സ്റ്റിയറിങ് വീൽ പോലും വേണ്ട, പിന്നെയല്ലേ ​ഡ്രൈവർ! ലോകത്തെ ഞെട്ടിച്ച് മസ്കിന്റെ സൈബർക്യാബ്

ഡ്രൈവറില്ലാ വാഹനങ്ങളുടെ യുഗത്തിലേക്ക് ഇനി അ‌ധികദൂരമില്ലെന്ന് ഉറപ്പിച്ച്, പ്രമുഖ ഇലക്ട്രിക് വാഹന നിർമാതാക്കളായ ടെസ്ല തങ്ങളുടെ ഡ്രൈവറില്ലാ റോബോടാക്‌സിയുടെ പ്രോട്ടോടൈപ്പ് വെളിപ്പെടുത്തി. ലോസ് ഏഞ്ചൽസിലെ വാർണർ ബ്രദേഴ്‌സ് ഡിസ്‌കവറി സ്റ്റുഡിയോയിൽ നടന്ന "വീ, റോബോട്ട് (We,Robot event) ഇവൻ്റിൽ ടെസ്ല സിഇഒ ഇലോൺ മസ്ക് ആണ് ലോകം ഉറ്റുനോക്കുന്ന റോബോടാക്‌സിയെ ഏവർക്കും പരിചയപ്പെടുത്തിയത്. 'സൈബർക്യാബ്' എന്നാണ് ടെസ്ല ഈ 'അ‌ദ്ഭുത'ത്തിന് പേര് നൽകിയിരിക്കുന്നത്. സ്റ്റിയറിങ് വീലുകളോ പെഡലുകളോ പോലുള്ള പരമ്പരാഗത നിയന്ത്രണങ്ങളില്ലാതെ രൂപകൽപ്പന ചെയ്ത പൂർണ്ണ ഓട്ടോണമസ് വാഹനമാണ് ടെസ്ലയുടെ "സൈബർക്യാബ്" (Tesla Cybercab).

ഭാവി മുന്നിൽക്കണ്ട് ഒട്ടേറെ ശാസ്ത്ര മുന്നേറ്റങ്ങൾക്ക് നേതൃത്വം നൽകിക്കൊണ്ടിരിക്കുന്ന ഇലോൺ മസ്കിന്റെ നേതൃത്വത്തിലുള്ള ടെസ്ലയുടെ ദീർഘവീക്ഷണത്തിന്റെ ദൃശ്യരൂപമാണ് സൈബർക്യാബ്. ഇനി വരാൻ പോകുന്നത് ​ഡ്രൈവറില്ലാ കാറുകളുടെ കാലമാണ് എന്ന് മസ്ക് വിശ്വസിക്കുന്നു. അ‌തിലേക്കുള്ള പാത വെട്ടിത്തെളിക്കാൻ ഇലോൺ മസ്കും ടെസ്ലയും പരിശ്രമിച്ച് വരികയാണ്. അ‌തിന്റെ ഉൽപ്പന്നമാണ് പുതിയ ​സൈബർ ക്യാബ്.

വാഹന നിർമാണ വ്യവസായത്തിലെ ഒരു വലിയ നാഴികക്കല്ലാണ് ടെസ്‌ല സൈബർക്യാബ്, കാരണം ഇത് ഓട്ടോമാറ്റിക് ഡ്രൈവിംഗിനായി മാത്രം നിർമ്മിച്ചതാണ്. നാവിഗേഷനോ നിയന്ത്രണത്തിനോ മനുഷ്യ ഇടപെടൽ ആവശ്യമില്ലാത്ത, യഥാർത്ഥത്തിൽ സ്വയംഭരണാധികാരമുള്ള ഒരു വാഹനം സൃഷ്ടിക്കുക എന്ന കാഴ്ചപ്പാടിൽ നിന്നാണ് മസ്കും ടെസ്ലയും ​സൈബർക്യാബിലേക്ക് എത്തുന്നത്. സൈബർക്യാബ് പൂർണ്ണമായും ഹാൻഡ്-ഓഫ് അനുഭവം വാഗ്ദാനം ചെയ്യുമെന്ന് മസ്ക് പറയുന്നു.

പൂർണ്ണമായും സ്വയംഭരണാധികാരമുള്ള സെൽഫ് ഡ്രൈവിംഗിനായി ഒപ്റ്റിമൈസ് ചെയ്ത സൈബർക്യാബിൻ്റെ ഉത്പാദനം 2026-ൽ ആരംഭിക്കുമെന്ന് ഇലോൺ മസ്ക് പറഞ്ഞു. സൈബർക്യാബിൻ്റെ രൂപകൽപ്പന ഭാവിയിലേക്കുള്ളതാണ, ഇൻഡക്റ്റീവ് ചാർജർ ഉപയോഗിച്ച് റോബോടാക്‌സി വയർലെസ് ആയി ചാർജ് ചെയ്യുമെന്നും മസ്ക് വെളിപ്പെടുത്തി. ​സൈബർക്യാബിലെ സ്റ്റിയറിംഗ് വീലിൻ്റെയും പെഡലുകളുടെയും അഭാവം കൂടുതൽ ഇൻ്റീരിയർ സ്പേസിന് വഴിതുറക്കുന്നു, ഇത് കൂടുതൽ സൗകര്യപ്രദമായ സീറ്റിങ് ക്രമീകരണവും അധിക സൗകര്യങ്ങളും അനുവദിക്കുന്നു.

​സൈബർക്യാബിന്റെ ലേഔട്ടിൻ്റെ കൃത്യമായ ഡീറ്റെയിൽസ് മസ്ക് പൂർണ്ണമായി വെളിപ്പെടുത്തിയിട്ടില്ല. എങ്കിലും യാത്രക്കാർക്ക് പരമാവധി സൗകര്യവും പ്രയോജനവും നൽകുന്ന നിലയിലാണ് ഇത് ഡിസൈൻ ചെയ്തിരിക്കുന്നത് എന്ന് റിപ്പോർട്ടുകൾ പറയുന്നു. വെറുമൊരു വാഹനം എന്നതിലുപരി, യാത്രയ്‌ക്കും ജോലിക്കും വിശ്രമത്തിനുമുള്ള ഇടമായി സൈബർക്യാബിനെ മാറ്റും വിധത്തിലാണ് ​ടെസ്ല ഈ വാഹനം ഡി​സൈൻ ചെയ്യുന്നത്.

സങ്കീർണ്ണമായ ട്രാഫിക് സാഹചര്യങ്ങൾ ​കൈകാര്യം ചെയ്യാൻ AI, മെഷീൻ ലേണിംഗ് എന്നിവ ഉപയോഗിക്കുന്ന ടെസ്‌ലയുടെ വിപുലമായ ഫുൾ സെൽഫ് ഡ്രൈവിംഗ് (FSD) സോഫ്റ്റ്‌വെയർ സൈബർക്യാബ് പ്രയോജനപ്പെടുത്തും. സെൽഫ് ​ഡ്രൈവിങ് കാറുകൾക്കായി ദീർഘനാളുകളായി പ്രവർത്തിച്ചുവരുന്ന ടെസ്ല അ‌ക്കാര്യത്തിൽ ഏറെ മുന്നേറിയിട്ടുമുണ്ട്. ​ഈ അ‌നുഭവങ്ങൾ ടെസ്ലയുടെ സൈബർക്യാബിന് കരുത്താകും.

​സൈബർക്യാബിനെക്കുറിച്ചുള്ള ആശയത്തിനെക്കുറിച്ചും മസ്ക് വിവരിച്ചു. സമയം ലാഭിക്കുക എന്നതാണ് ഇതിന്റെ പ്രാഥമിക ലക്ഷ്യം. "ആളുകൾ ഒരു കാറിൽ ചെലവഴിക്കുന്ന സഞ്ചിത സമയത്തെക്കുറിച്ചും അവർക്ക് ലാഭിക്കാൻ കഴിയുന്ന സമയത്തെക്കുറിച്ചും ചിന്തിക്കുക''. ​സൈബർക്യാബ് എത്തുന്നതോടെ ആളുകൾക്ക് അ‌വരുടെ ​ഡ്രൈവിങ് സമയം പുസ്തകങ്ങൾ വായിക്കാനോ ​​സിനിമ കാണാനോ ജോലി ചെയ്യാനോ മറ്റെന്തെങ്കിലും കാര്യങ്ങൾക്കോ ചെലവഴിക്കാം എന്ന് മസ്ക് പറയുന്നു.

മസ്കിന്റെ ആശയം വിപ്ലവകരമാണ് എങ്കിലും പൊതുഗതാഗതത്തിനായി ​സൈബർക്യാബ് നിരത്തിലിറക്കണമെങ്കിൽ ഒട്ടനവധി കടമ്പകൾ നേരിടേണ്ടതുണ്ട്. സുരക്ഷയെക്കുറിച്ചുള്ള ആശങ്കകൾ, പൂർണ്ണമായും സെൽഫ് ​ഡ്രൈവിങ്ങായി എത്തുന്ന വാഹനങ്ങളുടെ പൊതു സ്വീകാര്യതയെക്കുറിച്ചുള്ള ചോദ്യങ്ങൾ എന്നിവ വെല്ലുവിളികളാണ്. സ്റ്റിയറിങ് വീലും പെഡലുകളും ഇല്ലാതെ എത്തുന്നു എന്നത് ഒരു സുപ്രധാന കുതിച്ചുചാട്ടമാണെങ്കിലും അ‌ത്തരമൊരു വാഹനം നിരത്തിലിറക്കാൻ അ‌ധികൃതരിൽ നിന്ന് അ‌നുമതി വാങ്ങിയെടുക്കേണ്ടതുണ്ട്. അ‌തിന് കഠിനമായ പരീക്ഷണങ്ങൾ നേരിടേണ്ടിവരും.