സാംസങ് ഗാലക്‌സി S9, ഗാലക്‌സി S9+ എന്നിവ ഫെബ്രുവരി 25-ന് പുറത്തിറങ്ങും

സാംസങ് ഫ്‌ളാഗ്ഷിപ്പ് സ്മാര്‍ട്ട്‌ഫോണുകളായ ഗാലക്‌സി S9, S9+ എന്നിവ ഫെബ്രുവരിയില്‍ നടക്കുന്ന എംഡബ്ല്യുസി 2018-ല്‍ പുറത്തിറക്കുമെന്ന് നേരത്തേ സൂചനകളുണ്ടായിരുന്നു. ഇക്കാര്യത്തില്‍ സാംസങില്‍ നിന്ന് സ്ഥിരീകരണം വന്നുകഴിഞ്ഞു. ഫെബ്രുവരി 25-ന് ഗാലക്‌സി S9, S9+ എന്നിവ പുറത്തിറങ്ങിയേക്കും. 25-ന് നടക്കുന്ന ചടങ്ങിലേക്ക് മാധ്യമങ്ങള്‍ക്ക് ക്ഷണം ലഭിച്ചിട്ടുണ്ട്.

അടിമുടി മാറ്റം വരുത്തിയ ക്യാമറയായിരിക്കും ഗാലക്‌സി S9-ലും S9+-ലും ഉണ്ടാവുകയെന്ന് സാംസങ് ക്ഷണക്കത്തില്‍ പറയുന്നു. സമാനമായ വിവരങ്ങള്‍ നേരത്തേ വിവിധ മാധ്യമങ്ങളും പ്രസിദ്ധീകരിച്ചിട്ടുണ്ട്. ഫോട്ടോ എടുക്കുന്നതിന് മുമ്പ് മാറ്റം വരുത്താന്‍ കഴിയുന്ന അപെര്‍ച്ചറോട് കൂടിയ 12 MP ക്യാമറയായിരിക്കും ഈ ഫോണുകളുടെ പ്രധാന ആകര്‍ഷണം.

അപെര്‍ച്ചര്‍ f/1.5 മുതല്‍ f/2.4 വരെ വ്യത്യാസപ്പെടുത്താന്‍ കഴിയും. ഈ സവിശേഷതയോടെ പുറത്തിറങ്ങിയ ആദ്യ സ്മാര്‍ട്ട്‌ഫോണ്‍ സാംസങ് W2018 ആയിരുന്നു.

480 fps-ല്‍ HD സൂപ്പര്‍ സ്ലോ മോഷന്‍ വീഡിയോകള്‍ ഗാലക്‌സി S9-ലും S9+-ലും എടുക്കാന്‍ കഴിയുമെന്നും അഭ്യൂഹങ്ങളുണ്ട്. കഴിഞ്ഞ വര്‍ഷം പുറത്തിറങ്ങിയ ഗാലക്‌സി S8, S8+ എന്നീ ഫോണുകള്‍ക്ക് 240 fps HD സ്ലോ മോഷന്‍ വീഡിയോകള്‍ പകര്‍ത്താന്‍ കഴിയും.

ഗാലക്‌സി S9-ല്‍ പിന്‍ഭാഗത്ത് ഒരു ക്യാമറയും S9+-ല്‍ രണ്ട് ക്യാമറകളും ഉണ്ടാകുമെന്നാണ് പുറത്തുവരുന്ന വിവരം. ഗാലക്‌സി നോട്ട് 8-ല്‍ നിന്ന് വ്യത്യസ്തമായി ഇരട്ട ക്യാമറകള്‍ ലംബമായാണ് ക്രമീകരിച്ചിരിക്കുന്നതെന്നും പറയപ്പെടുന്നു.

18.5:9 ആസ്‌പെക്ട് റേഷ്യോയോട് കൂടിയ 5.8 ഇഞ്ച്, 6.2 ഇഞ്ച് സൂപ്പര്‍ AMOLED ഇന്‍ഫിനിറ്റി ഡിസ്‌പ്ലേകള്‍ ആയിരിക്കും യഥാക്രമം ഗാലക്‌സി S9-ലും S9+-ലും ഉണ്ടാവുക. യുഎസിലും ചൈനയിലും സ്‌നാപ്ഡ്രാഗണ്‍ 845 SoC ചിപ്‌സെറ്റോട് കൂടി ഫോണുകള്‍ വിപണിയിലെത്തും.

മറ്റ് രാജ്യങ്ങളില്‍ ഇറങ്ങുന്ന ഫോണുകളില്‍ ഉപയോഗിക്കുന്നത് Exynos 9810 ചിപ്‌സെറ്റാണ്. S9-ല്‍ 4GB റാമും 3000 mAh ബാറ്ററിയും ഉണ്ടാവും. S9+-ല്‍ എത്തുമ്പോള്‍ ഇത് 6GB-യും 3500 mAh-ഉം ആയിമാറും.

ഫെബ്രുവരി 25-ന് പുറത്തിറങ്ങുന്നതിനാല്‍ ഫോണുകളുടെ പ്രീബുക്കിംഗ് മാര്‍ച്ച് ഒന്നിന് ആരംഭിക്കുമെന്നാണ് പ്രതീക്ഷിക്കപ്പെടുന്നത്. മാര്‍ച്ച് 16 മുതല്‍ ഫോണുകള്‍ അയച്ചുതുടങ്ങും. എന്നാല്‍ സാംസങ് ഇക്കാര്യങ്ങള്‍ ഇതുവരെ സ്ഥിരീകരിച്ചിട്ടില്ല.