12,999 രൂപയ്ക്ക് മിവി വൺ 5ജി! കിടിലൻ ഫീച്ചറുകളുമായി വിപണിയിൽ, അറിയേണ്ടതെല്ലാം

തങ്ങളുടെ കന്നി സ്‌മാർട്ട്‌ഫോണായ 'വൺ 5ജി' (One 5G) ഒക്ടോബർ 9-ന് നടന്ന ഇന്ത്യ മൊബൈൽ കോൺഗ്രസിൽ മിവി (Mivi) പ്രദർശിപ്പിച്ചു. സെപ്റ്റംബർ 24-നാണ് ഈ ഫോൺ ഇന്ത്യയിൽ ഔദ്യോഗികമായി അവതരിപ്പിച്ചത്. 4GB + 128GB അടിസ്ഥാന മോഡലിന് 12,999 രൂപ മുതലാണ് വില ആരംഭിക്കുന്നത്. ഫ്ലിപ്കാർട്ട് ബിഗ് ബില്യൺ ഡെയ്‌സിന്റെ ഭാഗമായി ഒക്ടോബർ 8 മുതൽ ഫോണിന്റെ ഏർലി ആക്‌സസ് വിൽപ്പന ആരംഭിച്ചിരുന്നു.

ആദ്യഘട്ടത്തിൽ ഫ്ലിപ്കാർട്ട് വഴിയാണ് ഫോൺ വിൽപ്പനയ്‌ക്കെത്തുന്നത്. മിവി വെബ്‌സൈറ്റിൽ തിരയുന്നവരെയും ഫ്ലിപ്കാർട്ടിലേക്കാണ് റീഡയറക്‌ട് ചെയ്യുന്നത്. ബിഗ് ബില്യൺ ഡെയ്‌സ് സെയിലിന്റെ ഭാഗമായി ആക്സിസ്, ഐസിഐസിഐ ബാങ്ക് കാർഡുകൾ ഉപയോഗിച്ച് വാങ്ങുന്നവർക്ക് 10 ശതമാനം ഇൻസ്റ്റന്റ് ഡിസ്കൗണ്ട് ലഭിക്കും. കൂടാതെ നോ-കോസ്റ്റ് ഇഎംഐ, ഫ്ലിപ്കാർട്ട് പേ ലേറ്റർ തുടങ്ങിയ ഓഫറുകളുമുണ്ട്. പഴയ ഫോണിന്റെ അവസ്ഥയനുസരിച്ച് മികച്ച എക്സ്ചേഞ്ച് ഓഫറുകളും സ്വന്തമാക്കാം.

മിവി വൺ 5ജി: വിലയും വേരിയന്റുകളും

മൂന്ന് റാം വേരിയന്റുകളിലാണ് മിവി വൺ 5ജി എത്തുത്തുന്നത്. എല്ലാത്തിലും 128GB സ്റ്റോറേജുണ്ട്. 4GB, 6GB, 8GB എന്നിങ്ങനെയാണ് റാം ഓപ്ഷനുകൾ. ഫോണുകൾ ഫ്ലിപ്കാർട്ടിൽ ലഭ്യമാണ്. കാർഡ് ഓഫറുകളിലെ 10 ശതമാനം ഇളവ് കൂടി കണക്കാക്കിയാൽ, 4GB മോഡൽ ഏകദേശം 11,700 രൂപയ്ക്ക് സ്വന്തമാക്കാം (നികുതികളും പരിധികളും ബാധകം).

മിവി വൺ 5ജി: സവിശേഷതകളും 5ജി പിന്തുണയും

ക്വാൽകോം സ്നാപ്ഡ്രാഗൺ 4 ജെൻ 2 പ്രോസസറിലാണ് മിവി വൺ 5ജി പ്രവർത്തിക്കുന്നത്. ക്ലീൻ ആൻഡ്രോയിഡ് 16 ഓപ്പറേറ്റിംഗ് സിസ്റ്റമാണ് ഫോണിലുള്ളത്. 6.75 ഇഞ്ച് HD+ 120Hz LCD ഡിസ്‌പ്ലേ, 50MP പ്രധാന ക്യാമറ, 8MP സെൽഫി ക്യാമറ എന്നിവയും ഇതിലുണ്ട്. 18W USB PD ചാർജിംഗ് പിന്തുണയുള്ള 6,000mAh ബാറ്ററിയാണ് ഫോണിന്റെ കരുത്ത്. 5G SA, NSA പിന്തുണ പ്രഖ്യാപിച്ചിട്ടുണ്ടെങ്കിലും, ബാന്റുകളെക്കുറിച്ചും VoNR പിന്തുണയെക്കുറിച്ചും മിവി വിവരങ്ങൾ പുറത്തുവിട്ടിട്ടില്ല.

മിവി വൺ 5ജി: എതിരാളികളും അറിയേണ്ട കാര്യങ്ങളും

15,000 രൂപയിൽ താഴെയുള്ള ഫോണുകളുടെ വിഭാഗത്തിൽ ലാവ വിരാട് വി1 5ജി, ടെക്നോ പോവ 7 5ജി തുടങ്ങിയ പ്രമുഖ മോഡലുകളുമായാണ് മിവി മത്സരിക്കുന്നത്. അടിസ്ഥാന മോഡലിൽ തന്നെ 128GB സ്റ്റോറേജും ക്ലീൻ സോഫ്റ്റ്‌വെയറും നൽകിയാണ് മിവി ഇതിനെ ചെറുക്കുന്നത്. ബ്രാൻഡിന്റെ ആദ്യ സ്മാർട്ട്‌ഫോണായതിനാൽ തന്നെ, തിടുക്കം കൂട്ടാതെ ആദ്യമാസത്തെ റിവ്യൂകളും യൂസർ ഫീഡ്‌ബാക്കുകളും നോക്കിയ ശേഷം ഫോൺ വാങ്ങുന്നതാവും ഉചിതം.

മിവി വൺ 5ജി: സർവീസ്, വാറന്റി, ഡെലിവറി

'മിവി കേർ+' വഴി ഒരു വർഷത്തെ വാറന്റിയും ഏഴ് ദിവസത്തെ റീപ്ലേസ്‌മെന്റും കമ്പനി നൽകുന്നുണ്ട്. 19,000-ത്തിലധികം പിൻകോഡുകളിൽ ഡോർസ്റ്റെപ്പ് പിക്ക്-അപ്പ് ആന്റ് ഡ്രോപ്പ് സൗകര്യവുമുണ്ട്. രാജ്യത്തുടനീളം 500-ലധികം സർവീസ് സെന്ററുകളുണ്ടെന്നും 7 മുതൽ 10 ദിവസത്തിനകം സർവീസ് പൂർത്തിയാക്കുമെന്നും മിവി അവകാശപ്പെടുന്നു. ഫോൺ എന്ന് ഡെലിവറിയാകുമെന്ന തീയതി ഫ്ലിപ്കാർട്ട് ചെക്ക്ഔട്ടിൽ കാണാം. ഫ്ലിപ്കാർട്ട് പ്ലസ് അംഗങ്ങൾക്ക് ഒക്ടോബർ 8-ന് ഏർലി ആക്‌സസ് ലഭിച്ചപ്പോൾ, ഒക്ടോബർ 9 മുതൽ എല്ലാവർക്കും വാങ്ങാനാകും.