സാറ്റ​ലൈറ്റ് കമ്യൂണിക്കേഷനിലും പുലിയാകാൻ BSNL; വിയാസാറ്റുമായി സഹകരിക്കും

പൊതുമേഖലാ ടെലിക്കോം കമ്പനിയായ ബിഎസ്എൻഎല്ലും (BSNL) വിയാസാറ്റ് ഇന്ത്യയും (Viasat India) വിവിധ വിഷയങ്ങളിൽ സഹകരിച്ച് പ്രവർത്തിക്കാൻ കരാറായിരിക്കുന്നു. പ്രധാനമായും ഇന്ത്യയിലെ സാറ്റലൈറ്റ് കമ്മ്യൂണിക്കേഷൻസ് (സാറ്റ്കോം) മേഖലയെ അ‌ടുത്ത തലത്തിലേക്ക് ഉയർത്തുന്ന വിധത്തിലുള്ള പ്രവർത്തനങ്ങളിൽ സഹകരിക്കാനാണ് ഇരുകമ്പനികളും തീരുമാനിച്ചിരിക്കുന്നത്. നൈപുണ്യ വികസനം, വികസിച്ചുവരുന്ന പുതിയ ടെക്നോളജികൾ, നൂതന അൺക്രൂഡ് എയർക്രാഫ്റ്റ് സൊല്യൂഷനുകളുടെ (UAVs) വാണിജ്യവൽക്കരണം എന്നിവയിൽ ശ്രദ്ധ കേന്ദ്രീകരിച്ചുകൊണ്ടാകും ഇരുകമ്പനികളും തമ്മിലുള്ള സഹകരണം മുന്നോട്ട് പോകുക. ഇന്ത്യയിലെ ഗ്രാമപ്രദേശങ്ങളിൽ കണക്റ്റിവിറ്റി വിപുലീകരിക്കുന്നതിന് സാറ്റലൈറ്റ് കമ്മ്യൂണിക്കേഷൻസ് മേഖല നിർണായകമാകും എന്ന് കരുതപ്പെടുന്നു.

പല കാരണങ്ങളാൽ കണക്ടിവിറ്റി ലഭ്യമല്ലാത്ത ഗ്രാമങ്ങളിലേക്കും ഡിജിറ്റൽ വിപ്ലവം പടർത്താൻ ബിഎസ്എൻഎൽ- വിയാസാറ്റ് സഹകരണം പ്രധാന പങ്ക് വഹിക്കും എന്ന് കരുതപ്പെടുന്നു. അ‌ടുത്തിടെ നടന്ന ഇന്ത്യൻ മൊ​ബൈൽ കോൺഗ്രസിൽ (IMC) വച്ചാണ് പരസ്പരം സഹകരിക്കാൻ ഇരുകമ്പനികളും തീരുമാനമായത്. ബിഎസ്എൻഎല്ലിന്റെ ടെക്നോളജി ശേഷികൾ ഉയർത്താൻ ഈ സഹകരണം സഹായിക്കുമെന്ന് പ്രതീക്ഷിക്കപ്പെടുന്നു.

ഇന്ത്യയിലെ ആഭ്യന്തര വിമാനങ്ങളിൽ ഇപ്പോഴും മൊബൈൽ നെറ്റ്‌വർക്ക് ഇല്ല, അത് മാറ്റേണ്ടതുണ്ട്. ഇന്ത്യൻ വിപണിക്കായി വിയാസാറ്റിന്റെ വെലാരിസ് അൺക്രൂഡ് എയർ സൊല്യൂഷനുകൾ വാണിജ്യവൽക്കരിക്കുന്നതിലും രണ്ട് കമ്പനികളും സഹകരിക്കും. അ‌തിലൂടെ അ‌ൺക്രൂവ്ഡ് എയർക്രാഫ്രറ്റ് സൊല്യൂഷനുകൾ ഉപയോഗിച്ച്, മനുഷ്യ ഇടപെടലിന്റെ ആവശ്യമില്ലാതെ യാത്രക്കാർക്ക് കണക്റ്റിവിറ്റി ഉറപ്പാക്കാൻ കഴിയും.

ബിഎസ്എൻഎല്ലും വിയാസാറ്റും അൺക്രൂവ്ഡ് ഏരിയൽ വെഹിക്കിൾസ് (UAVs), ഇന്റർനെറ്റ് ഓഫ് തിംഗ്സ് (IoT), മറ്റ് അനുബന്ധ നൂതന സാങ്കേതികവിദ്യകൾ എന്നിവയ്ക്കായി ഒരു സെന്റർ ഓഫ് എക്സലൻസ് (CoE) സ്ഥാപിക്കുമെന്ന് അ‌ധികൃതർ വെളിപ്പെടുത്തി. ഇന്ത്യയിൽ വിയാസാറ്റിന്റെ വെലാരിസ് അൺക്രൂഡ് എയർ സൊല്യൂഷനുകൾ വാണിജ്യവൽക്കരിക്കാനുള്ള ശ്രമങ്ങളും സഹകരണത്തിൽ ഉൾപ്പെടുന്നു.

വെലാരിസ് ഒരു സാറ്റ​ലൈറ്റ് കമ്യൂണിക്കേഷൻ സേവനമാണ്, ഇത് ക്രൂവില്ലാത്ത വിമാനങ്ങൾക്ക് ദൃശ്യരേഖയ്ക്ക് അപ്പുറം പ്രവർത്തിക്കുന്നതിന് സുരക്ഷിതവും വിശ്വസനീയവുമായ കണക്റ്റിവിറ്റി നൽകുന്നു. ഉയർന്ന വിശ്വാസ്യതയും സുരക്ഷ-നിർണ്ണായകവുമായ ആപ്ലിക്കേഷനുകൾക്കായി രൂപകൽപ്പന ചെയ്‌തിരിക്കുന്ന വിയാസാറ്റിന്റെ ആഗോള എൽ-ബാൻഡ് സാറ്റലൈറ്റ് നെറ്റ്‌വർക്കിലാണ് സേവനം പ്രവർത്തിക്കുന്നത്. വാണിജ്യ വ്യോമാതിർത്തിയിലേക്ക് യുഎവികളുടെ സംയോജനം പ്രാപ്തമാക്കുന്നതിന് ഈ സാങ്കേതികവിദ്യ നിർണായകമാണ്.

"3,000 മീറ്ററിൽ താഴെയുള്ള എരിയൽ പ്രവർത്തനങ്ങളെ ഉൾക്കൊള്ളുന്ന, ഡ്രോണുകളും അഡ്വാൻസ്ഡ് എയർ മൊബിലിറ്റിയും ഉൾപ്പെടുന്ന ഒരു വളർന്നുവരുന്ന മേഖലയായ ഇന്ത്യയിൽ ശക്തമായ ലോ ആൾട്ടിറ്റ്യൂഡ് സമ്പദ്‌വ്യവസ്ഥ കെട്ടിപ്പടുക്കുന്നതിനുള്ള തുടർച്ചയായ വളർച്ചയെ ബിഎസ്എൻഎൽ - വിയാസാറ്റ് സഹകരണങ്ങൾ പിന്തുണയ്ക്കുന്നു. ഇന്ത്യയുടെ ഡ്രോൺ വിപണി അതിവേഗ വളർച്ചയുടെ പാതയിലാണ്, 2030 ആകുമ്പോഴേക്കും ഗണ്യമായ വികാസം പ്രതീക്ഷിക്കുന്നു''.

''വിയാസാറ്റും ബിഎസ്എൻഎല്ലും തമ്മിലുള്ള ഈ തന്ത്രപരമായ സഹകരണം ഈ വളർച്ചയെ പിന്തുണയ്ക്കുന്നതിന് ആവശ്യമായ ആവാസവ്യവസ്ഥ സൃഷ്ടിക്കുമെന്ന് പ്രതീക്ഷിക്കുന്നു," എന്ന് ഇരു കമ്പനികളും സംയുക്ത പ്രസ്താവനയിൽ പറഞ്ഞു. ''BRBRAITT ലെ സെന്റർ ഓഫ് എക്സലൻസ് നിർണായക കഴിവുകളുള്ള ഒരു പുതിയ തലമുറ പ്രൊഫഷണലുകളെ സജ്ജമാക്കും, Viasat-ന്റെ Velaris വാണിജ്യവൽക്കരിക്കാനുള്ള ഞങ്ങളുടെ പ്രവർത്തനം ഉപഭോക്താക്കൾക്ക് പുതിയ സേവനങ്ങൾ പ്രാപ്തമാക്കും, ഇത് രാജ്യത്തുടനീളമുള്ള സാമ്പത്തിക വളർച്ചയ്ക്കും വികസനത്തിനും കാരണമാകും." എന്ന് ബിഎസ്എൻഎൽ ചെയർമാൻ പറഞ്ഞു.

"ഇന്ത്യൻ ടെലികമ്മ്യൂണിക്കേഷനിലെ വിശ്വസ്തരായ ബിഎസ്എൻഎല്ലുമായുള്ള പ്രവർത്തനങ്ങൾ വിപുലീകരിക്കുന്നതിൽ ഞങ്ങൾ ആവേശഭരിതരാണ്. ഇന്ത്യയുടെ 'ഡിജിറ്റൽ ഇന്ത്യ' ദർശനത്തോടുള്ള ഞങ്ങളുടെ പ്രതിബദ്ധതയുടെ തെളിവാണ് ഈ സഹകരണങ്ങൾ, കൂടാതെ രാജ്യത്തിന്റെ ലോ ആൾട്ടിറ്റ്യൂഡ് സമ്പദ്‌വ്യവസ്ഥയുടെ അപാരമായ സാധ്യതകൾ തുറക്കാൻ ഇത് സഹായിക്കും. ഇന്ത്യയിലുടനീളമുള്ള ഉപഗ്രഹ സാങ്കേതികവിദ്യയിൽ വിദ്യാർത്ഥികളെ പഠിപ്പിക്കുന്നതിനുള്ള ശക്തമായ ഒരു ചട്ടക്കൂട് സ്ഥാപിക്കുന്നതിന് ബിഎസ്എൻഎല്ലിന്റെ ബിആർബ്രെയിറ്റുമായി സഹകരിക്കുന്നതിലും ഞങ്ങൾ അഭിമാനിക്കുന്നു," എന്ന് വിയാസാറ്റ് ഇന്ത്യ എംഡി പറഞ്ഞു.