ഓടാനൊരുങ്ങി ഇന്ത്യയുടെ ആദ്യ എന്‍ജിനില്ലാ ട്രെയിന്‍; നിര്‍മ്മാണച്ചെലവ് 100 കോടി രൂപ

1. പൂര്‍ണ്ണമായി ഇന്ത്യയില്‍ നിര്‍മ്മിച്ച ട്രെയിന്‍

ചെന്നൈയില്‍ ഇന്റഗ്രല്‍ കോച്ച് ഫാക്ടറിയിലാണ് ട്രെയിന്‍ 18 പൂര്‍ണ്ണമായി നിര്‍മ്മിച്ചത്. ഒക്ടോബര്‍ 29-ന് ട്രെയിന്‍ പാളത്തെ തൊട്ടു. 18 മാസം കൊണ്ടാണ് ട്രെയിനിന്റെ നിര്‍മ്മാണം പൂര്‍ത്തിയാക്കിയത്.

2. ശതാബ്ദി എക്‌സ്പ്രസ്സിന്റെ പകരക്കാരന്‍

ഡല്‍ഹിക്കും ഭോപ്പാലിനും ഇടയ്ക്ക് സര്‍വ്വീസ് നടത്തുന്ന ശതാബ്ദി എക്‌സ്പ്രസിന്റെ സ്ഥാനം ട്രെയിന്‍ 18 ഏറ്റെടുക്കും. 1988-ല്‍ ഓടിത്തുടങ്ങിയ ശതാബ്ദി എക്‌സ്പ്രസ്സ് അക്കാലത്ത് ഇന്ത്യയിലെ ഏറ്റവും വേഗത കൂടിയ തീവണ്ടിയായിരുന്നു. വേഗതയുടെ കാര്യത്തില്‍ ഇപ്പോള്‍ രണ്ടാം സ്ഥാനത്താണ് ശതാബ്ദി എക്‌സ്പ്രസ്സ്. മണിക്കൂറില്‍ ഇതിന്റെ ശരാശരി വേഗത 100-130 കിലോമീറ്ററാണ്.

3. ഏറ്റവും വേഗതയുള്ള ട്രെയിന്‍

ട്രെയിന്‍ 18-ന്റെ വേഗത മണിക്കൂറില്‍ 160 കിലോമീറ്ററാണ്. ഇതോടെ വേഗതയില്‍ ഒന്നാം സ്ഥാനത്തായി ട്രെയിന്‍ 18. ഡല്‍ഹി- ഭോപ്പാല്‍ യാത്രാസമയത്തില്‍ 15 ശതമാനം കുറവ് വരുത്താന്‍ ഇതിന് കഴിയുമെന്നാണ് പ്രതീക്ഷിക്കപ്പെടുന്നത്.

4. പരീക്ഷണയോട്ടം

ചെന്നൈയില്‍ ഇന്റഗ്രേറ്റഡ് കോച്ച് ഫാക്ടറിയിലാണ് ആദ്യ പരീക്ഷണയോട്ടം. ഇവിടെ പ്രധാനമായും ബ്രേക്ക്, എസി എന്നിവയായിവും പരിശോധിക്കുക.

നവംബര്‍ 7-ന് ഡല്‍ഹിയിലേക്ക് കൊണ്ടുപോകുന്ന ട്രെയിന്‍ മൊറാദാബാദ്- ബെറേറി സെക്ഷനില്‍ ഓടിക്കും. മണിക്കൂറില്‍ 150 കിലോമീറ്റര്‍ വേത്തിലാവും ഇവിടുത്തെ ഓട്ടം. അതിനുശേഷം കോട്ട, സവായ് മധോപൂര്‍ സെക്ഷനിലേക്ക് കൊണ്ടുപോകുന്ന ട്രെയിന്‍ മണിക്കൂറില്‍ 160 കിലോമീറ്റര്‍ വേഗതയില്‍ പരീക്ഷണയോട്ടം നടത്തും. ഇതിന് ശേഷം ഡല്‍ഹി- ഭോപ്പാല്‍ റൂട്ടില്‍ ഓട്ടം ആരംഭിക്കും.

5. എന്‍ജിന്‍ ഇല്ലാതെ എങ്ങനെ ഓടും?

ട്രെയിന്‍ 18-ല്‍ കോച്ചുകള്‍ യാന്ത്രികമായും ഇലക്ട്രിക്കലായും ബന്ധിപ്പിച്ചിരിക്കുന്നു. രണ്ട് അറ്റത്തും ഡ്രൈവിംഗ് ക്യാബിനുകളുമുണ്ട്. മെട്രോ ട്രെയിനുകള്‍ പോലെ ട്രാക്ഷന്‍ പവറിലാണ് ട്രെയിന്‍ 18-ന്റെയും ഓട്ടം.

6. അടുത്ത തലമുറ ട്രെയിന്‍

അടുത്ത തലമുറ ട്രെയിനായാണ് ട്രെയിന്‍ 18-നെ ഇന്ത്യന്‍ റെയില്‍വെ വിശേഷിപ്പിക്കുന്നത്. ഡിഫ്യൂസ്ഡ് ലൈറ്റിംഗ്, ഓട്ടോമെറ്റിക് വാതിലുകള്‍, സ്ലൈഡ് ചെയ്യുന്ന ചവിട്ടുപടികള്‍, ജിപിഎസ് അടിസ്ഥാന പാസഞ്ചര്‍ ഇന്‍ഫൊര്‍മേഷന്‍ സംവിധാനം, പൂര്‍ണ്ണമായും എയര്‍ കണ്ടീഷന്‍ ചെയ്ത കോച്ചുകള്‍, സാധനങ്ങള്‍ വയ്ക്കാന്‍ കൂടുതല്‍ സ്ഥലം തുടങ്ങിയ നിരവധി സവിശേഷതകള്‍ ഈ ട്രെയിനിനുണ്ട്.

7. ഇനി എന്ത്?

ആദ്യ ട്രെയിനിന്റെ നിര്‍മ്മാണച്ചെലവ് 100 കോടി രൂപയാണെങ്കിലും വ്യാവസായികാടിസ്ഥാനത്തില്‍ നിര്‍മ്മാണം തുടങ്ങുന്നതോടെ ചെലവ് കുറയുമെന്നാണ് വിലയിരുത്തപ്പെടുന്നത്. അധികം വൈകാതെ ഇതില്‍ സ്ലീപ്പര്‍ കോച്ചുകള്‍ ഉള്‍പ്പെടുത്താനുള്ള ആലോചനകളും നടക്കുന്നുണ്ട്. കൂടുതല്‍ റൂട്ടുകളില്‍ ട്രെയിന്‍ 18 ഓടിക്കാനും റെയില്‍വെ പദ്ധതിയിടുന്നു.