2013 മുതല്‍ ഇന്ത്യയില്‍ റോമിംഗ് ചാര്‍ജുകളുണ്ടാകില്ല ; കോള്‍ ചാര്‍ജ് വര്‍ദ്ധന പ്രതീക്ഷിക്കാം

സംസ്ഥാനങ്ങളില്‍ നിന്ന് സംസ്ഥാനങ്ങളിലേക്ക അടിക്കടി പോയി വരുന്നവര്‍ക്കൊരു സന്തോഷവാര്‍ത്ത. കേള്‍ക്കാന്‍ കൊതിച്ച ഒരു വാലര്‍ത്ത തന്നെ. 2013 മുതല്‍ ഇന്ത്യയില്‍ റോമിങ്ങിന് പ്രത്യേകം ചാര്‍ജുകളുണ്ടാകില്ല. കേന്ദ്രത്തില്‍ നിന്ന് ഇന്നലെയാണ് ഇത് സംബന്ധിച്ച തീരുമാനമുണ്ടായത്.

ഈ വര്‍ഷം ആദ്യം തന്നെ ഒരു രാജ്യം-സൗജന്യ റോമിംഗ് എന്നൊരു പദ്ധതി കേന്ദ്ര ടെലികോം മന്ത്രി കപില്‍ സിബല്‍ മുന്നോട്ടു വച്ചിരുന്നു. അതിന്റെ തുടര്‍ച്ചയായാണ് 2013 മുതല്‍ തീരുമാനം പ്രാബല്യത്തില്‍ വരുമെന്ന് അദ്ദേഹം ഇന്നലെ മാധ്യമങ്ങളെ അറിയിച്ചത്.

2012 മെയ് മാസം അംഗീകരിച്ച കേന്ദ്ര ടെലികോം പോളിസി പ്രകാരം, ഉപഭോക്താതാക്കള്‍ക്ക് രാജ്യമൊട്ടാകെ, ചാര്‍ജ് വര്‍ദ്ധനകളില്ലാതെ ഒരു സിം തന്നെ ഉപയോഗിക്കാനുള്ള സൗകര്യമുണ്ടാകണമെന്ന നിര്‍ദ്ദേശമുണ്ടായിരുന്നു.

ലേലവുമായി ബന്ധപ്പെട്ട കാര്യങ്ങളാണ് ആദ്യം പരിഗണിക്കാനുള്ളതെന്നും ഈയാഴ്ച പുറത്തുവരുന്ന എന്‍ ഐ എ (നോട്ടീസ് ഇന്‍വൈറ്റിങ് ആപ്ലിക്കേഷന്‍സ്) അനുസരിച്ച് ഞങ്ങള്‍ UL (യൂണിഫൈഡ് ലൈസന്‍സ്‌) ലേക്ക് കൂടുതല്‍ ശ്രദ്ധ നല്‍കുമെന്നും ശേഷം ഫ്രീ റോമിംഗിലേക്കുള്ള ശ്രമങ്ങളാരംഭിക്കുമെന്നും കേന്ദ്ര ടെലികോം സെക്രട്ടറി ആര്‍ ചന്ദ്രശേഖര്‍ മാധ്യമങ്ങളോട് പറഞ്ഞു.

ഷെഡ്യൂളനുസരിച്ച് എന്‍ ഐ എ സെപ്റ്റംബര്‍ 28, വെളളിയാഴ്ച പുറത്തിറങ്ങും.

റോമിംഗ് ചാര്‍ജുകള്‍ ഒഴിവായാല്‍ അത് കോള്‍ റേറ്റുകളെ ബാധിക്കുമെന്നും ഇത് സംബന്ധിച്ച അന്തിമ തീരുമാനം ട്രായ് ആണ് എടുക്കേണ്ടതെന്നും സി ഓ എ ഐ ഡയറക്ടര്‍ ജനറല്‍ രാജന്‍ എസ് മാത്യു അറിയിച്ചു. അങ്ങനെ വരുമ്പോള്‍ കോള്‍ റേറ്റുകളില്‍ വര്‍ദ്ധന പ്രതീക്ഷിക്കാം.

'ഇനി പൊയ്‌ക്കോ..തെക്കിനിയിലോ കുക്കിനിയിലോ, അല്ലിക്കാഭരണം വാങ്ങിക്കാനോ... സിമ്മൊക്കെ ഒന്നു മതി. പക്ഷെ ബാലന്‍സ് ഇമ്മിണി വേണ്ടിവരുമെന്നു മാത്രം.'