സര്‍ക്കാര്‍ സൈറ്റുകള്‍ ഉപയോഗിക്കുന്നത് 70% ഉപയോക്താക്കള്‍

രാജ്യത്തെ 70 ശതമാനത്തോളം ഇന്റര്‍നെറ്റ് ഉപയോക്താക്കളും വിവിധ ആവശ്യങ്ങള്‍ക്കായി സര്‍ക്കാര്‍ വെബ്‌സൈറ്റുകളെ ആശ്രയിക്കുന്നവരാണെന്ന് ഐടി കമ്പനിയായ ആക്‌സഞ്ചര്‍ വ്യക്തമാക്കി. വിവിധ ഫോമുകള്‍ ലഭിക്കുന്നതിനും പണമടക്കുന്നതിനും തുടങ്ങിയുള്ള സര്‍ക്കാര്‍ സേവനങ്ങള്‍ക്കാണ് നെറ്റ് ഉപയോക്താക്കള്‍ ഈ സൈറ്റുകളെ

ഉപയോഗിക്കുന്നത്. ഇത്തരത്തില്‍ ഇനിയും കൂടുതല്‍ ഓണ്‍ലൈന്‍ ചാനലുകള്‍ ആവശ്യമാണെന്നാണ് 53 ശതമാനത്തോളം നെറ്റ്ഉപയോക്താക്കളും ആവശ്യപ്പെടുന്നതെന്നും ആക്‌സഞ്ചര്‍ പഠനം വ്യക്തമാക്കുന്നു.

സ്വകാര്യ കമ്പനികളുമായി ഇടപെടുന്നത് പോലെ വളരെ എളുപ്പമുള്ളതായിരിക്കുകയാണ് സര്‍ക്കാര്‍ വകുപ്പുകളുമായുള്ള ഇടപെടലെന്നും 50 ശതമാനം ഇന്റര്‍നെറ്റ് ഉപയോക്താക്കള്‍ അഭിപ്രായപ്പെടുന്നു. തിരക്കുകള്‍ക്കിടയില്‍ സര്‍ക്കാര്‍ വകുപ്പുകളുടെ വിവിധ ഫോറങ്ങള്‍ കൈപറ്റാനും പണമടക്കാനും ഓഫീസുകള്‍ക്കു മുന്നിലെ നീണ്ട വരികളില്‍ നില്‍ക്കുന്നതിനേക്കാള്‍ എളുപ്പമാണ് ഒരു കമ്പ്യൂട്ടറില്‍ അല്പ സമയം ചെലവഴിക്കുന്നതെന്ന അഭിപ്രായമാണ് ഇന്ത്യന്‍ ഇന്റര്‍നെറ്റ് ഉപയോക്താക്കളില്‍ വലിയൊരളവിനും ഉള്ളത്.

ഇന്ത്യന്‍ സര്‍ക്കാര്‍ സേവനങ്ങള്‍ക്ക് ഇന്റര്‍നെറ്റ് പ്ലാറ്റ്‌ഫോമില്‍ ലഭിച്ച സ്വീകാര്യതയേക്കാള്‍ കുറവാണ് ഓസ്‌ട്രേലിയ, ഫ്രാന്‍സ്, ജര്‍മ്മനി, സിംഗപ്പൂര്‍, യുഎസ്, യുകെ എന്നീ രാജ്യങ്ങളിലേതെന്നും പഠനം വ്യക്തമാക്കുന്നു.