സാധനങ്ങൾ വാങ്ങാൻ നിരവധി ഓഫറുകൾ, ഒപ്പം വീഡിയോകളും കാണാം; ​പ്രൈം ​ലൈറ്റ് പ്ലാൻ അ‌വതരിപ്പിച്ച് ആമസോൺ

ഇന്ത്യയിലെ ഉപയോക്താക്കൾക്കായി ആമസോൺ പുതിയ ​പ്രൈം ലൈറ്റ് ​പ്ലാൻ അ‌വതരിപ്പിച്ചു. നിലവിലുള്ള ​പ്രൈം പ്ലാനിന്റെ അ‌ൽപ്പം നിരക്ക് കുറഞ്ഞ ഒരു രൂപമാണ് ആമസോൺ ​പ്രൈം ​ലൈറ്റ് പ്ലാൻ. ഈ പ്ലാൻ ഇതിനോടകം തന്നെ നിലവിലുണ്ടായിരുന്നു, എങ്കിലും തെരഞ്ഞെടുക്കപ്പെട്ട ഉപയോക്താക്കൾക്ക് മാത്രമാണ് ലഭ്യമാക്കിയിരുന്നത്.

എല്ലാ ഉപയോക്താക്കൾക്കും ലഭ്യമാകുന്ന വിധത്തിൽ ഇപ്പോഴാണ് ആമസോൺ ​പ്രൈം ​ലൈറ്റ് പ്ലാൻ അ‌വതരിപ്പിക്കുന്നത്. ​പ്രൈം പ്ലാനിന്റെ നിരക്കും ​പ്രൈം ​ലൈറ്റിന്റെ പ്ലാൻ നിരക്കും തമ്മിൽ കാര്യമായ വ്യത്യാസം ഉള്ളതുപോലെ അ‌വയിൽ ലഭ്യമാകുന്ന ആനുകൂല്യങ്ങൾക്കും ചെറിയ വ്യത്യാസങ്ങളുണ്ട്. ​പ്രൈം ​ലൈറ്റ് പ്ലാനിന് 999 രൂപയാണ് നിരക്ക്.

ഒരു വർഷ വാലിഡിറ്റിയോടെ ആണ് ​​999 രൂപയുടെ പ്രൈം ​ലൈറ്റ് പ്ലാൻ എത്തുന്നത്. യഥാർഥ ​​പ്രൈം പ്ലാൻ മൂന്ന് വ്യത്യസ്ത കാലയളവുകളിലേക്ക് തെരഞ്ഞെടുക്കാം. ഒരു മാസത്തേക്കുള്ള ​പ്രൈം പ്ലാനിന് 299 രൂപയും, ​മൂന്നു മാസത്തേക്കുള്ള ​പ്രൈം പ്ലാനിന് 599 രൂപയും ഒരു വർഷത്തേക്കുള്ള ​പ്രൈം പ്ലാനിന് 1499 രൂപയുമാണ് ചെലവാകുക.

ഒരു വർഷത്തേക്കുള്ള ​യഥാർഥ പ്രൈം പ്ലാൻ സ്വന്തമാക്കാൻ സാമ്പത്തിക ബുദ്ധിമുട്ട് അ‌നുഭവിക്കുന്നവർക്ക് തെരഞ്ഞെടുക്കാൻ അ‌നുയോജ്യമായ വിധത്തിലാണ് ​പ്രൈം ​ലൈറ്റ് പ്ലാൻ രൂപകൽപ്പന ചെയ്തിരിക്കുന്നത്. ​മുൻപുണ്ടായിരുന്ന പ്രൈം വാർഷിക പ്ലാനിന്റെ നിരക്ക് ആണ് ഇപ്പോൾ ​പ്രൈം ​ലൈറ്റ് പ്ലാനിന് നൽകിയിരിക്കുന്നത് എന്നതാണ് ഈ പ്ലാനുകളുടെ നിരക്ക് സംബന്ധിച്ചുള്ള രസകരമായ ഒരു വസ്തുത.

ആനുകൂല്യങ്ങളുടെ കാര്യത്തിൽ ​യഥാർഥ ​പ്രൈം പ്ലാനും ​പ്രൈം ​ലൈറ്റ് പ്ലാനും തമ്മിൽ ചെറിയ ചില വ്യത്യാസങ്ങളുണ്ട്. ​പ്രൈം ​ലൈറ്റ് അ‌ംഗങ്ങൾക്ക് സൗജന്യ 2 ഡേ ഡെലിവറിയും സ്റ്റാൻഡേർഡ് ഡെലിവറിയും ആണ് പ്ലാൻ വാഗ്ദാനം ചെയ്യുന്നത്. നിശ്ചിത മാനദണ്ഡങ്ങൾക്കുള്ളിൽ വരുന്ന വിലാസങ്ങളിലേക്ക് തിരക്കില്ലാത്ത സമയങ്ങളിൽ സൗജന്യ ഷിപ്പങ് സൗകര്യവും ലഭിക്കും.

25 ശതമാനം ക്യാഷ്ബാക്ക് ആണ് ​ആമസോൺ ​പ്രൈം ​ലൈറ്റ് പ്ലാൻ വാഗ്ദാനം ചെയ്യുന്ന മറ്റൊരു ആനുകൂല്യം. യോഗ്യരായ വിലാസങ്ങളിലേക്ക് 175 രൂപ നിരക്കിൽ ആമസോൺ മോർണിംഗ് ഡെലിവറിയും ​ലൈറ്റ് പ്ലാൻ ഓഫർ ചെയ്യുന്നു. സൗജന്യ സ്റ്റാൻഡേർഡ് ഡെലിവറിക്ക് മിനിമം ഓർഡർ വാല്യൂ പരിധിയില്ല എന്നതും നേട്ടമാണ്.

ആമസോണിൽ നിന്നുള്ള പർച്ചേസുകൾക്ക് നൽകുന്ന ആനുകൂല്യങ്ങൾക്ക് പുറമേ, പ്രൈം വീഡിയോ സ്ട്രീമിംഗ് സേവനത്തിലേക്ക് അൺലിമിറ്റഡ് ആക്‌സസും ​പ്രൈം ​ലൈറ്റ് പ്ലാൻ വാഗ്ദാനം ചെയ്യുന്നു. രണ്ട് ഉപകരണങ്ങളിൽ വരെ ഉപയോക്താക്കൾക്ക് ​പ്രൈം വീഡിയോ സ്ട്രീം ചെയ്യാം. പ്രിയപ്പെട്ട സിനിമകൾ, ടിവി ഷോകൾ, തത്സമയ സ്‌പോർട്‌സ് എന്നിവ ഹൈ ഡെഫനിഷൻ(എച്ച്‌ഡി) കാണാം എന്നതാണ് നേട്ടം.

ആമസോൺ പേ അ‌ല്ലെങ്കിൽ ഐസിഐസിഐ ബാങ്ക് ക്രെഡിറ്റ് കാർഡ് ഉണ്ടെങ്കിൽ എല്ലാ വാങ്ങലുകൾക്കും 5% ക്യാഷ്ബാക്ക് ലഭിക്കും. എങ്കിലും, ഡിജിറ്റൽ, ഗിഫ്റ്റ് കാർഡ് വാങ്ങലുകൾക്ക് ഈ ക്യാഷ്ബാക്ക് ഒഴിവാക്കിയിട്ടുണ്ട്. ഷോപ്പർമാർക്ക് ലൈറ്റ്‌നിംഗ് ഡീലുകൾ, എക്‌സ്‌ക്ലൂസീവ് ലൈറ്റ്‌നിംഗ് ഡീലുകൾ, പ്രൈം അംഗങ്ങൾക്കുള്ള ഡീൽ ഓഫ് ദി ഡേ എന്നിവ ​പ്രൈം ​ലൈറ്റ് അ‌ംഗങ്ങൾക്കും ലഭ്യമാകും.

അ‌തേസമയം യഥാർഥ ​പ്രൈം പ്ലാനിനെ അ‌പേക്ഷിച്ച്, വിലക്കുറവിന്റേതായ ചില വെട്ടിക്കുറയ്ക്കലുകൾ ആമസോൺ ​പ്രൈം ​ലൈറ്റ് പ്ലാനിൽ വരുത്തിയിട്ടുണ്ട്. ആമസോൺ ​പ്രൈം പ്ലാനിൽ വൺ ഡേ ഡെലിവറി, ഷെഡ്യൂൾ ഡെലിവറി, സെയിം ഡേ ഡെലിവറി എന്നിങ്ങനെ കുറച്ചുകൂടി വേഗത്തിലുള്ള ഡെലിവറി ആനുകൂല്യങ്ങൾ ലഭ്യമാണ്.

​പ്രൈം പ്ലാനിൽ, 50 രൂപയിൽ താഴെ വിലയുള്ളവയ്ക്കും മോർണിംഗ് ഡെലിവറി സൗകര്യം ലഭിക്കും. പ്രൈം റീഡിംഗിലേക്കും ആമസോൺ മ്യൂസിക് സ്ട്രീമിംഗ് സേവനങ്ങളിലേക്കും ​​പ്രൈം ആക്സസ് നൽകുന്നു. എന്നാൽ ​ലൈറ്റിൽ ഈ സൗകര്യങ്ങളില്ല. വീഡിയോ ആനുകൂല്യങ്ങളിലേക്ക് വന്നാൽ, പ്രൈം അംഗങ്ങൾക്ക് ഒരേസമയം ആറ് ഉപകരണങ്ങളിൽ വരെ 4K സ്ട്രീമിംഗ് ലഭ്യമാണ്.

പ്രൈം അംഗങ്ങൾക്ക് നോ കോസ്റ്റ് ഇഎംഐ, അധിക ചിലവില്ലാതെ അക്കോയുടെ 6 മാസത്തെ സൗജന്യ സ്‌ക്രീൻ റീപ്ലേസ്‌മെന്റ്, പ്രത്യേക ഗെയിമിംഗ് ഓഫറുകൾ, പ്രത്യേക ഫാമിലി ഓഫറുകൾ എന്നിവയിലേക്ക് ആക്‌സസ് ലഭിക്കും.എന്നാൽ ​ലൈറ്റ് പ്ലാനിൽ ഈ ആനുകൂല്യങ്ങളൊന്നും ഉൾപ്പെടുത്തിയിട്ടില്ല. കുറഞ്ഞ നിരക്കിലുള്ള ​ലൈറ്റ് പ്ലാനിലൂടെ ഇന്ത്യയിലെ വരിക്കാരുടെ എണ്ണം വിപുലീകരിക്കാനാണ് ആമസോൺ ലക്ഷ്യമിടുന്നത്.