വീട്ടിൽ 5ജി വേണ്ടവർക്കായി ജിയോ എയർ​ഫൈബർ എത്തുന്നു, 20 ശതമാനം ഡിസ്കൗണ്ടിൽ!

ഇന്ത്യൻ ടെലിക്കോം രംഗത്തെ വമ്പനായ റിലയൻസ് ജിയോ തങ്ങളുടെ ഫിക്സഡ് വയർലെസ് ആക്‌സസ് (എഫ്‌ഡബ്ല്യുഎ) ഡിവൈസ് ആയ ജിയോഎയർ​ഫൈബർ വിപണിവിലയെക്കാൾ 20 ശതമാനം ഡിസ്കൗണ്ടിൽ ഉടൻ അ‌വതരിപ്പിക്കുമെന്ന് റിപ്പോർട്ട്. ഉടൻ നടക്കുന്ന റിലയൻസ് വാർഷിക ജനറൽ മീറ്റിങ്ങിൽ ഈ ഡി​​വൈസ് അ‌വതരിപ്പിക്കപ്പെടും എന്നാണ് റിപ്പോർട്ടുകൾ സൂചിപ്പിക്കുന്നത്.

ജിയോയുടെ കഴിഞ്ഞ വാർഷിക യോഗത്തിലാണ് ജിയോഎയർ​ഫൈബർ സംബന്ധിച്ച പ്രഖ്യാപനം ഉണ്ടായത്. തുടർന്ന് ഈ ഡി​വൈസിനായുള്ള പ്രവർത്തനത്തിലായിരുന്നു ജിയോ. തങ്ങളുടെ 5ജി വ്യാപനം പൂർത്തിയാകുന്ന മുറയ്ക്ക് ജിയോഎയർ​ഫൈബർ സേവനവും ആരംഭിക്കാം എന്ന കണക്കുകൂട്ടലിലായിരുന്നു ജിയോ. എന്നാൽ ജിയോയെപ്പോലും കടത്തിവെട്ടിക്കൊണ്ട് അ‌ടുത്തിടെ എയർടെൽ തങ്ങളുടെ എക്സ്ട്രീം എയർഫൈബർ പുറത്തിറക്കി.

5ജി വ്യാപനത്തിൽ കടുത്ത മത്സരം കാഴ്ചവയ്ക്കുന്ന ജിയോയും എയർടെലും 5ജി പിന്തുണയോടെ എത്തുന്ന ഫിക്സഡ് വയർലെസ് ആക്‌സസ് ഡി​വൈസുകളുടെ കാര്യത്തിലും അ‌ത് പിന്തുടരുന്നു എന്ന് വേണം കരുതാൻ. ഇതിനകം തന്നെ എയർടെൽ തങ്ങളുടെ എഫ്ഡബ്ലുഎ ഡി​വൈസ് പുറത്തിറക്കിയെങ്കിലും ആ നീക്കത്തെ മറികടക്കാൻ 20 ശതമാനം ഡിസ്കൗണ്ട് വിലയിലാകും ജിയോ എയർ​ഫൈബർ ​ലോഞ്ച് ചെയ്യുക.

എയർടെൽ തങ്ങളുടെ എക്‌സ്ട്രീം എയർഫൈബർ ഡി​വൈസ് 2,500 രൂപ വിലയിലാണ് അ‌വതരിപ്പിച്ചത്. ഇതോടൊപ്പം 4,435 രൂപയുടെ 6 മാസത്തെ പ്ലാനും അവതരിപ്പിച്ചു. ഇതിനെ കടത്തിവെട്ടുന്ന നീക്കം ജിയോയുടെ ഭാഗത്തുനിന്ന് ഉണ്ടാകുമെന്ന് എക്ണോമിക് ​ടൈംസ് റിപ്പോർട്ട് ചെയ്യുന്നു. വൻ ഓഫറുകളോടെ പ്ലാനുകളും ഉൽപ്പന്നങ്ങളും അ‌വതരിപ്പിച്ച് വിപണിപിടിക്കുന്ന തന്ത്രമാണ് ജിയോ കാലാകാലമായി ചെയ്തുവരുന്നത്. ഇവിടെയും അ‌തുണ്ടാകുമെന്നാണ് വിലയിരുത്തൽ.

ഈ വർഷം ആദ്യം ജിയോ ഒരു 5ജി പ്ലാൻ അ‌വതരിപ്പിച്ചിരുന്നു. ഇതിന് ശേഷം തങ്ങളുടെ 5ജി സേവനത്തിൽനിന്ന് വരുമാനം ഉണ്ടാക്കുന്ന വിധത്തിൽ ജിയോ നടത്തുന്ന ആദ്യ നീക്കമാണ് ജിയോ എയർ​ഫൈബർ. ഇതിനോടകം 5ജി വ്യാപനം നടത്തിയ ചില നഗരങ്ങളിൽ ജിയോ പുതിയ എയർ​ഫൈബർ ഡി​വൈസ് പരീക്ഷിച്ചതായാണ് റിപ്പോർട്ടുകൾ വരുന്നത്.

പരമ്പരാഗത ബ്രോഡ്ബാൻഡ് സങ്കൽപ്പങ്ങളെ പൊളിച്ചെഴുതാൻ 5ജി പിന്തുണയിൽ എത്തുന്ന എയർ​ഫൈബർ കണക്ഷനുകൾക്ക് സാധിക്കുമെന്നാണ് കരുതപ്പെടുന്നത്. പോർട്ടബിൾ റൂട്ടറുകളേക്കാൾ വളരെ ശക്തമായിരിക്കും ജിയോയുടെ ഈ ഡി​വൈസ്. ജിയോ എഫ്ഡബ്ലുഎ ഡി​​വൈസ് കാരിയർ അഗ്രഗേഷൻ സാങ്കേതികവിദ്യ ഉപയോഗിച്ചാണ് പ്രവർത്തിക്കുക. അത് വ്യത്യസ്‌ത 5G എയർവേവുകൾ ഉപയോഗിച്ച് ഒരു "ഡാറ്റ പാത്ത്‌വേ" സൃഷ്‌ടിക്കും.

വ്യത്യസ്‌ത 5G എയർവേവുകൾ ജിയോ എയർ​ഫൈബർ ഉപയോഗിക്കും. സ്പെക്ട്രം ലേലത്തിൽ 700 MHz, 3300 MHz, 26GHz. 26 GHz ബാൻഡുകൾ ജിയോ സ്വന്തമാക്കിയിരുന്നു. ജിയോയുടെ ഹോം ബ്രോഡ്‌ബാൻഡ് ബിസിനസ് വൻ രീതിയിൽ വളർത്താൻ ജിയോ എയർ​ഫൈബർ സഹായിക്കും എന്നാണ് കമ്പനി കരുതുന്നത്. ഇന്ത്യയുടെ ഭൂമിശാസ്ത്രപരമായ പ്രത്യേകതകൾ മൂലം ബ്രോഡ്ബാൻഡ് കണക്ഷനുകൾ വ്യാപിപ്പിക്കാൻ വെല്ലുവിളികളുണ്ട്.

എന്നാൽ ഫിക്സഡ് വയർലെസ് ആക്‌സസ് ഡി​വൈസുകൾ വഴിയുള്ള ഇന്റർനെറ്റ് സേവനത്തിന് അ‌ത്തരം പരിമിതികളില്ല. അ‌തിനാൽത്തന്നെ ഈ 5ജി സേവനം ഉപയോഗിച്ച് വൻ വരുമാനം കൊയ്യാമെന്ന് ജിയോ കണക്കുകൂട്ടുന്നു. ജിയോയുടെ എതിരാളിയായ എയർടെൽ നിലവിൽ മുംബൈ, ഡൽഹി എന്നീ രണ്ട് നഗരങ്ങളിൽ മാത്രമാണ് എയർ​ഫൈബർ സേവനം ആരംഭിച്ചിരിക്കുന്നത്.

എയർ​ഫൈബർ ഉപയോഗിച്ച്, വീടോ ഓഫീസോ ഗിഗാബിറ്റ് സ്പീഡ് ഇന്റർനെറ്റിലേക്ക് വേഗത്തിൽ ബന്ധിപ്പിക്കാം. ആദ്യം കളത്തിലെത്തിയ എതിരാളിയെ മറികടന്ന് വിപണിയിൽ ആധിപത്യം നേടാൻ ജിയോ ഡി​വൈസ് വിലയിൽ ഡിസ്കൗണ്ട് നൽകുകയോ, നിശ്ചിത കാലയളവിലേക്ക് സൗജന്യ ട്രയൽ വാഗ്ദാനം ചെയ്യുകയോ ചെയ്തേക്കാം എന്ന് വിദഗ്ധർ നിരീക്ഷിക്കുന്നു.