വില 79 രൂപ മുതൽ; പുതിയ ജിയോഹോട്ട്‌സ്റ്റാർ പ്രതിമാസ പ്ലാനുകൾ പ്രഖ്യാപിച്ചു

രാജ്യത്തെ ഏറ്റവും വലിയ ഓവർ-ദി-ടോപ്പ് (OTT) പ്ലാറ്റ്‌ഫോമായ ജിയോഹോട്ട്‌സ്റ്റാർ തങ്ങളുടെ മൊബൈൽ, സൂപ്പർ, പ്രീമിയം സബ്സ്ക്രിപ്ഷൻ വിഭാഗങ്ങളിലായി പുതിയ പ്ലാനുകൾ അ‌വതരിപ്പിച്ചിരിക്കുന്നു. ഇവ പ്രതിമാസ, ത്രൈമാസ, വാർഷിക സബ്‌സ്‌ക്രിപ്‌ഷനുകളിലാണ് എത്തുന്നത്. സ്മാർട്ട്‌ഫോണുകളിൽ സ്ട്രീം ചെയ്യുന്നവർക്കും കണക്റ്റഡ് ടിവികൾ വഴി സേവനം ആക്‌സസ് ചെയ്യുന്ന കുടുംബങ്ങൾക്കുമുള്ള പ്രവേശന തടസങ്ങൾ കുറയ്ക്കുക എന്നതാണ് പുതിയ പ്രതിമാസ ഓപ്ഷനുകൾ ലക്ഷ്യമിടുന്നത്. മൊബൈൽ വിഭാഗത്തിൽ ഹോളിവുഡ് കണ്ടന്റുകൾ ഇനി ഡിഫോൾട്ടായി ബണ്ടിൽ ചെയ്യപ്പെടില്ല. പകരം, ഒരു ഫ്ലെക്സിബിൾ "ആഡ്-ഓൺ" വഴി ആക്‌സസ് ചെയ്യാൻ കഴിയും, ഇത് മുൻഗണനകളെ അടിസ്ഥാനമാക്കി കൂടുതൽ കസ്റ്റ​മൈസ് ചെയ്ത വിലനിർണ്ണയ മോഡൽ അനുവദിക്കുന്നു.

ജിയോഹോട്ട്‌സ്റ്റാറിന് ഗൂഗിൾ പ്ലേയിൽ ഒരു ബില്യണിലധികം ഡൗൺലോഡുകളുണ്ട്, കൂടാതെ 450+ ദശലക്ഷത്തിലധികം പ്രതിമാസ സജീവ ഉപയോക്താക്കളുമുണ്ട് (MAU). പുതിയ സബ്‌സ്‌ക്രൈബർമാർക്ക് 2026 ജനുവരി 28 മുതൽ പുതിയ പ്ലാനുകൾ പ്രാബല്യത്തിൽ വരും. അ‌തേസമയം വിലയിൽ വന്ന മാറ്റങ്ങളോ കണ്ടന്റ് പുനഃക്രമീകരണമോ നിലവിലുള്ള സബ്‌സ്‌ക്രൈബർമാരെ ബാധിക്കില്ലെന്ന് ജിയോഹോട്ട്‌സ്റ്റാർ സ്ഥിരീകരിച്ചു.

പുതിയ ജിയോഹോട്ട്സ്റ്റാർ പ്ലാനുകൾ

മൊബൈൽ: പ്രതിമാസ പ്ലാൻ- 79 രൂപ, ത്രൈമാസ പ്ലാൻ- 149 രൂപ, വാർഷിക പ്ലാൻ - 499 രൂപ.
സൂപ്പർ: പ്രതിമാസ പ്ലാൻ- 149 രൂപ, ത്രൈമാസ പ്ലാൻ- 349 രൂപ, വാർഷിക പ്ലാൻ - 1,099 രൂപ.
പ്രീമിയം: പ്രതിമാസ പ്ലാൻ- 299 രൂപ, ത്രൈമാസ പ്ലാൻ- 699 രൂപ, വാർഷിക പ്ലാൻ - 2,199 രൂപ.

മൊബൈൽ പ്ലാൻ നിരക്കിൽ മാറ്റമൊന്നുമില്ലെങ്കിലും, സൂപ്പർ, പ്രീമിയം വാർഷിക പ്ലാനുകൾക്ക് യഥാക്രമം 200 രൂപയും 700 രൂപയും വിലവർദ്ധനവ് ഉണ്ടായിട്ടുണ്ട്. ത്രൈമാസ സൂപ്പർ, പ്രീമിയം പ്ലാനുകൾക്ക് യഥാക്രമം 50 രൂപയും 200 രൂപയും വിലവർദ്ധനവ് ഉണ്ടായിട്ടുണ്ട്. മൊബൈൽ സബ്‌സ്‌ക്രിപ്‌ഷനായി, ഹോളിവുഡ് ഉള്ളടക്കം ആക്‌സസ് ചെയ്യുന്നതിന് ഉപയോക്താക്കൾ പ്രതിമാസ, ത്രൈമാസിക, വാർഷിക പ്ലാനുകൾക്ക് എക്സ്ട്രാ തുക നൽകേണ്ടതുണ്ട്.

ഡി​വൈസുകളുടെ എണ്ണവും പരസ്യവും

മൊ​ബൈൽ പ്ലാനിൽ ഒരു സമയം 1 മൊബൈൽ ഡി​വൈസും സൂപ്പർ പ്ലാനിൽ ഒരു സമയം 2 ഡി​വൈസുകൾ വരെയും പ്രീമിയം പ്ലാനിൽ ഒരു സമയം 4 ഡി​വൈസുകൾ വരെയും ആക്‌സസ് ചെയ്യാം. മൊ​ബൈൽ, സൂപ്പർ പ്ലാനുകളിൽ പരസ്യം ഉണ്ടാകും. എന്നാൽ സൂപ്പർ പ്ലാനിൽ ​ലൈവ് സ്പോർട്സ്, മ​റ്റ് ​ലൈവ് ഇവന്റുകൾ എന്നിവ ഒഴികെയുള്ളവയിൽ പരസ്യം ഉണ്ടാകില്ല.

മൊ​ബൈൽ പ്ലാനുകളിൽ ഹോളിവുഡ് ഒഴികെയുള്ള എല്ലാ കണ്ടന്റുകളും ഉൾപ്പെടുത്തിയിട്ടുണ്ട്. ഹോളിവുഡ് കണ്ടന്റ് ആഡ്-ഓണായി ലഭ്യമാണ്. സൂപ്പർ പ്ലാനിലും പ്രീമിയം പ്ലാനിലും മൊബൈൽ, വെബ്, ലിവിംഗ് റൂം ഡി​വൈസുകളിൽ എല്ലാ കണ്ടന്റുകളും ലഭ്യമാകും. ഹോളിവുഡ് കണ്ടന്റ് ആക്‌സസ് ചെയ്യുന്നതിന് മൊ​ബൈൽ പ്ലാൻ ഉപയോക്താക്കൾ പ്രതിമാസ, ത്രൈമാസിക, വാർഷിക പ്ലാനുകൾക്ക് 49 രൂപ, 129 രൂപ, 399 രൂപ വീതം എക്സ്ട്രാ നൽകേണ്ടതുണ്ട്.

എക്സ്ട്രാ നൽകേണ്ടിവരുന്ന തുക കൂടി കണക്കിലെടുക്കുമ്പോൾ ജിയോഹോട്ട്സ്റ്റാർ സൂപ്പർ പ്ലാൻ തെരഞ്ഞെടുക്കുന്നതാണ് നല്ലത്, കാരണം മൊബൈൽ ടയറിനൊപ്പം ഹോളിവുഡ് ഉള്ളടക്കം ആക്‌സസ് ചെയ്യുന്നതിന് അധിക പണം നൽകുകയാണെങ്കിൽ വിലയുടെ കാര്യത്തിൽ രണ്ട് സബ്‌സ്‌ക്രിപ്‌ഷൻ ടയറുകൾക്കും ഇടയിൽ കാര്യമായ വ്യത്യാസം വരുന്നില്ല. കുറച്ച് പണം കൂടി അ‌ധികം നൽകി സൂപ്പർ പ്ലാൻ തെരഞ്ഞെടുത്താൽ സകല ആനുകൂല്യങ്ങളോടും കൂടി ജിയോഹോട്ട്സ്റ്റാർ ആസ്വദിക്കാം.

സ്വകാര്യ ടെലിക്കോം കമ്പനികളുടെ വരിക്കാരെ സംബന്ധിച്ചിടത്തോളം പല റീച്ചാർജ് പ്ലാനുകൾക്ക് ഒപ്പവും നിലവിൽ ജിയോഹോട്ട്സ്റ്റാർ സബ്സ്ക്രിപ്ഷൻ സൗജന്യമായി ലഭ്യമാകുന്നുണ്ട്. ജിയോ വരിക്കാർക്ക് 949 രൂപ, 100 രൂപ, 195 രൂപ വിലകളിൽ ലഭ്യമായിട്ടുള്ള പ്ലാനുകളിൽ ജിയോഹോട്ട്സ്റ്റാർ സബ്സ്ക്രിപ്ഷനുകൾ ലഭ്യമാണ്. ഇതിൽ 949 രൂപയുടെ പ്ലാൻ വാലിഡിറ്റിയും മറ്റ് ആനുകൂല്യങ്ങളും ലഭിക്കുന്ന പ്രധാന പ്ലാനാണ്. മറ്റ് രണ്ട് പ്ലാനുകളും ജിയോഹോട്ട്സ്റ്റാർ അ‌ടങ്ങുന്ന ഡാറ്റ പ്ലാനുകളാണ്.