ഒടുവില്‍ ബി.എസ്.എന്‍.എല്‍. അതും ചെയ്തു. അനുദിനം വളര്‍ന്നുകൊണ്ടിരിക്കുന്ന ഇന്ത്യന്‍ സ്മാര്‍ട്‌ഫോണ്‍ വിപണയില്‍ സാന്നിധ്യമറിയിച്ചു. ചാമ്പ്യന്‍ കമ്പ്യൂട്ടേഴ്‌സുമായി സഹകരിച്ചുകൊണ്ട് ചാമ്പ്യന്‍ ട്രെന്‍ഡി 531 എന്ന ഫാബ്ലറ്റ് ബി.എസ്.എന്‍.എല്‍. പുറത്തിറക്കി.
5.3 ഇഞ്ച് ഡിസ്‌പ്ലെയുള്ള ഫോണിന് 13999 രൂപയാണ് വില. ഈ മാസം ആദ്യമാണ് ഇരുകമ്പനികളും ഒരുമിക്കുന്ന കാര്യം ഔദ്യോഗികമായി പുറത്തുവിട്ടത്.
ബി.എസ്.എന്‍.എല്‍. -ചാമ്പ്യന്‍ ട്രെന്‍ഡി 531-ന്റെ പ്രത്യേകതകള്‍ നോക്കാം
5.3 ഇഞ്ച് കപ്പാസിറ്റീവ് ടച്ച് സ്‌ക്രീന്‍ ഡിസ്‌പ്ലെയുള്ള ഫോണ്‍ ആന്‍ഡ്രോയ്ഡ് 4.2 ജെല്ലി ബീന്‍ ഒ.എസിലാണ് പ്രവര്‍ത്തിക്കുന്നത്. 1.2 GHz ക്വാഡ്‌കോര്‍ പ്രൊസസര്‍, 1 ജി.ബി. റാം എന്നിവയുമുണ്ട്.
ഓട്ടോ ഫോക്കസ് സംവിധാനത്തോടു കൂടിയ 13 മെഗാപിക്‌സല്‍ പിന്‍ ക്യാമറ, 5 മെഗാപിക്‌സല്‍ ഫ്രണ്ട് ക്യാമറ എന്നിവയുള്ള ഫാബ്ലറ്റില്‍ 4 ജി.ബി. ഇന്‍ബില്‍റ്റ് മെമ്മറിയുണ്ട്. മൈക്രോ എസ്.ഡി. കാര്‍ഡ് ഉപയോഗിച്ച് 32 ജി.ബി. വരെ വികസിപ്പിക്കാനും കഴിയും.
വൈ-ഫൈ, ബ്ലുടൂത്ത്, EDGE, GPRS, 3G എന്നീ സംവിധാനങ്ങളുള്ള ഫോണ്‍ ഡ്യുവല്‍ സിം സപ്പോര്‍ട് ചെയ്യും. 3200 mAh ആണ് ബാറ്ററി. ഫാബ്ലറ്റ് വാങ്ങുമ്പോള്‍ ഒരു വര്‍ഷത്തേക്ക്, പ്രതിമാസം 500 എം.ബി. 3ജി ഡാറ്റാപ്ലാന്‍ സൗജന്യമായി നല്‍കുന്നുണ്ട്.
