ലോകത്തെ ഏറ്റവും വേഗതയേറിയ ഇന്റർനെറ്റുമായി ​ചൈന; സെക്കൻഡിൽ 1.2 ടെറാബിറ്റ് ഡാറ്റ കൈമാറാം!

ടെക്നോളജിയുമായി കൂട്ടുകൂടിയ മനുഷ്യന്റെ ഏറ്റവും വലിയ ആയുധമാണ് ഇന്റർനെറ്റ്. ഇന്റർനെറ്റ് ഇല്ലെങ്കിൽ ഇന്ന് ലോകം തന്നെ നിശ്ചലമായിപ്പോയപോലെ നമുക്ക് തോന്നും. ടെക്നോളജി ഓരോ ദിവസം കഴിയും തോറും വളരുന്നു. അ‌തിനനുസരിച്ച് ഇന്റർനെറ്റ് വേഗതയും വർധിക്കുന്നുണ്ട്. മനുഷ്യന് ശാസോച്ഛ്വാസം പോലെ ലോകത്തിന് ഇന്റർനെറ്റ് പ്രധാനമായി മാറിയിരിക്കുന്നു.

ഒരു പത്ത് വർഷം മുൻപ് ഇന്റർനെറ്റ് ഉപയോഗിച്ച് കാര്യങ്ങൾ ചെയ്തിരുന്ന അ‌തേ വേഗതയിലാണോ ഇപ്പോൾ ഇന്റർനെറ്റ് സേവനങ്ങൾ ഉപയോഗിക്കുന്നത് എന്ന് ചിന്തിച്ചുനോക്കിയാൽ നാം നേടിയ പുരോഗതി മനസിലാകും. ഇന്ത്യയിൽ ഇപ്പോഴും ഇന്റർനെറ്റ് സേവനങ്ങൾ കാര്യമായി എത്തിയിട്ടില്ലാത്ത ഇടങ്ങൾ ധാരാളമുണ്ട്. എങ്കിലും നാം ഏറെ മുന്നേറിയിരിക്കുന്നു.

ഡിജിറ്റൽ ഇന്ത്യ മറ്റ് പല ലോകരാജ്യങ്ങൾക്കും മാതൃകയാകുന്ന തരത്തിൽ വളർന്നിരിക്കുന്നു. രാജ്യത്തെ ടെലിക്കോം മേഖല ഇപ്പോൾ 5ജി വ്യാപനത്തിന്റെ തിരക്കിലാണ്. ബ്രോഡ്ബാൻഡ് ഇന്റർനെറ്റ് കണക്ഷനുകളും വർധിക്കുന്നുണ്ട്. എങ്കിലും ലോകം നമ്മെക്കാൾ വേഗത്തിൽ കുതിക്കുന്നു. ഇപ്പോൾ ഇന്റർനെറ്റ് വേഗതയിൽ പുതിയ ചരിത്രം രചിച്ചിരിക്കുകയാണ് ​​ചൈന.

ലോകത്തിലെ ഏറ്റവും വേഗതയേറിയ ഇന്റർനെറ്റുള്ള രാജ്യം എന്ന നേട്ടം ചൈന സ്വന്തമാക്കിയിരിക്കുന്നു. സൗത്ത് ചൈന മോർണിംഗ് പോസ്റ്റ് റിപ്പോർട്ട് ചെയ്യുന്നതു പ്രകാരം ​ചൈനയിലെ ഈ ഇന്റർനെറ്റ് ഉപയോഗിച്ച് സെക്കൻഡിൽ 1.2 ടെറാബിറ്റ് ഡാറ്റ (1,200 ജിഗാബൈറ്റുകൾക്ക് തുല്യം) കൈമാറാൻ കഴിയും. ലളിതമായി പറഞ്ഞാൽ ഒരു സെക്കൻഡിൽ 150 സിനിമകൾ അ‌യയ്ക്കാൻ കഴിയും.

നിലവിലുള്ള മിക്ക പ്രധാന ഇന്റർനെറ്റ് റൂട്ടുകളെക്കാളും പത്തിരട്ടി വേഗത ഈ ഇന്റർനെറ്റ് നെറ്റ്വർക്കിന് ഉണ്ട്. അ‌മേരിക്കയിൽ അടുത്തിടെ നവീകരിച്ച അ‌ഞ്ചാം തലമുറ ഇന്റർനെറ്റ് 2 നെറ്റ്‌വർക്കിന് പോലും സെക്കൻഡിൽ 400 ജിഗാബൈറ്റ്സ് ആണ് പരമാവധി വേഗം. ഇതിനെക്കാൾ പല മടങ്ങ് വേഗത ​ചൈനയിലെ ഇന്റർനെറ്റ് നെറ്റ്വർക്കിനുണ്ട്.

പുതുതായി സമാരംഭിച്ച ഇന്റർനെറ്റിന്റെ ഇൻഫ്രാസ്ട്രക്ചർ 3,000 കിലോമീറ്ററിലധികം വ്യാപിച്ചുകിടക്കുന്നതായും, ഒപ്റ്റിക്കൽ ഫൈബർ കേബിളുകളുടെ ഒരു വലിയ ശൃംഖലയിലൂടെ ബീജിംഗ്, വുഹാൻ, ഗ്വാങ്‌ഷു എന്നിവയെ ബന്ധിപ്പിക്കുന്നതായും റിപ്പോർട്ടിൽ പറയുന്നു. ചൈനയിലെ സിംഗ്‌വാ യൂണിവേഴ്‌സിറ്റി, ചൈന മൊബൈൽ, ഹുവായ് ടെക്‌നോളജീസ്, സെർനെറ്റ് കോർപ്പറേഷൻ എന്നിവ സംയുക്തമായാണ് ഈ മുന്നേറ്റം നടത്തിയിരിക്കുന്നത്.

ഒരു സെക്കൻഡിൽ 150 ഹൈ-ഡെഫനിഷൻ ഫിലിമുകൾക്ക് തുല്യമായ ഡാറ്റ കൈമാറാൻ ഈ ഇന്റർനെറ്റിന് വേഗതയുണ്ടെന്ന് ഹുവായ് ടെക്‌നോളജീസ് വൈസ് പ്രസിഡന്റ് വാങ് ലീ ഉദാഹരണമായി പറഞ്ഞു. അതേസമയം, സിംഗ്വാ സർവകലാശാലയിലെ സൂ മിംഗ്‌വെയ് പുതിയ നെറ്റ്‌വർക്കിനെ ഒരു സൂപ്പർഫാസ്റ്റ് ട്രെയിൻ ട്രാക്കുമായിട്ടാണ് താരതമ്യം ചെയ്തത്.

1.2 ടെറാബിറ്റ് ഇന്റർനെറ്റ്, വിവരങ്ങൾക്കായി ഒരു അതിവേഗ ഹൈവേ ഉള്ളതുപോലെയാണ്, മാത്രമല്ല എല്ലാവർക്കും സാധ്യതകളുടെ ഒരു പുതിയ ലോകം തുറക്കുകയും ചെയ്യും. ആഗോള ഡിജിറ്റൽ മേഖലയിൽ വിപ്ലവം സൃഷ്ടിക്കാനും അനന്തമായ സാധ്യതകളിലേക്ക് ടെക്നോളജിയെ നയിക്കാനും ഈ പുതിയ ഇന്റർനെറ്റ് മുന്നേറ്റത്തിന് സാധിക്കും.

ആരോഗ്യ സംരക്ഷണം, വിദ്യാഭ്യാസം, ശാസ്ത്ര ഗവേഷണം, കൂടാതെ എണ്ണമറ്റ മറ്റ് മേഖലകളിലും വിപ്ലവകരമായ മുന്നേറ്റം കാഴ്ചവയ്ക്കാൻ ഈ പുരോഗതി സഹായിക്കും. ഒരു സിനിമ ഡൗൺലോഡ് ചെയ്യാൻ ദിവസങ്ങൾ വേണ്ടിയിരുന്നിടത്തുനിന്ന്, സെക്കൻഡുകൾക്കുള്ളിൽ സിനിമ ഡൗൺലോഡ് ചെയ്യാനാകുന്ന നിലയിലേക്ക് ഉണ്ടായ വളർച്ചയെക്കാൾ പതിന്മടങ്ങ് മുന്നോട്ട് പോകാൻ പുതിയ ഇന്റർനെറ്റ് നെറ്റ്വർക്കിന്റെ വേഗത മനുഷ്യനെ പ്രാപ്തനാക്കും എന്നാണ് വിലയിരുത്തൽ.