ഗൂഗിൾ ക്രോം ഈമുദ്ര സർട്ടിഫിക്കറ്റ് ബ്ലോക്ക് ചെയ്തു; ബാങ്കിംഗ് സൈറ്റുകളിൽ സുരക്ഷാ മുന്നറിയിപ്പ് വന്നേക്കാം

ഇന്ന് (ഒക്ടോബർ 27) മുതൽ ഈമുദ്രയുടെ (eMudhra) 'emSign ECC Root CA–G3' സർട്ടിഫിക്കറ്റിനുള്ള സുരക്ഷാ അംഗീകാരം ഗൂഗിൾ ക്രോം പിൻവലിക്കുകയാണ്. ഇതോടെ, ഈ സർട്ടിഫിക്കറ്റ് ഉപയോഗിക്കുന്ന വെബ്‌സൈറ്റുകളിൽ പ്രവേശിക്കുമ്പോൾ സുരക്ഷാ മുന്നറിയിപ്പുകൾ (Full-page security errors) തെളിഞ്ഞേക്കാം. പസഫിക് സമയം ചൊവ്വാഴ്ച രാവിലെയോടെയാണ് ഇത് പ്രാബല്യത്തിൽ വരുന്നത്. അതിനാൽ ഇന്ത്യയിൽ ഇന്ന് വൈകുന്നേരത്തോടെ ഇതിന്റെ പ്രത്യാഘാതങ്ങൾ കണ്ടുതുടങ്ങിയേക്കാം. ഈമുദ്ര നെറ്റ്‌വർക്ക് ഉപയോഗിക്കുന്ന ബാങ്കുകൾ, സർക്കാർ പോർട്ടലുകൾ, ഫിൻടെക് സേവനങ്ങൾ എന്നിവയെയായിരിക്കും ഇത് പ്രധാനമായും ബാധിക്കുക. സിസ്റ്റം അഡ്മിനിസ്ട്രേറ്റർമാരും സാധാരണ ഉപയോക്താക്കളും ഉടനടി മുൻകരുതലുകൾ എടുക്കണം. ബ്രൗസർ ഓട്ടോ-അപ്‌ഡേറ്റ് ആകുകയോ ക്രോം റീസ്റ്റാർട്ട് ചെയ്യുകയോ ചെയ്യുമ്പോൾ ഇത്തരത്തിലുള്ള മുന്നറിയിപ്പുകൾ പ്രത്യക്ഷപ്പെട്ടേക്കാം.

ഒക്ടോബർ 17-നാണ് ഈമുദ്രയുടെ എട്ട് ഇന്റർമീഡിയറികൾ സുരക്ഷിതമല്ലെന്ന് ക്രോമിന്റെ റൂട്ട് പ്രോഗ്രാം കണ്ടെത്തുന്നത്. തുടർന്ന് ഇവ റദ്ദാക്കിയെങ്കിലും പല ആപ്പുകളും ഈ സുരക്ഷാ പരിശോധനകൾ കണക്കിലെടുത്തില്ല. ഇതോടെ ആപ്പിൾ ഒക്ടോബർ 19-ന് ഈ ഇന്റർമീഡിയറികളെയും ഒക്ടോബർ 23-ന് 'emSign ECC Root CA–G3' റൂട്ടിനെയും ബ്ലോക്ക് ചെയ്തു. അപകടസാധ്യത ഒഴിവാക്കാൻ മൊസില്ലയും അപ്‌ഡേറ്റുകൾ പുറത്തിറക്കിയിരുന്നു. ഇന്ന് ക്രോം കൂടി ഈ റൂട്ട് പൂർണ്ണമായി ഒഴിവാക്കുന്നതോടെ വിവിധ സിസ്റ്റങ്ങളിലുണ്ടാകുന്ന സുരക്ഷാ വീഴ്ചകൾ തടയാനാകും.

ക്രോം ഈമുദ്ര റൂട്ട് ഒഴിവാക്കുന്നു: ഉപയോക്താക്കൾ ശ്രദ്ധിക്കേണ്ട കാര്യങ്ങൾ

ബ്രൗസറിൽ ചുവന്ന സുരക്ഷാ മുന്നറിയിപ്പ് കണ്ടാൽ അത് അവഗണിച്ച് മുന്നോട്ട് പോകരുത്. അഡ്രസ് ബാറിൽ നിങ്ങളുടെ ബാങ്കിന്റെയോ പോർട്ടലിന്റെയോ ശരിയായ വെബ്‌സൈറ്റ് വിലാസം തന്നെയാണെന്ന് ഉറപ്പാക്കുക. പാഡ്‌ലോക്ക് (പൂട്ട ചിഹ്നം) ഐക്കണിൽ ക്ലിക്ക് ചെയ്ത് 'Certificate' എടുത്ത ശേഷം അതിലെ ഇഷ്യൂവറും സർട്ടിഫിക്കറ്റ് ചെയിനും പരിശോധിക്കുക. അവിടെ eMudhra എന്നോ "emSign ECC Root CA–G3" എന്നോ കാണുന്നുണ്ടെങ്കിൽ ലോഗിൻ ചെയ്യാതെ പേജ് ഉടൻ ക്ലോസ് ചെയ്യുക. പകരം അപ്‌ഡേറ്റ് ചെയ്ത സഫാരി, ഫയർഫോക്സ്, അല്ലെങ്കിൽ എഡ്ജ് തുടങ്ങിയ മറ്റ് ബ്രൗസറുകൾ ഉപയോഗിക്കുക. സേവനങ്ങളിൽ തടസ്സം നേരിട്ടാൽ ബാങ്കുമായോ സേവനദാതാക്കളുമായോ ബന്ധപ്പെടുക.

ക്രോം ഈമുദ്ര റൂട്ട് ഒഴിവാക്കുന്നു: അഡ്മിനിസ്ട്രേറ്റർമാർ ഉടനടി ചെയ്യേണ്ടത്

ബാധിക്കപ്പെട്ട TLS സർട്ടിഫിക്കറ്റുകൾക്ക് പകരം മറ്റ് പബ്ലിക് സർട്ടിഫിക്കറ്റ് അതോറിറ്റികളിൽ നിന്നുള്ള പുതിയ സർട്ടിഫിക്കറ്റുകൾ അടിയന്തരമായി വാങ്ങി ഇൻസ്റ്റാൾ ചെയ്യുക. ഇവ ഒറിജിൻ സെർവറുകളിലും സിഡിഎന്നുകളിലും (CDN) ശരിയായ ഇന്റർമീഡിയറികൾ സഹിതം ഇൻസ്റ്റാൾ ചെയ്യുകയും കാഷെ (Cache) ക്ലിയർ ചെയ്യുകയും വേണം. "ഓപ്പറേറ്റർമാർ അടിയന്തരമായി പുതിയ TLS സർട്ടിഫിക്കറ്റ് വാങ്ങി ഇൻസ്റ്റാൾ ചെയ്യണം" എന്നാണ് ഗൂഗിൾ നൽകിയിരിക്കുന്ന നിർദ്ദേശം. നിലവിലെ ക്രോം വേർഷനുകളിൽ ഇത് പരിശോധിച്ച് ഉറപ്പുവരുത്തുക. കൂടാതെ കണ്ടെയ്‌നറുകൾ, ലിനക്‌സ്, ജാവ സ്റ്റോറുകൾ എന്നിവ അപ്‌ഡേറ്റ് ചെയ്ത് ഈ റൂട്ട് ഒഴിവാക്കുക. ആപ്പിൾ, മൊസില്ല, ക്രോം എന്നിവയുടെ നിർദ്ദേശങ്ങൾ കൃത്യമായി പിന്തുടരുക.