ഐഫോണിന് ശേഷം ഐകാര്‍ ആയിരിക്കുമോ...!

By Sutheesh

Published: Tuesday, February 17, 2015, 11:16 [IST]

ടെക്ക് അതികായകനായ ആപ്പിള്‍ ഐഫോണിന് ശേഷം ഐകാറിന്റെ പണിപ്പുരയില്‍. വാള്‍ സ്ട്രീറ്റ് ജേര്‍ണലില്‍ പ്രസിദ്ധീകരിച്ച റിപ്പോര്‍ട്ട് പ്രകാരം, ധാരാളം ഉദ്യോഗസ്ഥരാണ് ആപ്പിളിന്റെ ഈ പദ്ധതിക്കായി ജോലിയില്‍ വ്യാപൃതരായിരിക്കുന്നത്. കമ്പനി ടൈറ്റന്‍ എന്ന കോഡ് നാമത്തിലാണ് ഈ പദ്ധതി വികസിപ്പിക്കുന്നത്. ഐപോഡ്, ഐഫോണ്‍ നിര്‍മ്മാണത്തില്‍ കാര്യമായ പങ്ക് വഹിച്ച ഫോര്‍ഡിലെ എഞ്ചിനിയര്‍ സ്റ്റീവ് ജടെസ്‌കിയെയാണ് കമ്പനി ഈ പദ്ധതിയുടെ ചുമതല ഏല്‍പ്പിച്ചിരിക്കുന്നത്.

ഓട്ടോ മൊബൈല്‍ വ്യവസായത്തിലും ആപ്പിള്‍ മറ്റ് കമ്പനികള്‍ക്ക് കടുത്ത പോരാട്ടം കാഴ്ചവയ്ക്കുമെന്നാണ് വിലയിരുത്തപ്പെടുന്നത്. ആപ്പിളിന് ഈ പദ്ധതി പൂര്‍ത്തീകരിക്കാന്‍ അഞ്ച് ബില്ല്യണ്‍ ഡോളര്‍ ചെലവ് വരുമെന്നാണ് വിദഗ്ദ്ധര്‍ വിലയിരുത്തുന്നത്. ആപ്പിള്‍ തങ്ങളുടെ തികച്ചും പുതുമയാര്‍ന്ന മേഖലയായ ഓട്ടോ മൊബൈല്‍ രംഗത്തെ പദ്ധതിയില്‍ 7 മുതല്‍ 10 വര്‍ഷത്തെ കാലയളവിലായി 2 മുതല്‍ 4 വരെ ബില്ല്യണ്‍ ഡോളര്‍ ചിലവഴിക്കാനാണ് സാധ്യത.