ഇത് ചെറിയ സാമ്പിൾ മാത്രം, മെയിൻ പിന്നാലെ വരുന്നുണ്ട്; ആവേശമായി BSNL 5G FWA ഡി​വൈസും സേവനവും

തങ്ങളുടെ 5G സേവനങ്ങൾക്ക് Q-5G അ‌ഥവാ ക്വാണ്ടം 5ജി എന്ന് പേര് നൽകിയതിന് പിന്നാലെ തന്നെ മറ്റൊരു മികച്ച നീക്കവും ബിഎസ്എൻഎൽ (BSNL) നടത്തിയിരിക്കുന്നു. ഫിക്‌സഡ് വയർലെസ് ആക്‌സസ് (FWA) സേവനങ്ങൾക്കായി ബിഎസ്എൻഎൽ ഒരു 5ജി ഡി​വൈസ് പുറത്തിറക്കിയിരിക്കുന്നു എന്നതാണ് അ‌ത്. ബിഎസ്എൻഎൽ 5ജി FWA ഡി​വൈസിന്റെ ലോഞ്ച് കഴിഞ്ഞ ദിവസം ​ഹൈദരാബാദിൽ നടന്നു. നിലവിൽ ജിയോയും എയർടെലും മാത്രമാണ് 5ജി അ‌ടിസ്ഥാനമാക്കിയുളള സേവനങ്ങൾ ലഭ്യമാക്കിയിരിക്കുന്നത്. ജിയോയുടെ 5ജി FWA സേവനങ്ങൾ ജിയോഎയർ​ഫൈബർ എന്ന പേരിലും എയർടെലി​ന്റേത് എയർടെൽഎയർ​ഫൈബർ എന്ന പേരിലും ആണ് അ‌റിയപ്പെടുന്നത്.

കൂടിക്കുഴഞ്ഞുകിടക്കുന്നു കേബിളുകളുടെയും മറ്റും സഹായം ഇല്ലാതെ തന്നെ ഇന്റർനെറ്റ് കണക്ഷൻ ലഭ്യമാക്കും എന്നതാണ് ഫിക്സഡ് വയർലെസ് ആക്സസ് ഡി​വൈസ് ഉപയോഗിച്ചുള്ള സേവനങ്ങളുടെ പ്രത്യേകത. ഭൂമിശാസ്ത്രപരമായ പ്രശ്നങ്ങൾ മൂലം ​ഫൈബർ കണക്ഷനുകൾ കടന്നുചെല്ലാൻ കഴിയാത്ത ഇടങ്ങളിലും ഇന്റർനെറ്റ് സേവനങ്ങൾ ലഭ്യമാക്കാൻ കഴിയും എന്നതാണ് ഇത്തരം എയർ​ഫൈബർ കണക്ഷനുകളുടെ പ്രത്യേകത.

ബിഎസ്എൻഎൽ അതിവേഗ 5G ഫിക്‌സഡ് വയർലെസ് ആക്‌സസ് ഡി​വൈസ്: തദ്ദേശീയമായ 4ജി അ‌വതരിപ്പിച്ചതു പോലെ ​തന്നെ തദ്ദേശീയമായ ഫിക്സഡ് വയർലെസ് ആക്സസ് ഡി​വൈസ് ആണ് ബിഎസ്എൻഎൽ അ‌വതരിപ്പിച്ചിരിക്കുന്നത്. ഇത് പ്ലഗ് ഇൻ ചെയ്‌താൽ ഒരു നിശ്ചിത പരിധിക്കുള്ളിൽ 5G സേവനം ലഭ്യമാകും.

തദ്ദേശീയ FWA ഡി​വൈസ് വഴി ഇന്റർനെറ്റ് സേവനം ലഭ്യമാക്കുന്ന രാജ്യത്തെ ആദ്യത്തെ ടെലിക്കോം കമ്പനി എന്ന നേട്ടവും ഈ ഡി​വൈസിലൂടെ ബി‌എസ്‌എൻ‌എൽ സ്വന്തമാക്കിയിരിക്കുകയാണ്. ജിയോയുടെയും എയർടെലിന്റെയും 5ജി FWA ഡി​വൈസുകൾ അ‌ഥവാ എയർ​ഫൈബർ സേവനങ്ങൾ സിം കാർഡ് അ‌ടിസ്ഥാനമാക്കിയാണ് പ്രവർത്തിക്കുന്നത്. എന്നാൽ ഈ ബിഎസ്എൻഎൽ 5ജി എഫ്ഡബ്ലുഎ ഡി​വൈസിന് സിം കാർഡ് ആവശ്യമില്ല എന്ന പ്രത്യേകതയുമുണ്ട്.

ബിഎസ്എൻഎൽ 5ജി FWA ഡി​വൈസുകൾ ഭാവിയിൽ ഏത് ബി‌എസ്‌എൻ‌എൽ ഓഫീസിൽ നിന്നും വാങ്ങാനും ഓൺലൈനായി ആക്ടിവേറ്റ് ചെയ്യാനും കഴിയും. നിലവിൽ ബിഎസ്എൻഎൽ 5ജി FWA സേവനം ​ഹൈദരാബാദിൽ ആണ് അ‌വതരിപ്പിക്കുക. തുടർന്ന് വരുംമാസങ്ങളിൽ ബംഗളുരു, പുതുച്ചേരി, വിശാഖപട്ടണം, പുനെ, ചണ്ഡീഗഡ് എന്നിവിടങ്ങളിലേക്ക് വ്യാപിപ്പിക്കും.

ഹൈദരാബാദിലെ അമീർപേട്ട് എക്‌സ്‌ചേഞ്ചിൽ നടന്ന ബിഎസ്എൻഎൽ 5ജി FWA ഡി​വൈസ് പരീക്ഷണത്തിൽ 980 Mbps വരെ വേഗത കാട്ടി എന്നാണ് റിപ്പോർട്ട്. 700 MHz ഫ്രീക്വൻസി ബാൻഡ്‌വിഡ്ത്ത് ഉപയോഗിച്ചായിരുന്നു പരീക്ഷണം നടത്തിയത്. ഭാവിയിൽ 5G FWA വഴി ഇന്ത്യയിലെ ദശലക്ഷക്കണക്കിന് MSME-കൾക്കും സർക്കാർ സ്ഥാപനങ്ങൾക്കും അ‌തിവേഗ ഇന്റർനെറ്റ കണക്ടിവിറ്റി ലഭ്യമാക്കാൻ ബിഎസ്എൻഎല്ലിന് കഴിയും എന്ന് ഈ മുന്നേറ്റം പ്രതീക്ഷ നൽകുന്നു.

ജിയോയുടെയും എയർടെലിന്റെയും എയർ​ഫൈബർ സേവനങ്ങൾ പ്രധാനമായും മെട്രോ നഗരങ്ങളെയാണ് ലക്ഷ്യം വയ്ക്കുന്നത്. എന്നാൽ ബിഎസ്എൻഎൽ ലക്ഷ്യം വയ്ക്കേണ്ടത് ടയർ II, ടയർ III നഗരങ്ങളെയാണ് എന്ന് വിദഗ്ധർ നിരീക്ഷിക്കുന്നുണ്ട്. ഇവി​ടങ്ങളിൽ ബിഎസ്എൻഎല്ലിന് വൻ സാധ്യതകൾ ഉണ്ട്. അ‌തായത് ആളുകളുടെ ഡിജിറ്റൽ ആവശ്യങ്ങൾ വർധിച്ച് വരികയാണ്. ഈ സാഹചര്യത്തിൽ എതിരാളികൾ നിലവിൽ അ‌ത്ര ശ്രദ്ധ നൽകാത്ത ഇടങ്ങളിൽ ശക്തിനേടുന്നത് ബിഎസ്എൻഎല്ലിന് ഭാവിയിൽ ഗുണം ചെയ്യുമെന്ന് ചൂണ്ടിക്കാണിക്കപ്പെടുന്നു.

ബ്രോഡ്ബാൻഡ് ഇന്റർനെറ്റ് രംഗത്ത് ബിഎസ്എൻഎല്ലിന് ആരാധകർ ഏറെയുണ്ട്. മാത്രമല്ല, എയർ​ഫൈബർ സേവനം രാജ്യവ്യാപകമായി ബിഎസ്എൻഎൽ നേരത്തെ മുതൽ നൽകിവരുന്നുമുണ്ട്. ഇതിലേക്ക് 5ജി FWA സേവനങ്ങൾ കൂടി സംയോജിപ്പിക്കുന്നതോടെ ഇന്റർനെറ്റ് ​സേവന ദാതാക്കളുടെ കൂട്ടത്തിൽ (ISP) പുതിയ ഉയരങ്ങൾ കീഴടക്കാൻ ബിഎസ്എൻഎല്ലിന് സാധിക്കും. ഈ 5ജി FWA സേവനം വെറും സാമ്പിൾ മാത്രമാണ്, മെയിൻ ആയ മൊ​ബൈൽ ഉപയോക്താക്കൾക്കുള്ള 5ജി സേവനങ്ങൾ പിന്നാലെ തന്നെ വരുന്നുണ്ട്.