Vpn Rules: ഒളിഞ്ഞ് നോട്ടം ഉടനില്ല; വിപിഎൻ ചട്ടം നടപ്പിലാക്കാനുള്ള കാലാവധി നീട്ടി കേന്ദ്രം

നിർദേശങ്ങൾ നടപ്പിലാക്കാനുള്ള സമയ പരിധി നീട്ടണമെന്ന് കാട്ടി നിരവധി അപേക്ഷകൾ ഇലക്ട്രോണിക്സ് ആൻഡ് ഐടി മന്ത്രാലയത്തിനും സിഇആർടി-ഇന്നിനും ലഭിച്ചിരുന്നു. അതേ തുടർന്നാണ് നടപടി. 2022 സെപ്റ്റംബർ 25 ആണ് പുതുക്കിയ മാർഗനിർദേശങ്ങൾ നടപ്പിലാക്കാൻ ഉള്ള അവസാന ദിവസം. പുതുക്കിയ മാർഗനിർദേശങ്ങളെ തുടർന്ന് വിവിധ വിപിഎൻ സ്ഥാപനങ്ങൾ ഇന്ത്യയിലെ സേവനം അവസാനിപ്പിച്ചിരുന്നു.

ഡാറ്റ സെന്ററുകൾ, വെർച്വൽ പ്രൈവറ്റ് സെർവർ (വിപിഎസ്) ദാതാക്കൾ, ക്ലൗഡ് സർവീസ് പ്രൊവൈഡർമാർ, വെർച്വൽ പ്രൈവറ്റ് നെറ്റ്‌വർക്ക് സർവീസ് (വിപിഎൻ സർവീസ്) ദാതാക്കൾ എന്നിവർക്ക് സിഇആർടി-ഇൻ പ്രഖ്യാപിച്ച സംവിധാനങ്ങൾ നടപ്പിലാക്കുന്നതിന് ഇനി കൂടുതൽ സമയം ലഭിക്കും. സൂക്ഷ്മ, ചെറുകിട, ഇടത്തരം സംരംഭങ്ങൾക്ക് സൈബർ സുരക്ഷാ നിർദേശങ്ങൾ നടപ്പിലാക്കുന്നതിന് ആവശ്യമായ ശേഷി വർധിപ്പിക്കുന്നതിനും സെപ്റ്റംബർ 25 വരെ സമയം നീട്ടി നൽകിയിട്ടുണ്ട്.

എപ്രിലിൽ പുറത്തിറക്കിയ പുതിയ സൈബർ സുരക്ഷ മാനദണ്ഡങ്ങൾ പ്രകാരം വിപിഎൻ കമ്പനികൾ തങ്ങളുടെ സബ്സ്ക്രൈബേഴ്സിന്റെ യൂസർ ഡാറ്റ ശേഖരിക്കുകയും സംഭരിക്കുകയും വേണം. കുറഞ്ഞത് 5 വർഷത്തേക്കെങ്കിലും ഈ ഡാറ്റ സൂക്ഷിച്ച് വയ്ക്കണം. സൈബർ സുരക്ഷ പ്രതികരണ നടപടികൾ കോർഡിനേറ്റ് ചെയ്യാനും അടിയന്തര സാഹചര്യങ്ങൾ കൈകാര്യം ചെയ്യാനും വേണ്ടിയാണ് പുതിയ നിർദേശം എന്നാണ് സർക്കാർ നിലപാട്.

വിപിഎൻ സേവന ദാതാക്കൾക്ക് പുറമെ വെർച്വൽ പ്രൈവറ്റ് സെർവർ ( വിപിഎസ് ) പ്രൊവൈഡേഴ്സ്, ഡാറ്റ സെന്റേഴ്സ്, ക്ലൌഡ് സർവീസ് പ്രൊവൈഡേഴ്സ് എന്നിവർക്കും യൂസർ ഡാറ്റ കളക്റ്റ് ചെയ്യാൻ ഉള്ള നിർദേശമുണ്ട്. 5 വർഷത്തേക്കാണ് ഇവരും വിവരങ്ങൾ സൂക്ഷിച്ച് വയ്ക്കേണ്ടത്. യൂസേഴ്സിന്റെ ഹോം അഡ്രസ്, ഐപി അഡ്രസുകൾ എന്നിവ പോലെയുള്ള ഡാറ്റകളാണ് കളക്റ്റ് ചെയ്യേണ്ടത്.

സമയം നീട്ടി നൽകിയെങ്കിലും സർക്കാർ നയത്തോട് മുഖം തിരിക്കുകയാണ് പ്രമുഖ വിപിഎൻ സേവനദാതാക്കൾ എല്ലാം. നോർഡ് വിപിഎൻ, സർഫ് ഷാർക്, എക്സ്പ്രസ് വിപിഎൻ എന്നീ കമ്പനികൾ ഇന്ത്യയിലെ തങ്ങളുടെ സെർവറുകൾ നീക്കം ചെയ്തിരുന്നു. പ്യുവർവിപിഎന്നും തങ്ങളുടെ സെർവറുകൾ നീക്കം ചെയ്തിട്ടുണ്ട്. യൂസേഴ്സിന്റെ ഡാറ്റ ശേഖരിക്കാൻ കഴിയില്ലെന്നും അത് വിപിഎൻ സേവനങ്ങളുടെ ആവശ്യകതയെ ഇല്ലാതാക്കുമെന്നും കമ്പനികൾ പറയുന്നു.

VPN സേവന ദാതാക്കൾ സൂക്ഷിക്കേണ്ട ഡാറ്റ

• സേവനങ്ങൾ സബ്സ്ക്രൈബ് ചെയ്യുന്ന വരിക്കാരുടെ / ഉപഭോക്താക്കളുടെ വാലിഡ് ആയ പേര്.
• സബ്സ്ക്രൈബ് ചെയ്ത തീയതികൾ അടക്കമുള്ള വാടക കാലയളവ്.
• അംഗങ്ങൾക്ക് അനുവദിച്ചിട്ടുള്ള / ഉപയോഗിക്കുന്ന ഐപികൾ.
• രജിസ്ട്രേഷൻ / ഓൺ ബോർഡിംഗ് സമയത്ത് ഉപയോഗിച്ച ഇമെയിൽ അഡ്രസ്, ഐപി അഡ്രസ് ടൈം സ്റ്റാമ്പ്.
• സേവനങ്ങൾ എന്തിനായി ഉപയോഗിക്കുന്നു.
• യൂസറിനെ ബന്ധപ്പെടാനുള്ള അഡ്രസുകളും നമ്പറുകളും.
• സബ്‌സ്‌ക്രൈബർമാരുടെ / ഉപഭോക്താക്കളുടെ ഓണർഷിപ്പ് പാറ്റേൺ.



ഇതിന് പുറമെ, എല്ലാ സർക്കാർ, സ്വകാര്യ ഏജൻസികളും സൈബർ സുരക്ഷാ ലംഘന സംഭവങ്ങൾ ശ്രദ്ധയിൽപ്പെട്ടാൽ ആറ് മണിക്കൂറിനുള്ളിൽ തന്നെ റിപ്പോർട്ട് ചെയ്യണമെന്നും നിർദേശമുണ്ട്. ന്റർനെറ്റ് സേവന ദാതാക്കൾ, സോഷ്യൽ മീഡിയ പ്ലാറ്റ്‌ഫോമുകൾ, ഡാറ്റാ സെന്ററുകൾ തുടങ്ങിയവയ്ക്കെല്ലാം ഈ നിർദേശം ബാധകം ആണ്.