വീണ്ടും ലാവയുടെ സർജിക്കൽ സ്​ട്രൈക്ക്! വെറും 9499 രൂപ വിലയിൽ ലാവ യുവ 2 5G ലോഞ്ച് ചെയ്തു

ബജറ്റ് വിലയിൽ 5ജി സ്മാർട്ട്ഫോണുകൾ തേടുന്നവരെ ലക്ഷ്യമിട്ട് 10000 രൂപയിൽ താഴെ വിലയിൽ പുതിയ 5ജി സ്മാർട്ട്ഫോൺ അ‌വതരിപ്പിച്ച് ലാവ. കമ്പനിയുടെ ജനപ്രിയ സ്മാർട്ട്ഫോൺ സീരീസായ യുവ സീരീസിലെ ഏറ്റവും പുതിയ മോഡലായി ലാവ യുവ 2 5ജി (Lava Yuva 2 5G) ആണ് ഇപ്പോൾ ഇന്ത്യയിൽ ലോഞ്ച് ചെയ്തിരിക്കുന്നത്. മറ്റ് സ്മാർട്ട്ഫോണുകളിൽ നിന്ന് കാഴ്ചയിൽ വ്യത്യസ്തമായ ഒരു ക്യാമറ മൊഡ്യൂളുമായാണ് ഈ ബജറ്റ് 5ജി ഫോൺ എത്തിയിരിക്കുന്നത്. ഇതിന്റെ ക്യാമറ മൊഡ്യൂളിനൊപ്പം ഒരു നോട്ടിഫിക്കേഷൻ ​ലൈറ്റും നൽകിയിട്ടുണ്ട്.

ആപ്പ്, സിസ്റ്റം നോട്ടിഫിക്കേഷനുകളും ഇൻകമിംഗ് കോളുകളും വരുമ്പോൾ ക്യാമറയ്ക്ക് ചുറ്റുമുള്ള നോട്ടിഫിക്കേഷൻ ​ലൈറ്റ് മിന്നിമറയുന്നു, 10000 രൂപയിൽ താഴെ വിലയിൽ എത്തുന്ന ഒരു 5ജി ഫോണിൽ ഇതാദ്യമായാണ് ഈ ഫീച്ചർ അ‌വതരിപ്പിക്കപ്പെടുന്നത് എന്ന് കമ്പനി അ‌വകാശപ്പെടുന്നു. ബ്ലോട്ട്വെയറുകൾ ഇല്ലാതെ ക്ലീൻ ആൻഡ്രോയിഡ് 14ൽ ആണ് ഈ ഫോണിന്റെ പ്രവർത്തനം.

ലാവ യുവ 2 5ജിയുടെ പ്രധാന ഫീച്ചറുകൾ: 6.67 ഇഞ്ച് (1600 × 720 പിക്സലുകൾ) HD+ LCD സ്ക്രീൻ, 90Hz റിഫ്രഷ് റേറ്റ്, 700 nits വരെ പീക്ക് ​ബ്രൈറ്റ്നസ് എന്നിവ ഇതിലുണ്ട്. ഒക്ടാ കോർ 6nm യൂണിസോക് T760 (Quad Core Cortex A76 ഉം Octa Core Cortex A55 ഉം 2.21GHz വരെ ക്ലോക്ക് ചെയ്തിരിക്കുന്നു) ചിപ്സെറ്റാണ് ഈ ഫോണിന്റെ കരുത്ത്.

Mali-G57 MC4 ജിപിയു, 4GB LPDDR4x റാം, 128GB UFS 2.2 ഇൻ്റേണൽ സ്റ്റോറേജ്, മൈക്രോ എസ്ഡി ഉപയോഗിച്ച് 1TB വരെ സ്റ്റോറേജ് വർധിപ്പിക്കാനുള്ള സൗകര്യം എന്നിവ ലാവ യുവ 2 5ജിയിലുണ്ട്. ആൻഡ്രോയിഡ് 14 അ‌ടിസ്ഥാനമാക്കിയാണ് ഈ ബജറ്റ് 5ജി ഫോണിന്റെ പ്രവർത്തനം.

ലാവ യുവ 2 5ജിയിൽ ഡ്യുവൽ റിയർ ക്യാമറ സജ്ജീകരണമാണ് ഒരുക്കിയിരിക്കുന്നത്. അ‌തിൽ എഫ്/1.8 അപ്പേർച്ചറുള്ള 50എംപി മെയിൻ ക്യാമറ, 2എംപി എഐ ക്യാമറയും എൽഇഡി ഫ്ലാഷും അ‌ടങ്ങുന്നു. സെൽഫിക്കും വീഡിയോ കോളുകൾക്കുമായി 8എംപി ഫ്രണ്ട് ഫേസിംഗ് ക്യാമറയും ഈ ഫോണിലുണ്ട്.

ഡ്യുവൽ സിം, സൈഡ് മൗണ്ടഡ് ഫിംഗർപ്രിൻ്റ് സ്കാനർ, 3.5എംഎം ഓഡിയോ ജാക്ക്, എഫ്എം റേഡിയോ, സ്റ്റീരിയോ സ്പീക്കറുകൾ, 5G SA / NSA, 4G VoLTE, Wi-Fi 802.11 ac, ബ്ലൂടൂത്ത് 5.0, GPS + GLONASS, USB ടൈപ്പ്-സി, 18W ചാർജിംഗ് ഉള്ള 5000mAh ബാറ്ററി എന്നിവയാണ് ഈ ബജറ്റ് 5ജി ഫോണിലെ മറ്റ് പ്രധാന ഫീച്ചറുകൾ.

വിലയും ലഭ്യതയും: ലാവ യുവ 2 5ജി മാർബിൾ ബ്ലാക്ക്, മാർബിൾ വൈറ്റ് നിറങ്ങളിൽ മാർബിൾ ഫിനിഷോടുകൂടി വരുന്നു, ഇതിൻ്റെ പ്രാരംഭ വില 9499 രൂപയാണ്. ഇന്ത്യയിലുടനീളമുള്ള റീട്ടെയിൽ ഔട്ട്‌ലെറ്റുകളിൽ നിന്ന് ഈ 5ജി ഫോൺ ലഭ്യമാകും. 1 വർഷത്തെ വാറൻ്റി കമ്പനി ഇതിന് നൽകുന്നുണ്ട്. കൂടാതെ സൗജന്യമായി വീട്ടിലെത്തി സർവീസ് ചെയ്യുകയും ചെയ്യും.

ലാവയുടെ ഈ പുതിയ ബജറ്റ് 5ജി ഫോൺ മറ്റ് ബ്രാൻഡുകളുടെ ബജറ്റ് 5ജി ഫോണുകൾക്ക് കനത്ത വെല്ലുവിളി ഉയർത്തുന്നു. ക്യാമറ മൊഡ്യൂളിലെ നോട്ടിഫിക്കേഷൻ ​ലൈറ്റ് ഉൾപ്പെടെ ഈ സെഗ്മെന്റിലെ മറ്റ് ഫോണുകളെ കവച്ചുവയ്ക്കുന്ന ഫീച്ചറുകൾ ലാവ യുവ 2 5ജി വാഗ്ദാനം ചെയ്യുന്നുണ്ട് എന്നാണ് കമ്പനി പറയുന്നത്.