ബിഎസ്എൻഎൽ വരിക്കാർക്ക് സർപ്രൈസ്! പ്ലാൻ നിരക്ക് കൂടാതെ ഇന്റർനെറ്റ് സ്പീഡും ഡാറ്റയും വർദ്ധിപ്പിച്ചു; അറിയേണ്ടതെല്ലാം

ബിഎസ്എൻഎൽ ഭാരത് ഫൈബർ വരിക്കാർക്ക് സർപ്രൈസ് ഓഫർ! പ്ലാൻ നിരക്കുകളിൽ മാറ്റമില്ലാതെ തന്നെ ഇൻ്റർനെറ്റ് സ്പീഡും ഡാറ്റാ പരിധിയും (FUP) ബിഎസ്എൻഎൽ കൂട്ടിയിരിക്കുകയാണ്. 599 രൂപ, 779 രൂപ പ്ലാനുകൾ ഉപയോഗിക്കുന്ന ഉപഭോക്താക്കൾക്ക് കൂടുതൽ വേഗതയും ഡാറ്റ ലിമിറ്റ് കഴിഞ്ഞാലും മുൻപത്തേക്കാൾ ഉയർന്ന സ്പീഡും ലഭിക്കുന്നുണ്ടെന്നാണ് റിപ്പോർട്ടുകൾ. പല സർക്കിളുകളിലും 599 രൂപ പ്ലാനിൽ അതേ വാടകയിൽ തന്നെ 4TB ഡാറ്റയ്‌ക്കൊപ്പം 100 Mbps സ്പീഡ് ലഭ്യമായിത്തുടങ്ങി. കൂടാതെ, തിരഞ്ഞെടുക്കപ്പെട്ട 777-779 രൂപ പ്ലാനുകളിൽ ഡാറ്റ കഴിഞ്ഞാലും 5 Mbps വേഗത ലഭിക്കുമെന്നും വ്യക്തമാകുന്നു.

പ്ലാനുകളിലെ പ്രധാന മാറ്റങ്ങൾ പരിശോധിക്കാം: കേരള, ചെന്നൈ സർക്കിളുകളിൽ 599 രൂപയുടെ 'ഫൈബർ ബേസിക് പ്ലസ്' പ്ലാനിൽ 100 Mbps സ്പീഡും 4,000 GB ഡാറ്റയും ലഭ്യമാക്കിയിട്ടുണ്ട്. ഡാറ്റ പരിധി കഴിഞ്ഞാലും 4 Mbps വേഗത ലഭിക്കും. ചില മിഡ്-ടയർ പ്ലാനുകളിൽ എഫ്‌യുപിക്ക് ശേഷം 5 മുതൽ 10 Mbps വരെ സ്പീഡ് ലഭിച്ചേക്കുമെന്നാണ് ഗിസ്‌ബോട്ട് റിപ്പോർട്ട് ചെയ്യുന്നത്. എന്നാൽ അടുത്ത റീചാർജ് ചെയ്യുന്നതിന് മുൻപ് ബിഎസ്എൻഎൽ സെൽഫ്‌കെയർ ആപ്പ് വഴി നിങ്ങളുടെ അക്കൗണ്ടിൽ ലഭ്യമായ സ്പീഡും എഫ്‌യുപി നിബന്ധനകളും ഉറപ്പുവരുത്തുക.

ബിഎസ്എൻഎൽ ഭാരത് ഫൈബർ അപ്‌ഗ്രേഡ് സെൽഫ്‌കെയറിലൂടെ എങ്ങനെ പരിശോധിക്കാം?

ബിഎസ്എൻഎൽ സെൽഫ്‌കെയർ (BSNL Selfcare) ആപ്പ് അല്ലെങ്കിൽ വെബ്‌സൈറ്റ് തുറന്ന് ഒടിപി (OTP) ഉപയോഗിച്ച് ലോഗിൻ ചെയ്യുക. 'Services' വിഭാഗത്തിൽ നിന്ന് 'Modify' തിരഞ്ഞെടുത്ത് FTTH അല്ലെങ്കിൽ Landline സെലക്ട് ചെയ്യുക. തുടർന്ന് 'Change Plan' നൽകിയാൽ പ്ലാൻ വിവരങ്ങളും സ്പീഡും പരിശോധിക്കാം. ചുരുക്കത്തിൽ: Selfcare തുറക്കുക → OTP ഉപയോഗിച്ച് ലോഗിൻ ചെയ്യുക → Services → Modify → FTTH തിരഞ്ഞെടുക്കുക → Change Plan നൽകുക → പുതിയ പ്ലാൻ വിവരങ്ങൾ പരിശോധിച്ച് Submit ചെയ്യുക.

800 രൂപയിൽ താഴെയുള്ള പ്ലാനുകൾ: ബിഎസ്എൻഎൽ ഭാരത് ഫൈബർ vs ജിയോഫൈബർ vs എയർടെൽ

ഏതാണ് ലാഭം?: 100 Mbps സ്പീഡ് വാഗ്ദാനം ചെയ്യുന്ന ജിയോ, എയർടെൽ പ്ലാനുകളേക്കാൾ കുറഞ്ഞ നിരക്കിലാണ് ബിഎസ്എൻഎല്ലിന്റെ 599 രൂപ പ്ലാൻ വരുന്നത്. ബിഎസ്എൻഎൽ 4,000 GB ഡാറ്റ നൽകുമ്പോൾ ജിയോ 3,300 GB-യും എയർടെൽ 3,333 GB-യുമാണ് നൽകുന്നത്. അതത് കമ്പനികളുടെ ഔദ്യോഗിക വെബ്‌സൈറ്റുകളിലെ വിവരങ്ങൾ അടിസ്ഥാനമാക്കിയുള്ളതാണ് ഈ കണക്കുകൾ.

ഉയർന്ന വേഗത പൂർണ്ണമായി ലഭിക്കാൻ ബിഎസ്എൻഎൽ വൈഫൈ റൂട്ടർ ടിപ്പുകൾ

100 Mbps വേഗത കൃത്യമായി ലഭിക്കാൻ 5 GHz വൈഫൈ ബാൻഡ്, ഗിഗാബിറ്റ് റൂട്ടർ (അല്ലെങ്കിൽ ONT), കുറഞ്ഞത് CAT5e എങ്കിലും ഉള്ള കേബിളുകൾ എന്നിവ ഉപയോഗിക്കുക. കൃത്യമായ സ്പീഡ് ലഭിക്കുന്നുണ്ടോ എന്നറിയാൻ ഇഥർനെറ്റ് കേബിൾ വഴി കണക്ട് ചെയ്ത് പരിശോധിക്കാം. റൂട്ടറിന്റെ ഫേംവെയർ അപ്‌ഡേറ്റ് ചെയ്യാനും കണക്ഷൻ സ്റ്റേബിൾ ആയി നിലനിർത്താൻ 80 MHz ചാനൽ സെറ്റ് ചെയ്യാനും ശ്രദ്ധിക്കുക. അപ്‌ഗ്രേഡ് ചെയ്തിട്ടും സ്പീഡ് മാറിയിട്ടില്ലെങ്കിൽ റൂട്ടർ റീസ്റ്റാർട്ട് ചെയ്ത് അടുത്ത ദിവസം സെൽഫ്‌കെയർ വീണ്ടും പരിശോധിച്ച് ഉറപ്പുവരുത്തുക.