ഫോൺ ചാർജിങ് ഒരു തലവേദന ആയിരുന്നോ, സാരമില്ല... എല്ലാം ശരിയാക്കിയിട്ടുണ്ട് ഈ ​ചൈനക്കാർ!

സ്മാർട്ട്ഫോൺ ഉപയോക്താക്കളെ സംബന്ധിച്ചിടത്തോളം ബാറ്ററി ശേഷിക്ക് വളരെ പ്രാധാന്യം നൽകാറുണ്ട്. എന്നാൽ സ്മാർട്ട്ഫോൺ ബ്രാൻഡുകൾ ബാറ്ററി ഡിപ്പാർട്ട്മെന്റിനോട് കാര്യമായ താൽപര്യം പ്രകടിപ്പിച്ചിരുന്നില്ല. എന്നാൽ 2024ൽ അ‌ക്കാര്യത്തിൽ ചില മാറ്റങ്ങൾ കണ്ടു. ഒരു ദിവസം മുഴുവൻ ചാർജ് നിൽക്കുന്ന സ്മാർട്ട്ഫോണുകൾ വിപണിയിൽ എത്തി. എന്നാൽ അ‌തിനെയും മറികടന്ന് 2025ൽ കൂടുതൽ ബാറ്ററി ശേഷിയുള്ള സ്മാർട്ട്ഫോണുകളാൽ വിപണി സമ്പന്നമാകുമെന്ന് ഏറ്റവും പുതിയ റിപ്പോർട്ടുകൾ പ്രവചിക്കുന്നു. പ്രമുഖ ​ചൈനീസ് സ്മാർട്ട്ഫോൺ ബ്രാൻഡുകൾ 2025നെ ലക്ഷ്യമാക്കി പുറത്തിറക്കിയതും പുറത്തിറക്കാൻ പോകുന്നതുമായ ഫോണുകൾ മികച്ച ബാറ്ററി​ശേഷി അ‌വതരിപ്പിക്കും എന്ന് ഈ മേഖലയിലെ വിദഗ്ധർ നിരീക്ഷിക്കുന്നു.

പ്രീമിയം സ്മാർട്ട്ഫോണുകൾ ഉയർന്ന വിലയിൽ എത്തുന്നവയാണ്. അ‌തിൽ പെർഫോമൻസ്, ക്യാമറ എന്നീ വിഭാഗങ്ങൾക്ക് ഒപ്പം തന്നെ പ്രാധാന്യം ബാറ്ററി ഡിപ്പാർട്ട്മെന്റിനും നൽകേണ്ടതുണ്ട്. എന്നാൽ അ‌ടുത്ത് വരാൻ പോകുന്ന സാംസങ് ഗാലക്‌സി എസ് 25 സീരീസിൽ പുതിയ ബാറ്ററി ടെക്നോളജി അ‌വതരിപ്പിക്കാൻ സാധ്യതയില്ല, അ‌തേപോലെ ആപ്പിൾ തങ്ങളുടെ ഐഫോൺ സീരീസിലും ഗൂഗിൾ തങ്ങളുടെ പിക്സൽ സീരീസിലും ബാറ്ററി ശേഷി നവീകരണം കൊണ്ടുവരാൻ ശ്രമിക്കുന്നതിന്റെ ലക്ഷണങ്ങളൊന്നുമില്ല.

ആപ്പിളും സാംസങ്ങും ഗൂഗിളും പ്രീമിയം സ്മാർട്ട്ഫോണുകളിലെ ബാറ്ററി ശേഷിയുടെ കാര്യത്തിൽ ഇങ്ങനെ ഉൾവലിഞ്ഞ് നിൽക്കുന്നു, പക്ഷേ ഇവിടെയാണ് ​ചൈനീസ് സ്മാർട്ട്ഫോൺ ബ്രാൻഡുകൾ ഇപ്പോൾ സ്കോർ ചെയ്തിരിക്കുന്നത്. ആവേശകരമായ മാറ്റമാണ് പ്രീമിയം മോഡലുകളുടെ ബാറ്ററി ശേഷിയിലും ടെക്നോളജിയിലും ​ചൈനീസ് സ്മാർട്ട്ഫോൺ ബ്രാൻഡുകൾ ഇപ്പോൾ കാഴ്ചവച്ചുകൊണ്ടിരിക്കുന്നത്.

2024ൽ വിവോ X100 പ്രോ, X100 അ‌ൾട്ര, ഓപ്പോ ​ഫൈൻഡ് X7 അ‌ൾട്ര, വൺപ്ലസ് 12, ഹോണർ മാജിക് 6 പ്രോ എന്നീ പ്രീമിയം സ്മാർട്ട്ഫോണുകളെല്ലാം 5000എംഎഎച്ചിന് മുകളിൽ ബാറ്ററി ശേഷിയുമായി മികച്ച പ്രകടനം കാഴ്ചവച്ചവയാണ്. 2025ലേക്ക് എത്തുമ്പോൾ കൂടുതൽ മെച്ചപ്പെട്ട ബാറ്ററി ശേഷി ബ്രാൻഡുകൾ അ‌വതരിപ്പിക്കുന്നു.

അ‌തായത്, 2025 ലക്ഷ്യമാക്കി എത്തിയിരിക്കുന്ന ഫ്ലാഗ്ഷിപ്പുകൾക്കൊപ്പം, ബ്രാൻഡുകൾ 6000mAh വരെ ബാറ്ററി ശേഷി നൽകുന്നുണ്ട്. വൺപ്ലസ് 13, വിവോ X200 Pro എന്നിവ 6000mAh ബാറ്ററികളുമായാണ് വരുന്നത്, അ‌തേപോലെ ഐക്യൂ 13 6150mAh ബാറ്ററിയും ഷവോമി 15 പ്രോ 6100mAh ബാറ്ററിയും അ‌വതരിപ്പിക്കുന്നു. ഹോണറും മോശമാക്കിയിട്ടില്ല, ഹോണറിന്റെ മാജിക് 7 പ്രോ 5850mAh ബാറ്ററിയുമായാണ് എത്തുന്നത്.

ഈ നിലയിൽ പ്രീമിയം മോഡലുകളിലെ ബാറ്ററി ശേഷി മെച്ചപ്പെടുത്തുന്നതിൽ ​ചൈനീസ് സ്മാർട്ട്ഫോൺ ബ്രാൻഡുകൾ മത്സരിക്കുന്നു. സിലിക്കൺ-കാർബൺ ബാറ്ററി സാങ്കേതികവിദ്യയിലേക്കുള്ള മാറ്റമാണ് നിലവിലെ ഈ മാറ്റത്തിന്റെ പ്രധാന കാരണം എന്ന് വിലയിരുത്തപ്പെടുന്നു. ഈ പറഞ്ഞ മോഡലുകളിലെ ബാറ്ററികൾക്ക് ഇപ്പോഴും ലിഥിയം അടിസ്ഥാനമാക്കിയുള്ള സെല്ലുകളുണ്ട്, പക്ഷേ അവ ഒരു സിലിക്കൺ കാർബൈഡ് ആനോഡ് ഉപയോഗിക്കുന്നു.

കുറച്ചുകൂടി വിശദമായി പറഞ്ഞാൽ, സാധാരണഗതിയിൽ ലിഥിയം-അയൺ ബാറ്ററികൾക്ക് ഒരു ലിഥിയം മെറ്റൽ ഓക്സൈഡ് ഉണ്ട്, അത് കാഥോഡായി വർത്തിക്കുന്നു, ഗ്രാഫൈറ്റ് അല്ലെങ്കിൽ മറ്റൊരു ഡെറിവേറ്റീവ് അല്ലെങ്കിൽ കാർബൺ ആനോഡായി പ്രവർത്തിക്കുന്നു. സിലിക്കൺ-കാർബൺ ബാറ്ററികൾക്കൊപ്പം, കാഥോഡ് ഇപ്പോഴും സമാനമാണ്, എന്നാൽ ആനോഡിൽ സിലിക്കണിൻ്റെയും ഗ്രാഫൈറ്റിൻ്റെയും മിശ്രിതം അടങ്ങിയിരിക്കുന്നു, ഇത് പുതിയ നേട്ടങ്ങൾ സമ്മാനിക്കുന്നു.

മിക്‌സിലേക്ക് സിലിക്കൺ ചേർക്കുന്നതിലൂടെ, ഉയർന്ന സാന്ദ്രതയും തീവ്രമായ കാലാവസ്ഥയ്‌ക്കെതിരെ ഉയർന്ന പ്രതിരോധശേഷിയുമുള്ള ബാറ്ററികൾ ലഭിക്കുന്നു. സിലിക്കൺ അധിഷ്‌ഠിത ആനോഡുകൾക്ക് കൂടുതൽ മികച്ച സാന്ദ്രത ഉള്ളതിനാൽ, വലുപ്പത്തിലും ഭാരത്തിലും പ്രകടമായ വ്യത്യാസമില്ലാതെ മികച്ച ശേഷിയുള്ള ബാറ്ററികളുള്ള ഫോണുകൾ ലഭിക്കുന്നു. ഇന്നത്തെ മിക്ക ഫോണുകളും ഫാസ്റ്റ് ചാർജിംഗ് പരമാവധിയാക്കാൻ ഡ്യുവൽ-സെൽ ഘടനയാണ് ഉപയോഗിക്കുന്നത്, എന്നാൽ വർദ്ധിച്ച സാന്ദ്രത കാരണം, സിലിക്കൺ-കാർബൺ ബാറ്ററികൾ ഒരൊറ്റ സെല്ലിൽ നിർമ്മിക്കുന്നു, അതിനാൽ അവ വേഗത്തിൽ ചാർജാകില്ല.