BSNL എയർ​ഫൈബറിന് മുന്നിൽ ജിയോയും എയർടെലും പൊടിപ്പിള്ളേർ! ഇതൊക്കെ അ‌റിഞ്ഞിട്ട് തീരുമാനം എടുക്കൂ

അ‌ടുത്തിടെയായി എയർ​ഫൈബർ സേവനങ്ങൾ ഏറെ ചർച്ചചെയ്യപ്പെടുന്നുണ്ട്. 5ജി സേവനങ്ങൾ വ്യാപിപ്പിച്ചുകൊണ്ടിരിക്കുന്നതിന് ഇടയിൽ തന്നെ ജിയോയും എയർടെലും തങ്ങളുടെ എയർ​ഫൈബർ സേവനങ്ങളും ആരംഭിക്കുകയും കൂടുതൽ ഇടങ്ങളിലേക്ക് അ‌ത് എത്തിക്കുകയും ചെയ്തുകൊണ്ടിരിക്കുന്നു. കൂടിപ്പിണഞ്ഞ് കിടക്കുന്ന കേബിളുകളുടെയും മറ്റും ശല്യമില്ലാതെ ഇന്റർനെറ്റ് സേവനങ്ങൾ അ‌വതരിപ്പിക്കാൻ കഴിയുമെന്നതാണ് എയർ​ഫൈബർ കണക്ഷന്റെ പ്രത്യേകത.

എന്നാൽ ജിയോയും എയർടെലുമൊക്കെ എയർ​ഫൈബർ എന്ന ആശയം ചിന്തിച്ച് തുടങ്ങുന്നതിന് മുൻപ് തന്നെ പൊതുമേഖലാ ടെലികോം ഓപ്പറേറ്ററായ ഭാരത് സഞ്ചാർ നിഗം ​​ലിമിറ്റഡ് (BSNL) എയർഫൈബർ (AirFiber) സേവനങ്ങൾ വാഗ്ദാനം ചെയ്തിട്ടുണ്ട്. എന്നാൽ ജിയോയുടെയും എയർടെലിന്റെയും എയർ​ഫൈബർ സേവനവും ബിഎസ്എൻഎൽ എയർ​ഫൈബറും തമ്മിൽ ഒരു വ്യത്യാസമുണ്ട്.

5ജി നെറ്റ്വർക്ക് അ‌ടിസ്ഥാനമാക്കിയാണ് ജിയോയും എയർടെലും എയർ​ഫൈബർ സേവനങ്ങൾ വാഗ്ദാനം ചെയ്യുന്നത്. അ‌തേസമയം 5ജി ഇല്ലാത്ത ബിഎസ്എൻഎൽ ആകട്ടെ, 2.4 GHz, 5 GHz Wi-Fi സ്പെക്ട്രം ബാൻഡുകളിലൂടെയാണ് എയർ​ഫൈബർ സേവനം വാഗ്ദാനം ചെയ്യുന്നത്. അ‌തിന്റേതായ വ്യത്യാസം ഈ എയർ​ഫൈബർ സേവനങ്ങൾ തമ്മിലുണ്ട് താനും.

ജിയോയും എയർടെലും വാഗ്ദാനം ചെയ്യുന്ന എയർ​ഫൈർ സേവനമാണോ ബിഎസ്എൻഎൽ വാഗ്ദാനം ചെയ്യുന്ന എയർ​ഫൈബർ സേവനമാ​ണോ നല്ലത് എന്ന് പലർക്കും സംശയമുണ്ട്. ഇതിൽ ഏതാണ് തെരഞ്ഞെടുക്കാൻ അ‌നുയോജ്യം എന്ന് അ‌റിയാൻ പലരും ആഗ്രഹിക്കുന്നു. യഥാർഥത്തിൽ ജിയോ/എയർടെൽ, ബിഎസ്എൻഎൽ എന്നിവ നൽകുന്ന എയർഫൈബർ സേവനത്തിന്റെ ടെക്നോളജിയുടെ അ‌ടിസ്ഥാനം സമാനമാണ്.

ഈ കമ്പനികളുടെയെല്ലാം എയർ​ഫൈബർ സേവനങ്ങളുടെയും ലക്ഷ്യവും ഒന്നാണ്. ഇത് പ്രധാനമായും മൊബൈൽ നെറ്റ്‌വർക്കുകൾ വഴിയുള്ള ഒരു Wi-Fi സേവനമാണ്. ഫൈബർ ബ്രോഡ്‌ബാൻഡ് സേവനങ്ങളിലേക്ക് എത്തിപ്പെടാൻ കഴിയാത്ത വീടുകൾ, ഓഫീസുകൾ തുടങ്ങിയ ഇടങ്ങളിൽ എയർ​ഫൈബർ സേവനം അതിവേഗ ഇന്റർനെറ്റ് കണക്റ്റിവിറ്റി വാഗ്ദാനം ചെയ്യുന്നു.

പിള്ളേർക്ക് വേഗത അ‌ൽപ്പം കൂടുതലായിരിക്കും എന്നതുപോലെ ബിഎസ്എൻഎൽ എയർ​ഫൈബറിനെ അ‌പേക്ഷിച്ച് ജിയോ, എയർടെൽ എയർ​ഫൈബർ സേവനങ്ങൾക്ക് വേഗത അ‌ൽപ്പം കൂടുതലാണ്. ജിയോയും എയർടെലും 5ജി അ‌ടിസ്ഥാനമാക്കിയാണ് എയർ​ഫൈബർ സേവനം അ‌വതരിപ്പിച്ചിരിക്കുന്നത് എന്നകാര്യം ഇവിടെ ഓർക്കേണ്ടതുണ്ട്. ജിയോ എയർ​ഫൈബർ 1 ജിബിപിഎസ് വരെ ഡൗൺലോഡ് വേഗത വാഗ്ദാനം ചെയ്യുന്നു.

എയർടെൽ എയർ​ഫൈബർ 100 ​​എംബിപിഎസ് വരെ വേഗത ഓഫർ ചെയ്യുന്നു. അ‌തേസമയം ബിഎസ്എൻഎൽ ഇവർക്ക് രണ്ട് പേർക്കും പിന്നിലാണ്. 30-50 എംബിപിഎസ് വേഗതയാണ് ബിഎസ്എൻഎൽ എയർ​ഫൈബർ വാഗ്ദാനം ചെയ്യുന്നത്. അ‌തിനാൽ 50 Mbps-ന് മുകളിൽ വേഗതയുള്ള പ്ലാനുകൾ ആവശ്യമാണെങ്കിൽ ജിയോ-എയർടെൽ എയർ​ഫൈബർ പ്ലാനുകളെ ആശ്രയിക്കണം. അ‌തിലും താഴെ മതിയെങ്കിൽ ബിഎസ്എൻഎൽ തെരഞ്ഞെടുക്കാം.

ജിയോയും എയർടെലും തങ്ങളുടെ എയർ​ഫൈബർ പ്ലാനുകൾക്ക് ഒപ്പം ആകർഷകമായ ജനപ്രിയ ഒടിടി പ്ലാനുകളുടെ സബ്സ്ക്രിപ്ഷൻ വാഗ്ദാനം ചെയ്യുന്നുണ്ട്. എന്നാൽ ബിഎസ്എൻഎൽ എയർ​ഫൈബർ പ്ലാനിൽ അ‌ത്തരം ആനുകൂല്യങ്ങളൊന്നും പ്രതീക്ഷിക്കേണ്ട. എന്നാൽ എയർ​ഫൈബർ സേവനത്തിൽ ബിഎസ്എൻഎൽ സ്കോർ ചെയ്യുന്ന ഒരു മേഖലയുണ്ട്, സേവന ​മേഖലയുടെ വ്യാപ്തി ആണ് അ‌ത്.

എയർടെൽ എയർ​ഫൈബർ തിരഞ്ഞെടുത്ത നഗരങ്ങളിൽ മാത്രമാണ് ലഭ്യമായിട്ടുള്ളത്. ജിയോയുടെ എയർ​ഫൈബർ സേവനവും എല്ലായിടത്തും എത്തിയിട്ടില്ല. എന്നാൽ അ‌തിവേഗം എയർ​ഫൈബർ സേവനം വ്യാപിപ്പിക്കാൻ ജിയോയ്ക്ക് കഴിയുന്നുണ്ട്. അ‌തേസമയം ബിഎസ്എൻഎൽ എയർ​ഫൈബർ സേവനം രാജ്യത്ത് എല്ലായിടത്തും ലഭ്യമാണ്. കൂടാതെ സൗജന്യമായി എയർ​ഫൈബർ സേവനം ഇൻസ്റ്റാൾ ചെയ്യാനുള്ള സൗകര്യവും ബിഎസ്എൻഎൽ നൽകുന്നുണ്ട്.

എയർ​ഫൈബർ സേവനം സൗജന്യമായി ഇൻസ്റ്റാൾ ചെയ്യാനുള്ള ഓഫർ 2025 മാർച്ച് 31 വരെയാണ് ബിഎസ്എൻഎൽ നൽകിയിരിക്കുന്നത്. ഈ ഓഫറിലൂടെ ഉപയോക്താക്കൾക്ക് 500 രൂപ ഇൻസ്റ്റാളേഷൻ ചാർജ് ലാഭിക്കാൻ സാധിക്കുന്നു. ഉയർന്ന വേഗതയുള്ള എയർ​ഫൈബർ പ്ലാനുകൾക്ക് ഉയർന്ന തുക നൽകേണ്ടിവരും. എന്നാൽ 50 Mbps-ന് താഴെ വേഗത മതിയെങ്കിൽ ബിഎസ്എൻഎൽ എയർ​ഫൈബറിനെ ആശ്രയിക്കാം.