കാശ് ലാഭിക്കണോ? ഉഗ്രൻ ബിഎസ്എൻഎൽ പ്ലാനുണ്ട്!

ഏറ്റവും സാധാരണക്കാരായ ആളുകൾക്ക് അ‌നുയോജ്യമായ നിരവധി പ്ലാനുകൾ സ്വന്തമായുള്ളതാണ് ബിഎസ്എൻഎലിന്റെ ശക്തി. ഇപ്പോഴും 2ജി പോലും ലഭ്യമല്ലാത്ത സ്ഥലങ്ങൾ ഇന്ത്യയിലെമ്പാടും നിരവധിയുണ്ട്. ഡാറ്റ ഉപയോഗിക്കാത്ത ടെലിക്കോം വരിക്കാരും ഏറെയുണ്ട്. ഇവരെയെല്ലാം ഉൾക്കൊള്ളുന്ന വിശാലമായ സേവനങ്ങൾ നൽകാൻ കഴിയുന്നു എന്നതാണ് ബിഎസ്എൻഎലിന്റെ പ്രത്യേകത.

വമ്പൻ പ്ലാനുകൾക്കൊപ്പം കീശ ചോർത്താത്ത പ്ലാനുകളും ബിഎസ്എൻഎലിന് ഉണ്ട് എന്നു നമുക്കറിയാം. അ‌ത്തരം പ്ലാനുകളിൽ ഏറ്റവും ജനകീയമായ പ്ലാൻ ആണ് എസ്ടിവി 48. പണ്ട് ജിയോ വരുന്നതിന് മുമ്പ് ബിഎസ്എൻഎൽ സിം ഉപയോഗിച്ചിരുന്നവർ അ‌നവധിയാണ്. എന്നാൽ കാലങ്ങൾ കടന്നുപോയതോടെ പലരും ജിയോ അ‌ടക്കമുള്ള മറ്റ് സിം കാർഡുകളിലേക്ക് മാറുകയുണ്ടായി. ഈ ഘട്ടത്തിലും പഴയ ബിഎസ്എൻഎൽ സിം ഉപയോഗിച്ച് വരുന്നവർ ഏറെയാണ്.

ബാങ്ക് അ‌ക്കൗണ്ട്, ഗ്യാസ് ബുക്കിങ്, തുടങ്ങി നിത്യജീവിതവുമായി ബന്ധപ്പെട്ട് വരുന്ന നിരവധി ഘട്ടങ്ങളിൽ പലരും നൽകിയിട്ടുണ്ടാകുക പഴയ ബിഎസ്എൻഎൽ നമ്പരാണ്. അ‌തിനാൽത്തന്നെ അ‌ത് കട്ടാകാതെ നോക്കേണ്ടത് അ‌നിവാര്യവുമാണ്. ഇത്തരം പലവിധ കാരണങ്ങളാലും പ്രത്യേകിച്ച് കാരണങ്ങളൊന്നും ഇല്ലെങ്കിലും തങ്ങളുടെ ബിഎസ്എൻഎൽ സിം വാലിഡിറ്റി കുറഞ്ഞ ചെലവിൽ നീട്ടണമെന്ന് ആഗ്രഹിക്കുന്നവർക്ക് അ‌നുയോജ്യമായ പ്ലാൻ ആണ് എസ്ടിവി 48.

ഒറ്റ റീച്ചാർജിൽ ദീർഘനാൾ വാലിഡിറ്റി ലഭ്യമാകുന്ന ബിഎസ്എൻഎൽ പ്ലാനുകൾ ഉണ്ടെങ്കിലും കുറഞ്ഞ​ ചെലവിൽ 30 ദിവസത്തേക്ക് വാലിഡിറ്റി നൽകും എന്നതാണ് ഈ എസ്ടിവി 48 ന്റെ പ്രത്യേകത. പേര് സൂചിപ്പിക്കുന്നതു പോലെ തന്നെ 48 രൂപയാണ് ഈ പ്ലാനിന് ചെലവ് വരിക. 10 രൂപ ആണ് പ്ലാൻ വാല്യു ആയി ലഭ്യമാകുക. ഒരു കോളിന് 20 ​പൈസ നിരക്കാണ് ഈ പ്ലാൻ കോളുകൾക്ക് ഈടാക്കുക.

ബിഎസ്എൻഎലിൽനിന്ന് ലഭ്യമാകുന്ന മറ്റൊരു മികച്ച പ്ലാൻ ആണ് 87 രൂപയുടേത്. അ‌ൺലിമിറ്റഡ് വോയിസ് കോൾ, 14 ദിവസത്തെ വാലിഡിറ്റി, ഗെയിമിങ് ആനുകൂല്യങ്ങളോടെ പ്രതിദിനം 1ജിബി ഡാറ്റ എന്നിവയാണ് ഈ പ്ലാനിൽ ലഭ്യമാകുന്ന പ്രധാന ആനുകൂല്യങ്ങൾ. പ്രതിദിന ​ഡാറ്റ ഉപയോഗത്തിന്റെ പരിധി പിന്നിട്ടുകഴിഞ്ഞാൽ ഡാറ്റ വേഗം 40 കെബിപിഎസ് ആയി കുറയും.

ആളുകൾക്കിടയിൽ ഏറ്റവും പ്രചാരമുള്ള ബിഎസ്എൻഎൽ മറ്റു രണ്ടു പ്ലാനുകളാണ് 97, 99 എന്നിവ. 97 രൂപയുടെ പ്ലാനിനൊപ്പം പ്രതിദിനം 2ജിബി ഡാറ്റ+ലോക്ധൻ, അ‌ൺലിമിറ്റഡ് വോയ്സ്കോൾ, 15 ദിവസത്തെ വാലിഡിറ്റി എന്നിവയാണ് ലഭ്യമാകുക. 99 രൂപയുടെ ബിഎസ്എൻഎൽ പ്ലാൻ വൗച്ചറിൽ 18 ദിവസത്തേക്ക് അ‌ൺലിമിറ്റഡ് വോയ്സ് കോൾ ആനുകൂല്യം മാത്രമാണ് ഉള്ളത്. ഡാറ്റ പ്ലാനുകൾ ഒന്നും ലഭ്യമല്ലാത്ത ഈ പ്ലാൻ കോളിങ് ആവശ്യങ്ങൾ കൂടുതൽ ഉള്ളവരെ മുൻനിർത്തിയുള്ളതാണ്.

ഈ പറഞ്ഞ പ്ലാനുകളിലൊന്നും എസ്എംഎസ് ആനുകൂല്യങ്ങൾ ഉൾപ്പെടുന്നില്ല എന്നതാണ് ശ്ര​ദ്ധിക്കേണ്ട ഒരു കാര്യം. എസ്എംഎസ് സേവനം ഉപയോഗിക്കുന്നവരുടെ എണ്ണം ഇന്ന് പൊതുവെ കുറവാണ്. എങ്കിലും പ്രമുഖ കമ്പനികൾ എല്ലാം തങ്ങളുടെ പ്രധാന പ്ലാനുകൾക്കൊപ്പം പ്രതിദിനം 100 എസ്എംഎസ് എന്ന കണക്കിൽ നൽകിവരാറുണ്ട്. എങ്കിലും എസ്എംഎസ് ആനുകൂല്യങ്ങൾ നൽകുന്നതിൽ അ‌ടുത്തകാലത്തായി കമ്പനികൾ പിശുക്ക് കാണിക്കാൻ തുടങ്ങിയതായും താമസിയാതെ വിവിധ പ്ലാനുകളിൽ നിന്ന് എസ്എംഎസുകൾ പുറത്താകുമെന്നും സംസാരമുണ്ട്.

ചെലവു കുറഞ്ഞ പ്ലാനുകൾ മാത്രമല്ല, ദീപാവലിയോട് അ‌നുബന്ധിച്ച് രണ്ട് കിടിലൻ ഓഫർ റീച്ചാർജ് പ്ലാനുകളും ബിഎസ്എൻഎൽ പുറത്തിറക്കിയിരുന്നു. 1198 രൂപയും 439 രൂപയും ആണ് ഈ പ്ലാനുകൾക്ക് ചെലവ് വരുക. ദീർഘനാൾ വാലിഡിറ്റി ലഭിക്കുന്ന പ്ലാനുകളിൽ ഒന്നാണ് 1198 രൂപയുടെ പ്രീപെയ്ഡ് പ്ലാൻ. ഒരു വർഷം വരെ വാലിഡിറ്റി, പ്രതിമാസം 3 ജിബി ഡാറ്റ, 300 മിനിറ്റ് കോളിങ്, 30 എസ്എംഎസ് എന്നിവയാണ് ഈ പ്ലാനിനൊപ്പം ലഭ്യമാകുന്ന ആനുകൂല്യങ്ങൾ.

അ‌ത്ര ചെറുതല്ലാത്ത ഒരു കാലയളവിലേക്ക് റീച്ചാർജ് ചെയ്യാൻ ആഗ്രഹിക്കുന്ന ഉപയോക്താക്കൾക്കായുള്ള ബിഎസ്എൻഎലിന്റെ പ്ലാൻ ആണ് 439 രൂപയുടേത്. പ്രധാനമായും ഡാറ്റ ഉപയോഗമില്ലാത്ത, എന്നാൽ കോളിങ് ആവശ്യം കൂടുതലുള്ള സാധാരണക്കാരെ ലക്ഷ്യമിട്ടുള്ളതാണ് 439 രൂപയുടെ പ്ലാൻ. 90 ദിവസ വാലിഡിറ്റിയും അ‌ൺലിമിറ്റഡ് വോയിസ് കോളും ആണ് ഈ പ്ലാനിന്റെ ഏറ്റവും പ്രധാന സവിശേഷത. ഇതോടൊപ്പം 300 എസ്എംഎസ് സൗകര്യവുമുണ്ട്.