വീടിന്റെ ഏത് മൂലയിൽപ്പോയാലും ഇന്റർനെറ്റ് ​ഹൈസ്പീഡിൽ കിട്ടും; ജിയോ പുതിയ വൈ-ഫൈ 6 റൂട്ടർ പുറത്തിറക്കി

വീട്ടിൽ ഇന്റർനെറ്റ് കണക്ഷൻ ഉണ്ടെങ്കിലും ചില റൂമുകളിൽ അ‌ല്ലെങ്കിൽ വീടിന്റെ ചില ഭാഗങ്ങളിൽ റേഞ്ച് കുറവാണ് എന്ന് തോന്നുകയും വേഗതക്കുറവ് അ‌നുഭവപ്പെടുകയും ചെയ്യാറുണ്ടോ? എങ്കിൽ ഇനി അ‌ത്തരം പ്രശ്നങ്ങൾക്ക് വീടുകളിലും ഓഫീസുകളിലും സ്ഥാനമില്ല, കാരണ ജിയോ പുതിയ വൈ-ഫൈ 6 റൂട്ടർ പുറത്തിറക്കിയിരിക്കുന്നു. ജിയോ എഎക്സ് 6000 യൂണിവേഴ്സൽ റൂട്ടർ (Jio AX6000 Universal Router) എന്നാണ് ഈ പുതിയ റൂട്ടറിന്റെ പേര്. വലിയ വീടുകളിലും സ്മാർട്ട് ഡി​വൈസുകളിലും വേഗതയേറിയതും വിശ്വസനീയവുമായ ഇന്റർനെറ്റ് കണക്ഷൻ ആഗ്രഹിക്കുന്ന ഉപയോക്താക്കളെ ലക്ഷ്യമിട്ടാണ് റിലയൻസ് ജിയോ ഇത് അ‌വതരിപ്പിച്ചിരിക്കുന്നത്.

ജിയോയുടെ ഇന്റർനെറ്റ് കണക്ഷൻ തന്നെ വേണമെന്നില്ല, എല്ലാ ഇന്റർനെറ്റ് സർവീസ് പ്രൊ​വൈഡർമാരുടെ (ISP)കണക്ഷനൊപ്പവും ഈ ജിയോ റൂട്ടർ പ്രവർത്തിക്കും. 5,999 രൂപയാണ് ഈ ഡ്യുവൽ-ബാൻഡ് റൂട്ടറിന്റെ വില. ഇത് 4,800Mbps വരെ വേഗത, വൈഡ് കവറേജ്, ഒരേ സമയം 100-ലധികം ഡി​വൈസുകൾ കണക്ട് ചെയ്യാനുള്ള പിന്തുണ എന്നിവ വാഗ്ദാനം ചെയ്യുന്നുണ്ട്.

ജിയോയുടെ ട്രൂ എഐ മെഷ്, MU-MIMO, OFDMA ടെക്നോളജി തുടങ്ങിയ ഫീച്ചറുകളോടെ വലിയ സ്ക്വയർഫീറ്റുള്ള കുടുംബങ്ങൾക്കും ഗെയിമർമാർക്കും വീട്ടിൽ സ്മാർട്ട് ഹോം സജ്ജീകരണങ്ങളുള്ളവർക്കുമൊക്കെ​ വേഗതയേറിയ ഇന്റർനെറ്റ് ലഭിക്കുന്നുണ്ട് എന്ന് ഉറപ്പാക്കാൻ കഴിയും വിധമാണ് ജിയോ ഈ AX6000 റൂട്ടർ രൂപകൽപ്പന ചെയ്തിരിക്കുന്നത്.

ഫൈബർ, ബ്രോഡ്‌ബാൻഡ്, DSL കണക്ഷനുകളുമായി ചേർന്ന് പ്രവർത്തിക്കാൻ ജിയോ എഎക്സ് 6000 യൂണിവേഴ്സൽ റൂട്ടറിന് കഴിയും. ഒരൊറ്റ SSID-ക്ക് കീഴിൽ 2.4GHz, 5GHz ബാൻഡുകളെ ഈ റൂട്ടർ പിന്തുണയ്ക്കുന്നു, അതിനാൽ ഉപയോക്താക്കൾ വീട്ടിലെവിടെയാണെങ്കിലും നെറ്റ്‌വർക്കുകൾ സ്വമേധയാ മാറ്റേണ്ടതില്ല. ഇത് 5GHz ബാൻഡിൽ 4,800Mbps വരെയും 2.4GHz ബാൻഡിൽ 1,200Mbps വരെയും വേഗത നൽകുന്നു.

ബിൽറ്റ്-ഇൻ ജിയോ ട്രൂ AI മെഷ് പിന്തുണ ഉള്ളതിനാൽ ഈ റൂട്ടറിന് Wi-Fi കവറേജിനായി ഒന്നിലധികം റൂട്ടറുകൾ ഒരുമിച്ച് ലിങ്ക് ചെയ്യാൻ കഴിയും. മികച്ച പെർഫോമൻസിനായി ക്വാഡ്-കോർ ചിപ്‌സെറ്റും AX6000 റൂട്ടറിൽ ജിയോ സജ്ജീകരിച്ചിരിക്കുന്നു. പരമ്പരാഗത പോർട്ടുകളേക്കാൾ നാലിരട്ടി വേഗത അവകാശപ്പെടുന്ന അപ്‌ഗ്രേഡ് ചെയ്ത LAN പോർട്ടുകളും ഈ റൂട്ടറിൽ ഉണ്ട്.

ഈസിയായി പ്ലഗ് ചെയ്ത് ഉപയോഗ സജ്ജമാക്കാമെന്നതും ആൻഡ്രോയിഡ്, iOS പ്ലാറ്റ്‌ഫോമുകളിൽ ഡൗൺലോഡ് ചെയ്യാൻ ലഭ്യമായ ജിയോഹോം ആപ്പിലൂടെ പ്രവർത്തനങ്ങൾ കൺട്രോൾ ചെയ്യാമെന്നതും ഈ റൂട്ടറിനെ യൂസർ ഫ്രണ്ട്ലി ഡി​വൈസാക്കി മാറ്റുന്നു. 5,999 രൂപ വിലയുള്ള ഈ ഡി​വൈസ് ജിയോയുടെ ഔദ്യോഗിക വെബ്‌സൈറ്റിലും മറ്റ് ഇ-കൊമേഴ്‌സ് പ്ലാറ്റ്‌ഫോമുകളിലും വാങ്ങാൻ ലഭ്യമാണ്.

റൂട്ടറിൽ ഒരു വർഷത്തെ വാറണ്ടിയും പവർ അഡാപ്റ്ററിൽ ആറ് മാസത്തെ വാറണ്ടിയും ഉപയോക്താക്കൾക്ക് ലഭിക്കും. ഈ റൂട്ടർ ഏകദേശം 2,000 ചതുരശ്ര അടി വിസ്തീർണ്ണം ഉൾക്കൊള്ളുമെന്നും 4K സ്ട്രീമിംഗ്, സുരക്ഷാ ക്യാമറകൾ, ക്ലൗഡ് ഗെയിമിംഗ് അല്ലെങ്കിൽ കണക്റ്റുചെയ്‌ത നിരവധി സ്മാർട്ട് ഡി​വൈസുകൾ ​കൈകാര്യം ചെയ്യൽ എന്നിവ ഇതിന് നിസാരമായി സാധിക്കും.

എന്നാൽ ശ്രദ്ധിക്കേണ്ട ഒരു കാര്യം DHCP (Dynamic Host Configuration Protocol) വഴിയുള്ള IP-യിലേക്ക് മാത്രമായി ഈ ഡി​വൈസ് പരിമിതപ്പെടുത്തിയിരിക്കുന്നു. നിരവധി ഇന്ത്യൻ ഇന്റർനെറ്റ് സർവീസ് പ്രൊ​വൈഡർമാർ ഇപ്പോഴും വ്യാപകമായി ഉപയോഗിക്കുന്ന PPPoE, IPoE കോൺഫിഗറേഷനുകളെ ജിയോ എഎക്സ് 6000 യൂണിവേഴ്സൽ റൂട്ടർ പിന്തുണയ്ക്കുന്നില്ല.