം, ബാറ്ററി, കണക്റ്റുചെയ്‌ത ഉപകരണങ്ങളുടെ എണ്ണം, ഉപയോഗിച്ച ഡാറ്റ എന്നിവ ഈ ചെറിയ സ്ക്രീനിൽ കാണാൻ സാധിക്കും.

ഉപയോക്താവിന് ലഭ്യമായ ഡാറ്റയുടെ അളവിനൊപ്പം ലഭ്യമായ ആകെ ഡാറ്റ അറിയാനും ഈ ഡിസ്പ്ലേ സഹായിക്കും. ഇത് ഉപകരണത്തിൽ നിന്ന് നേരിട്ട് 5G ഡാറ്റയുടെ ഉപയോഗം നിയന്ത്രിക്കുന്നത് എളുപ്പമാക്കും. കൂടാതെ ഡാറ്റ ഉപയോഗത്തിനായി എയർടെൽ ആപ്ലിക്കേഷൻ പരിശോധിക്കേണ്ടതിന്റെ ആവശ്യകത ഇത് ഇല്ലാതാക്കുന്നു. ഈ സ്ക്രീനിന് ലോക്ക് സൗകര്യവും ഉണ്ട് എന്നാണ് സൂചന.

എയർടെൽ 5G പ്ലസ് കണക്റ്റിവിറ്റി ലഭിക്കാൻ സഹായിക്കുന്ന ഒരു ഡി​വൈസാണ് എയർടെൽ 5G പ്ലസ് My-WiFi MF501 ഡാറ്റ കാർഡ്. ഇത് പ്രധാനമായും ഒരു പോർട്ടബിൾ വൈഫൈ റൂട്ടറാണ്, ഒരാളുടെ ബാക്ക്പാക്കിലോ പോക്കറ്റിലോ ഇത് കൊണ്ടുനടക്കാം. വൈഫൈ നെറ്റ്‌വർക്ക് ലഭിക്കുന്നത് ബുദ്ധിമുട്ടുള്ള മേഖലകളിൽ തടസ്സമില്ലാത്തതും വേഗതയേറിയതുമായ ഇന്റർനെറ്റ് കണക്റ്റിവിറ്റി നൽകുക എന്നതാണീ ഡി​വൈസിന്റെ ലക്ഷ്യം.

ഈ ഡി​വൈസ് ​ചൈനയിൽ നിർമിച്ചതാണ് എന്ന് ലിസ്റ്റിങ് പറയുന്നു. MF501 എന്നതാണ് ഇതിന്റെ ഉൽപ്പന്ന മോഡൽ നമ്പർ. എയർടെൽ 5G പ്ലസ് ​മൈ ​വൈ​ഫൈ പോർട്ടബിൾ റൂട്ടർ ബോക്‌സിൽ സിം റിമൂവൽ പിൻ, ടൈപ്പ് സി യുഎസ്ബി കേബിൾ എന്നിവയും ലഭിക്കുന്നു.

ഈ ഡി​വൈസിന്റെ മുകളിൽ ഒരു പവർ ബട്ടണും ഒരു സിം സ്ലോട്ടും ഉണ്ട്, യുഎസ്ബി ടൈപ്പ്-സി പോർട്ട് താഴെ നൽകിയിരിക്കുന്നു. 512എംബി വരെ സ്റ്റോറേജ് വികസിപ്പിക്കാവുന്ന മെമ്മറി കാർഡ് സ്ലോട്ട് സംവിധാനവും ഇതിലുണ്ട്. ലിസ്റ്റിങ് വിവരങ്ങൾ പ്രകാരം, 150 എംബിപിഎസ് വേഗത വരെയാണ് ഈ ഡി​വൈസ് വാഗ്ദാനം ചെയ്യുന്നത്.

ഡാർക്ക് ബ്ലൂ, ബ്ലാക്ക് എന്നീ നിറങ്ങളിലാണ് ഈ 5ജി ഡി​വൈസ് എത്തുന്നത്. എയർടെൽ 5G പ്ലസ് My-WiFi MF501 ഡാറ്റ കാർഡിന്റെ മാക്സിമം റീട്ടെയിൽ ​പ്രൈസ് 29,990 രൂപയാണ്. എന്നാൽ, 'സ്പെഷ്യൽ ​പ്രൈസിൽ' ഈ ഡി​വൈസ് 22,999 രൂപയ്ക്ക് സ്വന്തമാക്കാമെന്ന് ഫ്ലിപ്പ്കാർട്ട് പറയുന്നു. 6 മാസത്തെ വാറന്റിയോടെയാണ് ഈ ഡി​വൈസ് എത്തുന്നത്.